Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Baibol Na—Ovuẹ Vọ Yehẹ Evun Rọyen?

 ẸBẸRE 9

Ihwo rẹ Izrẹl Guọnọ Ovie

Ihwo rẹ Izrẹl Guọnọ Ovie

Sọl rọ dia ovie rẹsosuọ ro sun Izrẹl, nyupho ri Jihova-a. Devid da reyọ ẹdia rọyen, ọyen ohwo rẹ Ọghẹnẹ nene re ọphọ rẹ usuon ri bẹdẹ

SAMSIN vwo ghwu nu, Samuẹl da ga kerẹ ọmraro kugbe oguẹdjọ vwẹ Izrẹl. Ihwo rẹ Izrẹl ki kpokpo nẹ ayen guọnọ ovie kerẹ ẹgborho efa. Dede nẹ ivun miovwo Jihova kpahen oyare nana, ọ da vuẹ Samuẹl nẹ ọ kerhọ rayen. Ọghẹnẹ da jẹ ohwo ọvo rọ vwomakpotọ re se Sọl nẹ ọ dia ovie. Ọke vwọ yanran na, Ovie Sọl de rhi phuoma, o rhe nyẹme rẹ Ọghẹnẹ-ẹ. Jihova da siọn kerẹ ovie, ọ da vuẹ Samuẹl nẹ ọ vwẹ eghene re se Devid vwo mu. Dedena, ikpe buebun cha wanvrẹ tavwen Devid ki sun kerẹ ovie.

Devid vwọ hẹ emeghene, ọyen o vwo bru iniọvo rọyen ra re dia isodje ri Sọl. Isodje na eje djoshọ rẹ ọgbofovwin ọvo rọ dia ọvweghrẹn rayen re se Golayat, arhuanran yen o ruẹ, ọ vwẹ ayen vẹ Ọghẹnẹ rayen vwọ jehwẹ. Ivun de miovwo Devid, ọ da ta nẹ o che nene arhuanran na họnre. Devid da reyọ ọphiẹn rọyen vẹ ibi ukuta evo, o de bru ọvweghrẹn na ra kpo ohọnre, ohwo ro gron te kubit esan gbe esabọ. Ọke rẹ Golayat vwọ reyọ vwọ jehwẹ, Devid da kpahen kẹ nẹ ọyen vwo ẹgba vrẹ, kidie odẹ ri Jihova yen o vwo brora na! Ubi ukuta vuọvo yen Devid vwo hwe Golayat, ọ da vwẹ ọlọkọ rẹ arhuanran na vwo bru uyovwin rọyen no. Oshọ de mu isodje ri Filistia na ayen da djẹ.

Ẹsosuọ oma da vwerhen Sọl fikirẹ uduefiogbere ri Devid, ọ da reyọ vwo mu onotu rẹ isodje rọyen. Ẹkẹvuọvo, Sọl kọ rhe rioma kpahen ophikparobọ ri Devid. Fikirẹ oshọ rẹ ughwu, Devid da djẹ, vwẹ ikpe buebun o rhe vwo asan rọ dia-a. Dedena, Devid je fuevun kẹ Ovie Sọl, kidie Jihova Ọghẹnẹ yen reyerọ vwo mu ovie. Ukuotọ rọyen, Sọl de ghwu vwẹ ofovwin. O rhe kri-i, Devid kọ rhe dia ovie, kirobo ri Jihova veri.

“Ke me vwẹ uvie rọyen muotọ bẹdẹ.”​—2 Samuẹl 7:13

Ovie Devid vwo owenvwe rọvwọ bọn uwevwin ki Jihova. Ẹkẹvuọvo, Jihova da vuẹ nẹ ọmọ rọyen yen cha bọn uwevwin na. Ọmọ ri Devid re se Solomọn kọyen bọn uvwevwin na. Dedena, Ọghẹnẹ bruba kẹ Devid ro vwo nene re ọphọ nẹ: Uvie na che nẹ uvwiẹ rọye-en, a je cha mrẹ ọfa vwo dje-e. Ukuotọ rọyen, uvwiẹ rọyen kọyen Osivwin na yẹrẹ Ọmọ re veri vwẹ Idẹn na cha wan rhe. Ohwo yena yen cha dia Mesaya, ro mudiaphiyọ “Ọ ra Jẹreyọ na,” rẹ Ọghẹnẹ vwo mu. Jihova veri nẹ Mesaya na cha dia Osun rẹ usuon yẹrẹ Uvie rọyen rọ cha dia bẹdẹ.

Vwọrẹ omavwerhovwẹn, Devid de muegbe rẹ ekuakua buebun phiyotọ ra cha vwọ bọn uwevwin na. Ẹwẹn ọfuanfon na de ji muo vwo si ine buebun. Vwẹ oba rẹ akpeyeren rọyen, Devid da ta: “Erhi [ẹwẹn, NW] rẹ Ọrovwohwo wan oma mẹ ta ota, ota rọye hẹ ẹrẹvwe mẹ.”—2 Samuẹl 23:2.

​—E muro kpahen 1 Samuẹl; 2 Samuẹl; 1 Ikun Rivie; Aizaya 9:7; Matiu 21:9; Luk 1:32; Jọn 7:42.