Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Ileta ro nẹ Obọ rẹ Ẹko Rọvwẹrote na Rhe

Ileta ro nẹ Obọ rẹ Ẹko Rọvwẹrote na Rhe

Iniọvo Eghanghanre:

Kerẹ idibo rẹ Jihova, avwanre vwo ẹguọnọ rẹ Ota rọyen, rọ dia Baibol na. Avwanre vwo imuẹro nẹ ikuegbe rọyen gbare dẹn, uchebro rehẹ evun rọyen vọnre vẹ erere, ọ je nẹrhẹ a riẹn nẹ Jihova ghini vwo ẹguọnọ rẹ ihworakpọ. (Une Rẹ Ejiro 119:105; Luk 1:3; 1 Jọn 4:19) Avwanre guọnọ vwẹ ukẹcha kẹ ihwo vwo yono erọnvwọn eghanghanre rehẹ Baibol na. Ọtiọyena, oma vwerhen avwanre re vwo siobọnu ọbe nana, “Obo Wo Se Yono Vwẹ Baibol Na.” Jẹ a ta omota kpahọn.

E muegbe rẹ ọbe nana fikirẹ imitete. Ẹkẹvuọvo, a je sa reyọ vwọ vwẹ ukẹcha kẹ imiragua re guọnọ yono kpahen Baibol na. Ọ vwọ dianẹ Baibol na ọyen ọbe re siri vwọ kẹ kohwo kohwo na, avwanre eje cha mrẹ erere nẹ iyono rehẹ evun rọyen, re sa nẹrhẹ avwanre vwo uvi rẹ omavwerhovwẹn.

Ọbe nana vọnre vẹ ikuegbe rẹ Baibol na, o gbikun rẹ akpeyeren rẹ ihworakpọ vwo nẹ ọke rẹ emama rhe. A nabọ davwẹngba vwo si ikuegbe na phephẹn, lọlọhọ, vwo nene oborẹ erọnvwọn phia wan kpahen ohwohwo.

Ẹkẹvuọvo, ọ ghwa dia ọbe rẹ ikuegbe ghevweghe-e. A nabo si eta vẹ ihoho rehẹ evun rọyen e se vwo vwo ẹruọ rẹ ikuegbe rẹ Baibol na kirobo re ghene hepha dẹn.

Ọbe nana cha chọn avwanre uko vwọ mrẹ nẹ Baibol na ọyen ọbe ro shekpahen ihworakpọ; ihwo ri nyupho rẹ Jihova vẹ i ri nyupho rọye-en. Ọ je cha vwẹ ukẹcha kẹ avwanre vwọ mrẹ erere vwo nẹ iruemu rayen. (Rom 15:4; 1 Kọrẹnt 10:6) A ghare ọbe nana phiyọ ẹbẹre 14. Ọdjẹkoko rẹ obo re che yono hẹ evunrẹ ọtonphiyọ rẹ ẹbẹre ọvuọvo.

 Wọ da dia ọmiọvwọn, wo se se uyono ọvo vwọ kẹ ọmọ wẹn, wọ me je vwẹ uhoho na vwo dje fiotọ kẹ. Ovwan de ru ọyena nu, ovwan se se ẹkpo rẹ Baibol re mu uyono na kpahen. Chọn ọmọ wẹn uko vwo churu obo ro seri vwẹ Baibol na vwo si oborẹ ovwan yonori vwẹ ọbe na. A sa je vwẹ ona nana vwo ruiruo siẹrẹ a da guọnọ vwẹ ukẹcha vwọ kẹ omiragua o vwo vwo ẹruọ rẹ ọdjẹkoko rẹ ovuẹ rẹ Baibol na.

Avwanre vwo imuẹro nẹ ọbe nana cha vwẹ ukẹcha kẹ ihwo ri vwo omamọ rẹ ẹwẹn, te imitete te imiragua, ayen vwo yono Ota rẹ Ọghẹnẹ je reyọ obo rehẹ evun rọyen vwo ruiruo vwẹ akpeyeren. Ukuotọ rọyen, ayen ke je sa vwomaba orua rẹ Ọghẹnẹ re reyọ ẹga vwọ kẹ.

Iniọvo ovwan,

Ẹko Rọvwẹrote Iruo rẹ Iseri rẹ Jihova