Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYONO 49

E Gboja kẹ Orhare rẹ Aye Ovie

E Gboja kẹ Orhare rẹ Aye Ovie

Ọkieje yen Ovie Ehab vwọ wan ovakpo rọyen vwọ mrẹ ogba rẹ vain rẹ ọshare ọvo re se Nebọt. Ehab guọnọ ogba rẹ vain na, ọ da vuẹ Nebọt nẹ ọ shẹ kẹ ọyen. Ẹkẹvuọvo, Nebọt rhọnvwere-e kidie Urhi rẹ Jihova senre nẹ a shẹ uku rẹ ohwo. Ehab muọghọ kẹ orhiẹn rẹ Nebọt na? Ẹjo. Ivun de miovwo Ehab mamọ. Ivun miovwinro te ẹdia rẹ ọ rha rhọnvwe riemu yẹrẹ vrẹn nẹ uvun rọye-en.

Jẹzibẹl rọ dia aye rẹ Ehab, da vuẹ: ‘Wẹwẹ yen ovie rẹ Izrẹl. Wo se vwo kemu kemu wọ guọnọre ejobi. Me cha reyọ otọ na vwọ kẹ wẹ.’ Aye na de si ileta rhe ekpako rẹ orere na nẹ ayen gun efian nyẹ Nebọt nẹ ọ hanrhe Ọghẹnẹ, rere ayen phi Nebọt hwe. Ekpako na vwo ru oborẹ Jẹzibẹl vuẹ ayen nu, Jẹzibẹl da vuẹ Ehab: ‘Nebọt ghwure. Asaọkiephana, ogba rẹ vain na ọwẹn.’

Ọ dia Nebọt ọvo yen Jẹzibẹl hweri ekueku-u. O ji hwe ihwo efa buebun ri vwo ẹguọnọ rẹ Jihova. Ọgọẹdjọ yen o ruẹ, o ji ru erharhe erọnvwọn efa. Jihova mrẹ umwemwu na eje rẹ Jẹzibẹl ruẹ na. Die yen o che ru kpahọn?

Ehab vwo ghwu nu, ọmọ rọyen Joram da rhe dia ovie. Jihova de ji ọshare ọvo re se Jehu nẹ o gboja kẹ Jẹzibẹl vẹ orua rọyen.

Jehu da djẹ akpẹrẹ rọyen kpo Jẹzril ra mrẹ Jẹzibẹl. Joram da djẹ akpẹrẹ ra vwa Jehu vwẹ idjerhe ọ da nọ: ‘Ufuoma yen wọ ghwa rhe?’ Jehu da ta: ‘Ufuoma cha sa dia-a kidie oni wẹn, Jẹzibẹl, ruẹ erharhe erọnvwọn.’ Joram kọ guọnọ ku akpẹrẹ rọyen rhẹriẹ, ọ vwọ djẹ. Ẹkẹvuọvo, Jehu da vwẹ umurhabọ vwọ sa, o de ghwu.

Jehu da ro ọguan rẹ Jẹzibẹl. Aye  na vwọ nyo nẹ Jehu cha, o de si ẹro rọyen fia, ji ru ẹto fia, ọ da hẹrhẹ vwẹ asan ovakpo rẹ uwevwin rọyen. Jehu vwọ ro uwevwin na, Jẹzibẹl de yeren vwọrẹ aroeyivwo. Vẹ upho ọgangan, Jehu da vuẹ idibo rẹ Jẹzibẹl: “Do phihọ otọ.” Ayen de do Jẹzibẹl wan ovakpo na, o de she teyẹn otọ, o de ghwu.

Ọyena vwọ wan nu, Jehu de hwe emeshare rẹ Ehab ri te 70, o de ji si ẹga rẹ Baal nẹ ẹkuotọ na. Wọ mrẹrẹ nẹ Jihova riẹn erọnvwọn ejobi, o ji gboja kẹ ohwo ro ru umwemwu siẹrẹ ọke na de te?

“Uku ra vwẹ okpakpa ghare che se vwo ebruba vwo obọ-ọ.”​—Isẹ 20:21