“Oniọvo aye ọvo tare nẹ mi cho igho rọyen. Iniọvo efa rehẹ evunrẹ ukoko na vwo nyo, kẹ ayen vwẹ ẹro oji vwo ni vwe. Ukuotọ rọyen, oniọvo na da rhe vuẹ vwẹ nẹ o nyo eta evo ro djerephia nẹ ọ dia omẹvwẹ yin cho igho na-a. Dede nẹ o yovwunu kẹ vwẹ, jẹ mi niro nẹ mi che se vwo ghovwo-o, fikirẹ obo ro ru vwe na.”—Linda.

ONIỌVO ọvo ru we obo re nẹrhẹ ophu mu we kirobo rọ phia kẹ Linda na? Ọ da ohwo nẹ ihwoevo vwẹ uphẹn vwọ kẹ uruemu rẹ iniọvo evo nẹ o djobọte ẹga rayen. Ọnana phia kẹ wẹ dẹvore?

O Vwo Ohwo rọ “sa Hẹriẹ Avwanre nẹ Ẹguọnọ rẹ Ọghẹnẹ”?

Aphrọ herọ-ọ, siẹrẹ oniọvo de gbe avwanre ku, ọ sa dia bẹnbẹn re vwo ghovwo. Ẹkẹvuọvo ofori nẹ Inene-ri-Kristi vwo ẹguọnọ rẹ ohwohwo. (Jọn 13:34, 35) Oniọvo de gbe avwanre ku, ọ da ohwo mamọ.—Une Rẹ Ejiro 55:12.

Vwọrẹ uyota, Baibol na tare nẹ ọkiọvo oniọvo se “gbe we ku.” (Matiu 18:15) Dedena, ọ bẹn a savwọ kpairoro vrẹ, siẹrẹ e de gbe avwanre ku. Die yen sa chọn avwanre uko? E jẹ e roro kpahen erọnvwọn erha:

Ọsẹ avwanre rọhẹ obodjuvwu mrẹ erọnvwọn eje. Jihova mrẹ erọnvwọn eje re phia, ọtiọyen ji te oshenyẹ vẹ oja rẹ avwanre rhiẹromrẹ. (Hibru 4:13) Vwọba, ọ da Jihova ọke rẹ avwanre da rioja. (Aizaya 63:9) Ọghẹnẹ cha sa fọ kẹ orọnvwọn ọvuọvo nẹ ọ “hẹriẹ avwanre nẹ ẹguọnọ” rọye-en, owenẹ ọ dia “ukpokpogho,” “emiavwe,” yẹrẹ odibo rọyen dede. (Rom 8:35, 38, 39) Ọtiọyena, avwanre je vwẹ uphẹn kẹ orọnvwọn vuọvo yẹrẹ ohwo vuọvo nẹ o si avwanre nẹ ẹbẹre ri Jihova-a.

Evwoghovwo fẹnẹ revwo rhurhu umwemwu. Avwanre de vwo ghovwo, ọ diẹ ọyen o vwo mudiaphiyọ nẹ avwanre vwẹ ẹro otete vwo nẹ oruchọ rẹ ohwo yena yẹrẹ ke rhurhiro-o. Karophiyọ nẹ Jihova vwo utuoma kpahen umwemwu, dedena o vwo ghovwo siẹrẹ ọ da mrẹ oboresorọ rovwo ru ọtiọyen. (Une Rẹ Ejiro 103:12, 13; Habakọk 1:13) Jihova guọnọre nẹ avwanre vwẹrokere, kọyen sorọ ọ vwọ tanẹ e vwo ghovwo ohwohwo. “O mu ophu rọyen rhirin bẹdẹ-ẹ.”—Une Rẹ Ejiro 103:9; Matiu 6:14.

Avwanre mrẹ erere siẹrẹ avwanre de vwo ghovwo. Vwẹ idjerhe vọ? Roro kpahen udje nana. Wọ da yọnrọn ubiukuta jẹ wọ riẹn obọ wẹn phia, ọ cha bẹn wọ vwọ yọnrọn vwẹ ọmọke krẹ-ẹn. Kẹ wọ da rha yọnrọn krekri vwo? Kerẹ ibrẹro evo, unọke ọvo, yẹrẹ tobọ vrẹ ọtiọyen vwo? Aphro herọ-ọ, obọ cha rhọ wẹ! Ọ diẹ a rhoma phiba ọnyẹ rẹ ubiukuta na-a. Keridie nẹ wọ yọnrọn krekri, kọyen sorọ ọ vwọ dia ọtiọyen. Ọtiọyen ophu je hepha. Avwanre de phi ophu phiyọ evun, ọ da tobọ dia omorọnvwọn yen sorọ, ọ cha wan avwanre oma. Kọyen sorọ Jihova vwọ vuẹ avwanre nẹ, e si ophu nẹ evun. Ọyena cha kẹ avwanre erere.—Isẹ 11:17.

Avwanre de si ophu nẹ evun, ọyena cha kẹ avwanre erere

 “Kọ Ghwa Họhọ nẹ Jihova Yen Tota kẹ Vwẹ Na”

Die yen chọn Linda uko vwọ kpairoro vrẹ obo rẹ oniọvo na ruro? Ọvo usun rẹ erọnvwọn re chọn rọ uko yehẹ ro vwo roro kokodo kpahen obo rẹ Baibol na ta kpahen evwoghovwo. (Une Rẹ Ejiro 130:3, 4) Linda karophiyọ nẹ avwanre de vwo ghovwo ihwoefa, Jihova ko ji che vwo ghovwo avwanre, ọnana kọyen mu ro vwo ghovwo oniọvo na. (Ẹfesọs 4:32-5:2) Rọ vwọ tota kpahen oborẹ eta yena djobọte wan, ọ da ta: “Kọ ghwa họhọ nẹ Jihova yen tota kẹ vwẹ na.”

Ukuotọ rọyen, Linda de rhi si ophu nẹ evun. O de vwo ghovwo oniọvo na kare kare, asaọkiephana, ayen uvi igbeyan. Linda je nabọ ga Jihova sasasa. Vwo imwẹro nẹ Jihova je cha chọn wẹ uko vwo ru ọtiọyen.