Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 ẸBẸRE 13

Ivie ri Yovwirin vẹ E re Brare

Ivie ri Yovwirin vẹ E re Brare

A ghare Izrẹl. Vwẹ uvwre ọke yena, ivie buebun ri sun ihwo rẹ Izrẹl, fuevu-un. Ihwo ri Babilọn ghwọrọ Jerusalẹm

KIROBO ri Jihova tarọ jovwo, a da ghare Izrẹl ọke ri Solomọn vwọ yanjẹ ẹga rẹ uyota vwo nu. Ọmọ rọyen Rehoboam rọ reyọ ẹdia rẹ usuon na, ohwo rọ djoma. Ọtiọyena, uvwiẹ ihwe rẹ Izrẹl da sen usuon rọyen ayen da vwẹ uvie ọfa rọhẹ ẹbẹre obenu ọnre rẹ Izrẹl vwo mu. Uvwiẹ ivẹ ke yen fuevun dia otọ rẹ ovie rọhẹ ekete ri Devid vwẹ Jerusalẹm, rọ dia uvie rọhẹ obotọ ọnre ri Juda.

Ozighi vẹ ebẹnbẹn buebun vwomaphia vwẹ uvie ivẹ nana fikirẹ jẹ esegbuyota evwo vẹ jẹ ẹmenyo rẹ ivie na. Uvie rẹ Izrẹl kọyen ma bra nẹ uvie ri Juda, kidie ẹga rẹ efian yen ivie rọyen ghwe titi nẹ ọtonphiyọ rhe. Dede nẹ, Ilaija vẹ Ilaesha ru emu rẹ igbunu ride, tobọ rhọvwọn ihwo ri ghwuru, jẹ ihwo rẹ Izrẹl ji nene idjerhe ọbrabra. Ukuotọ rọyen, Ọghẹnẹ da vwẹ uphẹn kẹ ihwo rẹ Asiria nẹ e ghwọrọ uvie rọhẹ ẹbẹre obenu ọnre na.

Dedevwo nẹ, ọ vrẹ ikpe ujorin rẹ usuon ri Juda vwo krotọ nẹ ọ rẹ Izrẹl, Ọghẹnẹ je vwẹ oja re ayen. Ivie ri Juda re kerhọ kẹ orhọ-esio rẹ emraro Ọghẹnẹ ghwe bu-un, ayen vwọ davwẹngba rẹ ayen vwo sun ihwo rẹ ẹkuotọ na bru Jihova. Kerẹ udje, Ovie Josaya rhuẹrẹ uwevwin ri Jihova ọ da je guọghọ ẹga rẹ efian. Ọke ra vwọ mrẹ ọbe rẹ Urhi rẹ Ọghẹnẹ vwọ kẹ Mosis, o de te Josaya ẹwẹn mamọ, oruru rọyen da rhoma ganphiyọ kpahen orufon vẹ ẹrhomabọn rẹ uwevwin rẹ Ọghẹnẹ.

Ọ da ohwo mamọ nẹ, ohwo rọ reyọ ẹdia rẹ usuon ri Josaya yan nene omamọ rẹ udje rọye-en. Ọtiọyena, Jihova da vwẹ uphẹn kẹ ihwo ri Babilọn nẹ ayen phi Juda kparobọ je guọghọ Jerusalẹm vẹ uwevwin ẹga rọhẹ evun rọyen. E de mu ihwo ra ghwọrọ chekọ kpo Babilọn. Ọghẹnẹ tarọ jovwo nẹ ikpe 70 yen ayen cha dia Babilọn. Ohwo vuọvo dia Juda vwẹ uvwre rẹ ọke yena-a, tavwen ọke ra taphiyotọ ki rhi te rẹ ihwo ri Juda vwo rhivwin kpo Jerusalẹm.

Ẹkẹvuọvo, o rhe vwo ohwo ọvuọvo ro che sun vwẹ uvwiẹ ri Devid tavwen Osivwin re veri rọ dia Mesaya na ke rhe-e. Buebun rẹ ivie ri sun vwẹ ekete ri Devid vwẹ Jerusalẹm djerephia nẹ ihworakpọ ri jẹgba, muwan rẹ ayen vwo su-un. Mesaya na ọvo yen che muwan rovwo sun. Ọtiọyena, Jihova kọ vuẹ ovie ro sun kuko vwẹ ekete ri Devid nẹ: “Kpare erhu nẹ uyovwi. . . . Omogẹngẹn rọye che chekọ-ọ bẹsiẹ rẹ ọ ro vwo asan na cha vwọ rhe; ọye me cha vwọ kẹ.”—Izikiẹl 21:26, 27.

—E muro kpahen 1 Ivie; 2 Ivie; 2 Ikun Rivie uyovwin 10 re te 36; Jerimaya 25:8-11.