Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 ẸBẸRE 21

Jesu Vrẹnushi Re!

Jesu Vrẹnushi Re!

Jesu vwomaphia kẹ idibo na rere o vwo yono ayen, je bọn ayen gan

JESU ghwuru, ẹdẹ erha vwọ wan nu, eya evo re dia idibo rọyen da mrẹ nẹ oragha ro rhurhu anurhoro rẹ ushi na rha herọ-ọ. Vwọba, ushi na ọfefe!

Emekashe ivẹ da vwomaphia kẹ ayen. Ọvo da tanẹ: “Jesu ri Nazarẹt . . . na ovwan guọnọ, o vrẹnre.” (Mak 16:6) Eya na rhe hwọke-e, ayen da djẹ ra vuẹ idibo na. Ayen da mrẹ Jesu vwẹ idjerhe. Ọ da ta kẹ ayen nẹ: “Wa djẹ oshọ-ọ! Ovwan ra vuẹ imoni mẹ ri chekọ nẹ, ayen wan fi Galili, kẹ oboyi ayen da mrẹ vwẹ.”—Matiu 28:10.

Vwẹ ẹdẹ vuọvo yena, idibo rọyen ivẹ yan nẹ Jerusalẹm kpo ọko rẹ Emaọs. Ọshare ọvo da vwẹ oma ba ayen, ọ da nọ ayen oborẹ ayen tota kpahan. Ọshare yena yen Jesu ro vrẹnushi na, ọ vwomaphia kẹ ayen vwẹ ugboma rẹ ayen se vughe ẹsosuọ-ọ. Vwọrẹ omaemuophiyọ, ayen da vuẹ nẹ ayen tota kpahen Jesu. Ọshare na ko dje fiotọ kẹ ayen erọnvwọn ri Baibol na ta kpahen Mesaya na. Vwọrẹ uyota, Jesu ru orugba rẹ aroẹmrẹ na eje ra mrẹ kpahen Mesaya na. * Idibo na vwọ mrẹvughe nẹ ọshare na yen Jesu ra rhọvwọn nẹ ushi na, ọ da ranvwiẹ nẹ ohri rayen.

Idibo ivẹ na de ghwe rhivwin kpo Jerusalẹm. Ayen da mrẹ idibo ichekọ na ri siomakoko vwẹ uwevwin ọvo. Ọke rẹ ayen vwo gbikun rẹ oborẹ ayen mrẹre, Jesu da ghwa vwomaphia. O de gbe idibo na unu mamọ! Jesu da nọ ayen nẹ: “Kidie ovwan vwọ nọ enanọ vwẹ udu rẹ ovwan?” “Enẹ e siro nẹ Kristi na cha reoja vwẹ ẹdẹ rerha ko vrẹn nẹ ughwu.”—Luk 24:38, 46.

Ro vwo vrẹnushi nu, Jesu vwomaphia kẹ idibo na ọke sansan, vwẹ ẹdẹ 40. Vwẹ ọke ọvo, ọ vwomaphia kẹ ihwo re vrẹ 500! Ọ sa dianẹ ọke nana yen ọ vwọ vwẹ owian ọghanghanre ọvo vwọ kẹ ayen nẹ: “Ọvwan gba yanran re we re yono ihwo rẹ akpọ na ejobi . . . we yono ayen vwọ riẹn otọ rẹ imu na ejobi re dje kẹ ovwan na. Nighe, me vẹ ovwan herọ vwẹ ọke ejobi, rhiri rhi te oba rẹ akpọ na.”—Matiu 28:19, 20.

Vwevunrẹ echidiotọ rọ koba rọ vẹ idibo 11 na vwori, Jesu de ve kẹ ayen: “Ovwan che vwo ẹgba siẹ rẹ Erhi Ọfuanfon [ẹwẹn ọfuanfon, NW] na de bru ovwan rhe nu; ovwan ke cha dia iseri mẹ . . . rhiri re te oba rẹ akpọ na.” (Iruo Rẹ Iyinkọn Na 1:8) Ọ vwọ ta ọnana nu, Ọghẹnẹ da kparọ kpo odjuvwu, irharheghe na de rhurho.

—E muro kpahen ẹbe rẹ Matiu uyovwin 28; Mak uyovwin 16; Luk uyovwin 24; Jọn uyovwin 20 vẹ 21; 1 Kọrẹnt 15:5, 6.

^ e?ko. 6 Wọ da guọnọ mrẹ aroẹmrẹ evo ri shekpahen Mesaya na ri Jesu rugba, ni ẹbẹre 14, ẹbẹre 15, vẹ ẹbẹre 16 rẹ ibroshọ nana, kugbe rọhẹ Eta rẹ Odjefiotọ 5 rẹ ọbe re se Die Yen Baibol na Se Yono Avwanre?