Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYONO 18

Dia Ugbeyan rẹ Ọghẹnẹ Bẹdẹ Bẹdẹ!

Dia Ugbeyan rẹ Ọghẹnẹ Bẹdẹ Bẹdẹ!

Ọ guọnọ ẹgbaẹdavwọn e ki se vwọ ugbeyan, ọ je guọnọ ẹgbaẹdavwọn ugbeyan tiọyena ke sa tọn. Wọ cha mrẹ ebruphiyọ rode ru wọ vwọ davwẹngba rere wẹ vẹ Ọghẹnẹ savwọ dia ugbeyan. Jesu vuẹ ihwo ri se re gbuyota: “Uyota na ko ru ovwan phihọ ọmuvwiẹ.” (Jọn 8:32) Die yen ọyena mudiaphiyọ?

Wọ sa re erere rẹ ọmuvwiẹ asaọkiephana. Wọ sa vrabọ rẹ iyono rẹ efian kugbe efian rẹ Eshu hra nene asan eje. Wọ je sa vrabọ rẹ akpọ ro jẹ iphiẹrophiyọ evwo rẹ ihwo buebun re riẹn Jihova-a yerẹn. (Rom 8:22) Igbeyan rẹ Ọghẹnẹ tobọ vwo ọmuvwiẹ vwo nẹ “oshọẹdjẹ rẹ ughwu.”​—Hibru 2:14, 15.

Wọ sa re erere rẹ ọmuvwiẹ vwẹ akpọ kpokpọ rẹ Ọghẹnẹ. Avwanre cha re erere rẹ uvi ọmuvwiẹ vwẹ ọke rọ cha obaro na. Vwi Paradaisi vwẹ otọrakpọ na, ifovwin, ega kugbe jẹ urhi ẹyọnrọn che no. Ọkanrovwẹ, owẹnvwe, ọghwo, ughwu, oshọ kugbe oshenyẹ ra cha dia-a. Baibol na ta kpahen Ọghẹnẹ nẹ: “Wọwẹ ri rhie obọ wẹn, wọwẹ re vwẹ obo ri kohwo kohwo ọkpokpọ guọnọre kẹ.”​—Une Rẹ Ejiro 145:16.

 Igbeyan rẹ Ọghẹnẹ cha dia bẹdẹ. Arhọ ri bẹdẹ ọyen okẹ rọ pha ghanghanre rẹ Ọghẹnẹ cha vwọkẹ igbeyan rọyen eje. (Rom 6:23) Di roro obo arhọ ri bẹdẹ che mudiaphiyọ kẹ wẹ!

Wọ cha mrẹ ọke vwo ru erọnvwọn buebun. Ọ sa dianẹ wo che vwo omavwerhovwẹn kpahen obo re hworo ekuakua rẹ uhworo, yẹrẹ ọkeọvo wo mi rhi vwo ẹwẹn ru wo vwo ruiruo rẹ atisti yẹrẹ iruo rẹ ikapita. Wo ji se yono kaphen eranvwe vẹ irhe. Ọkeọvo wo che kpe ẹkuotọ sansan da rha mrẹ ihwo buebun. Arhọ ri bẹdẹ cha nẹrhẹ erọnvwọn nana eje phia!

Wọ cha mrẹ ọke vwo mu igbeyan buebun. Arhọ ri bẹdẹ cha nẹrhẹ wọ riẹn ihwoefa buebun re je dia igbeyan rẹ Ọghẹnẹ. Ku wọ cha riẹn iruemu iyoyovwin vẹ ena rẹ ihwo nana vwori, ayen je cha dia igbeyan wẹn. Wo che vwo ẹguọnọ rayen, ayen ji che vwo ẹguọnọ wẹn. (1 Kọrẹnt 13:8) Arhọ ri bẹdẹ na cha kẹ wẹ ọke vwọ dia ugbeyan ri kohwo kohwo vwẹ otọrakpọ na! Ọ rọ ma ghanre, oyerinkugbe wẹn vẹ Jihova cha gan phiyọ ọke vwọ yanran na. Wọ me dia ugbeyan rẹ Ọghẹnẹ bẹdẹ!