Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Amono Yin Ruẹ Ọhọre ri Jihova Nonẹna?

 UYONO 4

Diesorọ Avwanre Vwọ Fan New World Translation Na?

Diesorọ Avwanre Vwọ Fan New World Translation Na?

Congo (Kinshasa)

Rwanda

Odẹ rẹ Ọghẹnẹ vwẹ Une Rẹ Ejiro 69:31 vwevunrẹ ẹbẹre-ọbe rẹ isiesi ri Baibol awanre re se Symmachus, vwẹ ẹgbukpe 300 yẹrẹ 400 rẹ ọke ri Kristi

Vwẹ ikpe buebun re wanre, Iseri ri Jihova teyen efanfan ri Baibol efa phia, ghare ayen, je vwẹ ayen vwo ruiruo. Ẹkẹvuọvo, kẹ avwanre rhe mrẹvughe nẹ a guọnọ efanfan kpokpọ rọ sa chọn ihwo uko vwo vwo ẹruọ rẹ “erianriẹn rẹ uyota na” gbagba. Ọnana yen ọhọre Ọghẹnẹ vwọ kẹ ihwoeje. (1 Timoti 2:3, 4) Kọyen sorọ vwẹ ukpe ri 1950, avwanre de siobọnu ẹbẹre-ọvo rẹ New World Translation na ra vwẹ oyibo rẹ ọke nana vwo si. A fan Baibol nana vwo kpẹ ejajẹ re vrẹ 130 re.

A guọnọ Baibol ra sa fobọ vwo ẹruọ rọyen. Ejajẹ wene, ọtiọyena efanfan buebun vwo eta ri kpẹ awanre re, a fobọ vwo ẹruọ raye-en. Vwọba, a rhe mrẹ ikpirin ẹbe sansan rẹ isiesi ri Baibol awanre ri me fiotọ, re kẹrẹ erẹ ẹsosuọ, re nẹrhẹ a nabọ vwo ẹruọ rẹ ejajẹ ri Hibru, Aramik vẹ Grik re vwo si Baibol na.

A guọnọ efanfan rọ vwẹ Ota rẹ Ọghẹnẹ phia gbagba. Ukperẹ ayen vwo wene Ota rẹ Ọghẹnẹ, ofori nẹ ihwo re fan Baibol na fuevun fan. Ẹkẹvuọvo, e si oderhi rẹ Ọghẹnẹ, rọ dia Jihova, vwo nẹ efanfan buebun.

A guọnọ efanfan ro se titi Ohwo ro vwo Baibol na. (2 Samuẹl 23:2) Vwevunrẹ New World Translation, odẹ rẹ Ọghẹnẹ rọ dia Jihova na, e siro phiyọ asan ri te omarẹ 7,000 kirobo rọ hepha vwẹ isiesi ri Baibol awanre. Wọ sa mrẹ udje nana vwẹ uhoho rọhẹ obotọ na. (Une Rẹ Ejiro 83:18) Baibol nana vwerhan e se, ọ je nabọ dje ọhọre Ọghẹnẹ fiotọ, keridie ihwo re fanrọ na ghwọrọ ikpe buebun vwo ru ehiahiẹ. Owenẹ New World Translation na herọ vwẹ ejajẹ wẹn yẹrẹ ọ herọ-ọ, avwanre jiriro kẹ wẹ nẹ wo ji se Ota ri Jihova kẹdẹ kẹdẹ.Joshua 1:8; Une Rẹ Ejiro 1:2, 3.

  • Diesorọ avwanre vwo brorhiẹn nẹ a guọnọ efanfan kpokpọ ri Baibol na?

  • Ohwo da guọnọ riẹn ọhọre Ọghẹnẹ, die yen ofori nẹ o ru kẹdẹ kẹdẹ?