Paradaisi cha dia kerẹ akpọ na rẹ avwanre de yerẹn asaọkiephana-a. Ọghẹnẹ guọnọ nẹ okpetu vẹ omaemuophiyọ, odjadja kugbe ojaẹriọ-ọ dia akpọ na-a. Vwẹ obaro na, Ọghẹnẹ che ru akpọ na phiyọ paradaisi. Mavọ yẹn Paradaisi cha dia? E jẹ avwanre ni obo ri Baibol na tare:

Omamọ rẹ ihwo. Igbeyan rẹ Ọghẹnẹ cha dia evunrẹ Paradaisi. Ayen che ru erhuvwu kẹ ohwohwo. Ayen che nene idjerhe ọvwata rẹ Ọghẹnẹ.​—Isẹ 2:21.

Emu cha dia buebun. Vwevunrẹ Paradaisi, owẹnvwe cha dia-a. Baibol na tare: “E jẹn ọka [yẹrẹ emu] buebun dia otọ na.”​—Une Rẹ Ejiro 72:16.

Omamọ rẹ iwevwin vẹ iruo. Vwevunrẹ Paradaisi na, orua ejobi che vwo uwevwin romobọ rayen. Ihwo ejobi che ru iruo rọ cha ghwa uvi rẹ omavwerhovwẹn rhe.​—Aizaya 65:21-23.

 Ufuoma vwẹ akpọeje. Ihwo rha cha họnre ji ghwu vwẹ ofovwin ọfa-a. Baibol na da ta: Ọghẹnẹ cha “nẹrhẹ ofovwi fuen.”​—Une Rẹ Ejiro 46:8, 9.

Omakpokpọ. Baibol na vuẹ avwanre: “O gbi vwo ohwo rẹ orere na [vwi Paradaisi] ọvuọvo rọ sa tanẹ, Me mwọga-a.” (Aizaya 33:24) Vwọba, a ra cha mrẹ ukpono, orhuẹro, odierhọn yẹrẹ ohwo ro diunu-u.​—Aizaya 35:5, 6.

Odjadja, omaemuophiyọ, kugbe ughwu che vwoba. Baibol na da ta: “Ughwu gbe cha dia ọfa-a, eyẹ omaemuohọ eyẹ oviẹ eyẹ odjadja ọfa-a, kidie emu rẹ awanre na wanvrẹn nure.”​—Ẹvwọphia 21:4.

Iruimwemwu rẹ ihwo che no. Jihova veri: “A cha nyavwe iruimwemwu kufia nẹ evun rẹ otọ na, e che ghwie awọ rayen otu re phiẹn ihwo nẹ evun rẹ otọ na.”​—Isẹ 2:22.

Ihwo che vwo ẹguọnọ ji muọghọ kẹ ohwohwo. Oshenyẹ, urhuru, kugbe utuoma ra cha dia ọfa-a. Ihwoeje che yerinkugbe vwọrẹ ufuoma, ji nene idjerhe rẹ ọvwata rẹ Ọghẹnẹ.​—Aizaya 26:9.