Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Iseri ri Jihova

Sane ejajẹ Urhobo

 ẸBẸRE 4

Abe—“Hworhẹ Ovwẹ nẹ Imwemwu Mẹ”

Abe—“Hworhẹ Ovwẹ nẹ Imwemwu Mẹ”

“Iruo kpokpọ ri mi ruẹ asaọkiephana nẹrhẹ akpeyeren rẹ orua mẹ yovwinphiyọ, ẹkẹvuọvo, ọ je nẹrhẹ mi vwobọ vwẹ iruemu re chọre. Ki mi vwobọ vwẹ erẹ ri je fo, oseghe rẹ usuon, kugbe ishọshi ẹra dede. Me dobọ rẹ uyono ẹra ji ọsoso ẹgbukpe 40. Ọke vwọ yanran na, ki mi roro nẹ, Jihova rhe che se vwo ghovwo uvwe-e. Ọ da vwẹ mamọ, kidie me riẹn uyota na jovwo, me ke vwẹ arogba mẹ vwo bo ghwru.”—Martha.

ẸWẸN rẹ abe tiọyena sa nẹrhẹ ofu dje ohwo. Ovie Devid de si: “Orukuruku mẹ phoro uyovwin mẹ, e họhọ nọ oghwa kẹ vwẹ.” (Une Rẹ Ejiro 38:4) Inene-ri-Kristi evo roro nẹ Jihova che se vwo ghovwo aye-en, ọtiọyena, oma rha vwerhen aye-en. (2 Kọrẹnt 2:7) Iroro tiọyena gbare? Ọ da tobọ dianẹ wo ru imwemwu echọchọ evo, wo rori nẹ Jihova rhe che se vwo ghovwo uwe-e? Ẹjo, o ji se vwo ghovwo uwe!

Jẹ “Avwanre Jẹ Iroro Kugbe”

Iruimwemwu ri kurhẹriẹ, Jihova kpairoro vrẹ aye-en. Vwọrẹ uyota, ọ guọnọ chọn ayen uko! Vwẹ ikuegbe rẹ ọmọ osoghoro na, Jesu vwẹ Jihova vwo dje ọsẹ na rẹ ọmọ rọyen djẹ nẹ uwevwin re yeren orharhe akpọ. O vwo te ọke ọvo, ọmọ na de brorhiẹn ro vwo rhivwin kpo. “Ẹkẹvuọvo rọ vwọ cha vwe ogboko re, ọsẹ rọyen da mrẹ, ehrọre rọyen da riọ, ọ da djẹ ra gbanọ ọ da fiọnfiọn unu.” (Luk 15:11-20) Wọ guọnọ sikẹre Jihova jẹ wo no nẹ wọ hẹ “ogboko” vwọ kẹ? Kerẹ ọsẹ yena vwẹ ikuegbe ri Jesu na, Jihova ji che dje arodọnvwẹ kẹ wẹ. Wo de rhivwin bro rhe, ọ choma ro vwo rhiabọdede uwe.

Wo roro nẹ Jihova che se vwo ghovwo uwe-e kidie imwemwu wẹn bu nọ? Biko roro kpahen edurhie ri Jihova re si phiyọ Aizaya 1:18: “ ‘Mọ vwo ọke na re avwanre jẹn iroro kugbe;’ ọtiọyen Ọrovwohwo tare: ‘ọ da dianẹ imwemwu wẹn họhọ isene, e cha họhọ ukpoyibo.’ ” Ọ da tobọ dianẹ imwemwu rẹ ohwo pha kerẹ isene ro ghworo ewun ọfuanfon, Jihova ji se vwo ghovwo.

Jihova guọnọre nẹ ẹwẹn obrorhiẹn wẹn kpokpo uwe ọkieje-e. Mavọ yen evwoghovwo rẹ Ọghẹnẹ sa nẹrhẹ wo vwo ufuoma kugbe omamọ rẹ ẹwẹn obrorhiẹn? Roro kpahen erọnvwọn ivẹ Ovie Devid ruru. Ẹsosuọ, Devid da ta, “Me fan ogbeku mẹ kẹ Ọrovwohwo.” (Une Rẹ Ejiro 32:5) Karophiyọ nẹ Jihova durhiuwe nẹ wọ nẹrhovwo rhe, rere wẹ vẹ ọyen “jẹ iroro kugbe.” Rhiabọreyọ edurhie nana. Fan imwemwu wẹn kẹ Jihova, je ta ọdavwẹ wẹn kẹ. Fikirẹ obo ri Devid rhiẹromrẹ, o de fiudugberi nẹrhovwo nẹ: “Hworhẹ ovwẹ nẹ imwemwu mẹ. . . . Udu rọ guọghọre kugbe udu ọfuanfon, E Ọghẹnẹ, wọ sian otu nana-a.”—Une Rẹ Ejiro 51:2, 17.

