Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Baibol Na—Ovuẹ Vọ Yehẹ Evun Rọyen?

 ẸBẸRE 5

Ọghẹnẹ Ku Ebruphiyọ Ku Ebraham vẹ Orua Rọyen

Ọghẹnẹ Ku Ebruphiyọ Ku Ebraham vẹ Orua Rọyen

Akpọ yovwẹn emọ rẹ Ebraham. Ọghẹnẹ chochọ ri Josẹf vwẹ Ijipt

JIHOVA riẹnre nẹ ẹdẹ cha rẹ Ọmọ rọyen rọ ma ghanre kẹ na cha vwọ rioja ji ghwu. Aroẹmrẹ ri Jẹnẹsis 3:15 djunute uyota yena. Ọghẹnẹ ghini se dje kẹ ihworakpọ oborẹ ughwu rẹ Ọmọ rọyen na cha da te? Baibol na reyọ obo re phia kẹ ọshare ọvo vẹ ọmọ rọyen vwo djudje rọyen. Ọghẹnẹ vuẹ Ebraham nẹ ọ reyọ ọmọ ọghanghanre rọyen Aizik vwo ze izobo.

Ebraham vwo esegbuyota ọgangan. Karophiyọ nẹ Ọghẹnẹ vuve kẹ nẹ Osivwin yẹrẹ Ọmọ ra mraro rọyen na cha wan omarẹ Aizik rhe. Kidie nẹ Ebraham vwẹroso Ọghẹnẹ nẹ ọ cha rhọvwọn Aizik nẹ ushi siẹrẹ ọ da guọnọ, ọnana da nẹrhẹ o vwo owenvwe rọ vwọ reyọ ọmọ rọyen na vwo ze izobo. Ẹkẹvuọvo, amakashe rẹ Ọghẹnẹ da dobọ rẹ Ebraham ji. Ọghẹnẹ jiri Ebraham fikirẹ ẹwẹn ro vwori rọ cha vwọ reyọ ọmọ ọghanghanre rọyen na vwo ze izobo, Ọghẹnẹ da vwanriẹn uve ro ve kẹ Ebraham na.

Ọke vwọ yanran na, Aizik de vwiẹ emọ ivẹ, Isọ vẹ Jekọp. Jekọp fẹnẹ Isọ, kidie Jekọp vwo ọdavwaro kpahen ota rẹ Ọghẹnẹ, ọtiọyena, Ọghẹnẹ de bruba kẹ. Ọghẹnẹ wene odẹ ri Jekọp kpo Izrẹl, emọ rẹ Izrẹl 12 na ke rhe dia igbuyovwin rẹ uvwiẹ rẹ Izrẹl. Ẹkẹvuọvo, mavọ yen orua yena rhe vwọ dia ẹgborho rode?

Erọnvwọn sansan ke rhe phia ọke rẹ emọ ri Jekọp buebun vwọ rioma kpahen Josẹf rọ dia oniọvo rayen otete. Ayen da shẹ kerẹ ọviẹn vwo kpo Ijipt. Ọghẹnẹ ku ebruphiyọ ku eghene yena rọ fuevun, ro ji fiudugberi na. Dede nẹ o rhiẹromrẹ ebẹnbẹn, osun rẹ Ijipt re se Fero da jẹ Josẹf reyọ, ọ da vwẹ ogangan rẹ usuon vwọ kẹ. Vwẹ ọke yena, owẹnvwe de rhi fi rọ nẹrhẹ Jekọp ji emọ rọyen evo kpo Ijipt ra dẹ emu, jẹ Josẹf yen vwẹrote emu rẹ Ijipt eje! Josẹf vẹ iniọvo rọyen vwọ rhuẹrẹ kugbe nu, o de vwo ghovwo ayen, ọ da vuẹ ayen nẹ ayen kua rhe Ijipt. A da kẹ ayen otọ oyoyovwin nẹ ayen dia, asan rẹ ayen de se bunphiyọ. Josẹf riẹnre nẹ Ọghẹnẹ yen nẹrhẹ erọnvwọn nana phia rere O vwo ru uve rọyen gba.

Ijipt kọyen Jekọp rọ ghwore na diare o ki rhi ghwu, emọ rọyen ji ghwe buẹnphiyọ. O che vwo ghwu, ọ da tanẹ Ọmọ na yẹrẹ Osivwin re veri na cha dia Osun ro vwo ẹgba, uvwiẹ ri Juda ọyen o che nurhe. Tavwen Josẹf ki rhi ghwu, ọ da je mraro nẹ ẹdẹ ọvo che te rẹ Ọghẹnẹ che vwo si orua ri Jekọp nẹ Ijipt.

—E muro kpahen Jẹnẹsis uyovwin 20 re te 50; Hibru 11:17-22.