Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Iseri ri Jihova

Sane ejajẹ Urhobo

 UYOVWINROTA 47

Jihova Vwẹ Ukẹcha kẹ Ilaija

Jihova Vwẹ Ukẹcha kẹ Ilaija

Jẹzibẹl vwo nyo kpahen obo re phia kẹ emraro rẹ Baal na, ivun de miovwo mamọ. Ọ da vwẹ ovuẹ rhe Ilaija nẹ, ‘Odẹ ọchana, wo che ghwu kerẹ emraro rẹ Baal na.’ Oshọ de rhi mu Ilaija ọ da djẹ ro aghwa. Kọ nẹrhovwo: ‘Jihova, biko o teri. Ji mi ghwe ghwu.’ Kidie nẹ oma rhọrọ, ovwerhẹn de mu Ilaija vwẹ otọ rẹ urhe.

Amakashe ọvo da rhọnvwọn, ọ da vuẹ nẹ, ‘Vrẹn, wọ riemu.’ Ilaija da mrẹ ikara re rhorha kugbe ọtoto rẹ ame. Ọ da re ọ da da, ọ da rhoma vwerhẹn. Amakashe na da rhoma rhọnvwọn abọ rivẹ, ọ da vuẹ: ‘Riemu, wọ sa vwọ mrẹ ẹgba vwọ yan oyan wọ cha yan na.’ Ilaija da rhoma riemu. Ọ da yan ẹdẹ 40 vẹ ason 40, tavwen o ki te Ugbenu rẹ Horẹb. Etiyin, ọ da ro unu rẹ oragha ọvo rere o sherhẹn. Jihova da ta ota kẹ vwẹ etiyin. Ọ da ta: ‘Ilaija, die wo ruẹ vwẹ etinẹ?’ Ilaija da kpahen: ‘Ihwo rẹ Izrẹl na ru oborẹ ayen ve kẹ wẹ-ẹ. Ayen guọghọ agbada na ji hwe emraro wẹn. Asaọkiephana ayen je guọnọ hwe vwe.’

Jihova da vuẹ: ‘Yan phia, wo mudia enu rẹ ugbenu na.’ Ẹsosuọ, odju ọgangan de dju wan unu rẹ oragha na. Ọyena vwọ wan nu, otọ na de kpogho, erhanre da vwomaphia. Ukuotọ rọyen, Ilaija de nyo upho ọvo rọ pha bọrọ bọrọ. Ọ da reyọ ewun rọyen vwo rhurhu opharo, o de mudia otafe rẹ unu rẹ oragha na. Jihova da nọ oboresorọ ọ vwọ djẹ. Ilaija da kpahen: ‘Mẹvwẹ ọvo yen chekọ.’ Ẹkẹvuọvo Jihova da vuẹ: ‘Ọ dia owẹ ọvo yen chekọ-ọ. O ji vwo ihwo ri te 7,000 vwẹ Izrẹl re je ga vwẹ. Yanran, ra vwẹ Ilaesha mu ọmraro rọ cha reyọ ẹdia wẹn.’ Kpakpata, Ilaija de re ru oborẹ Jihova vuẹrẹ na. Wo rorori nẹ Jihova je sa chọn wẹ uko siẹrẹ wọ da guọnọ ruẹ obo rọ guọnọre nẹ wo ru? E, ọ cha chọn wẹ uko. E jẹ a mrẹ orọnvwọn ọvo rọ phiare vwẹ ọke rẹ osio vwo jẹrhọ yen.

“Wa ro ẹnwan rẹ emuọvo-o, ẹkẹvuọvo vwi kemu kemu orẹ kugbe oyare kugbe ẹkpẹvwẹ ta ọdavwẹ wẹn kẹ Ọghẹnẹ.”​—Filipae 4:6