Ọrivẹ, ọmraro rẹ Ọghẹnẹ Natan, vwẹ ukẹcha vwọ kẹ Devid. (2 Samuẹl 12:13) Nonẹna, Jihova vwẹ ekpako vwo mu vwevunrẹ ukoko na re vwẹ ukẹcha kẹ iruimwemwu ri kurhẹriẹ rere ayen vẹ ọyen sa rhoma dia ugbeyan. Wo  de bru ekpako na ra, ayen cha vwẹ Baibol na chọn wẹ uko, ayen ji che nenuwe nẹrhovwo rere ubiudu wẹn vwọ sasa, wo se vwo vwo omamọ rẹ ẹwẹn obrorhiẹn, wọ me je gan vwevunrẹ ukoko na.—Jems 5:14-16

Jihova guọnọre nẹ wo vwo ẹwẹn rẹ obrorhiẹn rọ fonro

“Ebruba kẹ Ohwo ra Vwẹ Ogbeku Rọyen Rhovwo”

Vwọrẹ uyota, ọ sa dia bẹnbẹn kẹ wẹ wọ vwọ fan imwewmu wẹn ki Jihova vẹ ekpako na. Ọtiọyen ọ je hepha kẹ Devid. O “rhurhu imwemwu” rọyen vwo te ọke evo. (Une Rẹ Ejiro 32:3) Ẹkẹvuọvo ọ mrẹ erere ọke rọ vwọ fan imwemwu rọyen, o ji vwo kurhẹriẹ.

Erere ọvo rẹ Devid mrẹre ọyehẹ, aghọghọ rọ rhoma vwo. O de si: “Ebruba kẹ ohwo ra vwẹ ogbeku rọyen rhovwo, re rhurhu imwemwu rọyen kẹ.” (Une Rẹ Ejiro 32:1) Ọ je nẹrhovwo nẹ: “E Ọrovwohwo, rhie ẹbẹrunu mẹ, rere unu mẹ vwọ vwẹ ejiro wẹn phia.” (Une Rẹ Ejiro 51:15) Ọghẹnẹ vwọ reyọ imwemwu rẹ Devid vwo ghovwo nu, ẹwẹn rọyen de totọ, ọnana de muo vwọ vuẹ ihwoefa kpahen Jihova.

Jihova guọnọre nẹ wo vwo ẹwẹn rẹ obrorhiẹn rọ fonro. Ọ je guọnọ nẹ wọ vuẹ ihwoefa kpahen ọhọre rọyen vẹ omavwerhovwẹn ukperẹ wo vwo ruo vẹ ẹwẹn rẹ obrorhiẹn ro kpokpo uwe. (Une Rẹ Ejiro 65:1-4) Karophiyọ, ọ tare nẹ ovwan kurhẹriẹ, “rere ephoro imwemwu rẹ ovwan nu, rere omamọ rẹ eyeren rẹ arhọ na vwo nẹ obọ rẹ Ọrovwohwo na bru ovwan rhe.”—Iruo 3:19.

Ọna yen obo re phia kẹ Martha. Ọ da ta: “Ọmọ mẹ reyọ Watchtower vẹ Awake! vwo rhe vwe kọke kọke. Ememerha na, ke me rhoma rhe dia ugbeyan ri Jihova. Obo re ma bẹn kẹ vwẹ ọyen, me vwọ nẹrhovwo nẹ a vwẹ imwemwu mẹ vwo ghovwo uvwe. Ukuotọ rọyen me da nẹrhovwo kẹ Ọghẹnẹ nẹ o vwo ghovwo uvwe. O che muwẹro-o, ọsoso ẹgbukpe 40 yen wanre tavwen mi ki rhivwin bru Jihova rhe. Ikuegbe mẹ djerephia nẹ ohwo da tobọ bo ghwru vwẹ ikpe buebun dede, uphẹn je herọ rọvwọ rhoma rhe ga Jihova, ọ me je dia evunrẹ ẹguọnọ rọyen.”