Ẹgborho rẹ Izrẹl vwo ufuoma ọke rẹ Solomọn vwọ ga Jihova. Ẹkẹvuọvo, ọ da rhe rọvwọn eya buebun rẹ ẹkuotọ efa re ga edjọ. Ememerha na, Solomọn da je rhe ton edjọẹgọ phiyọ. Ivun de miovwo Jihova. Ọ da vuẹ Solomọn: ‘Me cha reyọ usuon na mie orua wẹn, je gharọ kpo ẹkẹn ivẹ. Me cha vwẹ ẹbẹre rọ ma rho vwọ kẹ ọvo usun rẹ idibo wẹn, orua wẹn mi rhe sun ẹbẹre rọ ma hanvwe.’

Jihova da rhoma ru orhiẹn rọyen na phẹn vwẹ idjerhe ọfa. Ọke rẹ odibo rẹ Solomọn re se Jeroboam vwọ hẹ idjerhe kpo asan, ọ da mrẹ ọmraro Ahijah. Ọmraro na da bẹrẹ ewun rọyen kpo ẹkẹn 12, ọ da vuẹ Jeroboam: ‘Jihova cha reyọ uvie rẹ Izrẹl mie orua rẹ Solomọn, kọ cha gharọ kpo ẹkẹn ivẹ. Tọrọ ẹkẹn ihwe rẹ ewun na kidie wẹ yen cha dia ovie rẹ uvwiẹ ihwe.’ Ovie Solomọn vwo nyo kpahen ọnana kọ guọnọ hwe Jeroboam! Jeroboam da djẹ kpo Ijipt. Ọke vwọ yanran na, Solomọn de ghwu, ọmọ rọyen re se Rehoboam da rhe dia ovie. Jeroboam de rhivwin kpo Izrẹl kidie Solomọn ghwure.

 Ekpako rẹ Izrẹl da vuẹ Rehoboam: ‘Wo de dje ẹguọnọ kẹ avwanre, avwanre ke fuevun kẹ wẹ.’ Ẹkẹvuọvo igbeyan rẹ Rehoboam re dia ighene da vuẹ: ‘Ofori nẹ wo sianro kẹ ihwo na! Jẹ ayen ruiruo ọgangan!’ Rehoboam de nene uchebro rẹ igbeyan rọyen na. Kọ djoma kuẹ ihwo na, uvwiẹ ihwe rẹ Izrẹl da vwọsuọ. Ayen da vwẹ Jeroboam mu ovie rẹ uvwiẹ ihwe na, ra rhe riẹn phiyọ uvie rẹ Izrẹl. Uvwiẹ ivẹ ri chekọ da rhe dia uvie rẹ Juda, ayen da vwomakpotọ kẹ Rehoboam. Uvwie 12 rẹ Izrẹl na da rhe ghare.

Jeroboam guọnọre nẹ ihwo rọyen kpo Jerusalẹm ra ga ẹga-a kidie ọyen orere rẹ Rehoboam suẹn. Wọ riẹn oboresorọ? Oshọ muo nẹ ihwo na sa rhoma ka ẹbẹre rẹ Rehoboam. Ọtiọyena ọ da vwẹ oro vwọ ma erhuẹn ivẹ, ọ da vuẹ ihwo na: ‘Jerusalẹm sheri nọ. Ovwan sa ga ẹga vwẹ etinẹ.’ Ihwo na ke vwẹ ẹga kẹ erhuẹn rẹ iro na, Jihova da chọrọ ayen ẹro.

“Ovwan vẹ ihwo ri Keferi gba-a. Didi okugbe ọvwata vẹ orukuruku vwori? . . . Eyẹ die otu ri segbuyota vẹ otu ri je segbuyota vwo kẹ oma?”​—2 Kọrẹnt 6:14, 15