Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Iseri ri Jihova

Sane ejajẹ Urhobo

 UYONO 11

Sen Ẹga Rẹ Ofian!

Sen Ẹga Rẹ Ofian!

Eshu vẹ emekashe rọyen guọnọre nẹ wọ ga Ọghẹnẹ-ẹ. Ayen guọnọre nẹ ihwoeje chuko ku Ọghẹnẹ. Mavọ yẹn ayen ruẹ ọnana wan? Idjerhe ọvo yẹn womarẹ ẹga rẹ ofian. (2 Kọrẹnt 11:13-15) Ẹga rẹ ofian, ọyen ẹga rọ rhọvwan yono uyota ri Baibol na-a. Ẹga rẹ ofian họhọ igho ri wayo, ọ sa họhọ omamọ rẹ igho, ẹkẹvuọvo e se vwo ruẹ emu vuọvo-o. Ọ sa so okpetu vwọ kẹ wẹ.

Ẹga rẹ ofian cha sa vwerhen Jihova, Ọghẹnẹ rẹ uyota na oma-a. Ọke ri Jesu vwọ hẹ otọrakpọ na, ihwo rẹ ẹga ọvo herọ re guọnọ hwe. Ayen rori nẹ oborẹ ayen ga ẹga wan ọyen gbare. Ayen da ta: “Avwanre vwo Ọsẹ ọvo, ọyen Ọghẹnẹ.” Jesu rhọvwenre? Ẹjo! Ọ da vuẹ ayen: “Ovwan ọ rẹ ọsẹ rẹ ovwan Idẹbono.” (Jọn 8:41, 44) Nonẹna, ihwo buebun roro nẹ Ọghẹnẹ yẹn ayen ga, ẹkẹvuọvo Eshu vẹ emekashe rọyen yen ayen ghene ga!​—1 Kọrẹnt 10:20.

 Kirobo rẹ orharhe rẹ urhe mọ orharhe rẹ emamọ na, ọtiọyen ẹga rẹ ofian ji vwo erharhe ihwo ri ruẹ obo ri miovwirin. Akpọ na vọnre vẹ okpetu fikirẹ erọnvwọn ebrabra rẹ ihwo ruẹ. Ọfanrhiẹn, ohọnre, uji, oshenyẹ, ohwekufia, kugbe ẹgbaduẹ. Ihwo buebun ri ruẹ erọnvwọn ebrabra nana vwo ẹga rẹ ayen ra, ẹkẹvuọvo ẹga rayen mu ayen vwo ru obo ri yovwiri-in. Ayen cha sa dia igbeyan rẹ Ọghẹnẹ-ẹ, jokpanẹ kẹ ayen dobọ rẹ umiovwon ji.​—Matiu 7:17, 18.

Ẹga rẹ ofian yono ihwo nẹ ayen nẹrhovwo kẹ ema. Ọghẹnẹ tare nẹ a nẹrhovwo kẹ ema-a. Ọnana emu rẹ aghwanre. Oma cha vwerhen owẹ siẹrẹ ohwo rha rhọvwen tota kẹ wẹ-ẹ, jẹ ọ tota kẹ ifoto wẹn? Ohwo yena sa dia ugbeyan wẹn? Ẹjo, kakaka. Jihova guọnọre nẹ ihwo tota kẹ ọyen, ọ dia oma yẹrẹ ifoto ro vwo arhọ-ọ.​—Eyanno 20:4, 5.

Ẹga rẹ ofian yono nẹ ofori revwo hwe ihwoefa vwẹ ọke rẹ ofovwin. Jesu tare nẹ igbeyan rẹ Ọghẹnẹ che vwo ẹguọnọ rẹ ohwohwo. Avwanre hwe ihwo rẹ avwanre vwo ẹguọnọ raye-en. (Jọn 13:35) Ọ tobọ chọ avwanre vwo hwe ihwo re brare. Ọke rẹ ivwighrẹn ri Jesu rhi vwo muo, ọ vwẹ uphẹn kẹ idibo rọyen nẹ ayen họnre vwọ chochọn rọye-en.​—Matiu 26:51, 52.

Ẹga rẹ ofian yono nẹ iruimwemwu cha rioja vwẹ ẹtẹrhe erhanre. Baibol na yonori nẹ umwemwu yen ghwẹ ughwu cha. (Rom 6:23) Jihova ọyen Ọghẹnẹ rẹ ẹguọnọ. Ọghẹnẹ rovwo ẹguọnọ sa vwẹ oja re ihwo bẹdẹ? Kakaka! Vwevunrẹ Paradaisi, ẹga ọvo yen cha dia, ọrẹ Jihova jẹ reyọ. (Ẹvwọphia 15:4) Ẹga ri yono uyono rẹ ofian re Eshu eje che no.