Erọnvwọn ebrabra re phia vwẹ akpọ na asaọkiephana djerephia nẹ Paradaisi sikẹre re. Baibol na tare nẹ avwanre cha mrẹ ọke ri mwoshọ tavwen Paradaisi na ke rhe. Ọke yena yẹn avwanre de yerẹn enẹna! Ena yẹn erọnvwọn evo ri Baibol na tare nẹ e cha phia:

Ifovwin. “Ẹgborho cha vwọ so ẹgborho, uvie cha vwọ so uvie.” (Matiu 24:7) Aroẹmrẹ nana rugba re. Vwo nẹ ukpe rẹ 1914 rhe, a mrẹ ifovwin rẹ akpọeje ivẹ vẹ efa buebun. Iduduru rẹ ihwo yin ghwuru vwẹ ifovwin na.

Ega rhe vọn asan eje. ‘Ega cha vọn asan ejobi.’ (Luk 21:11) Kẹ aroẹmrẹ nana rugba? E. Ikansa, ọga rẹ ubiudu, owọnrhe ọgangan, odo vẹ AIDS hwe iduduru rẹ ihwo re.

Emu rọ cha kanre. Ihwo rẹ owẹnvwe hwe pha buebun vwẹ akpọ na. Kukpe kukpe, iduduru rẹ ihwo yen ghwẹ fikirẹ owẹnvwe. Ọnana oka ọfa ro djerephia nẹ Paradaisi cha rhe kẹrẹkpẹ. Baibol na tare nẹ: “Owẹnvwe che fi.”​—Mak 13:8.

 Otọ che kpogho. “Otọ che kpogho vwẹ asan buebun.” (Matiu 24:7) Aroẹmrẹ nana ji rugba vwẹ ọke avwanre na. Vwo nẹ 1914 rhe, otọ ro kpogho hwe ihwo ri bun vrẹ oduduru ọvo.

Ihwo umwemwu. “Ihwo cha guọnọ omaobọ rẹ ayen nọ, e cha guọnọ igho nọ.” Ayen cha “guọnọ omavwerhen jẹ ẹguọnọ rẹ Ọghẹnẹ vwo.” Emọ “che mu ọghọ kẹ esẹ vẹ ini-i.” (2 Timoti 3:1-5) Aphro herọ-ọ, a mrẹ oka rẹ ihwo nana nonẹna. Ayen mu ọghọ kẹ Ọghẹnẹ-ẹ, ayen ji kpokpo ihwo re guọnọ yono kpahen Ọghẹnẹ.

Urhiẹchọ. Ihwo re rhọvwan nene ‘urhi-i che bun phiyọ.’ (Matiu 24:12) Wọ je cha rhọvwen nẹ urhiẹchọ vẹ ozighi re gan phiyọ vrẹ obo ri jovwo. Oshọ muẹ ihwo vwẹ asan ejobi, fikiridie e se gborho ayen, kuọn ayen oma yẹrẹ ghwa ayen re.

Erọnvwọn nana eje yin djerephia nẹ Uvie rẹ Ọghẹnẹ sikẹre re. Baibol na tare nẹ: “Ọke wọ da ghwa mrẹ imu nana re phiare, gba ghwa riẹn nẹ Uvie rẹ Ọghẹnẹ na kẹri re.” (Luk 21:31) Die yẹn Uvie rẹ Ọghẹnẹ? Ọyẹn usuon rẹ Ọghẹnẹ rọhẹ odjuvwu rọ cha hwarhiẹ Paradaisi rhe akpọ na. Uvie rẹ Ọghẹnẹ cha reyọ ẹdia rẹ usuon rẹ ihworakpọ.​—Daniẹl 2:44.