Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYONO 43

Umwemwu rẹ Ovie Devid

Umwemwu rẹ Ovie Devid

Sọl vwo ghwu nu, Devid da rhe dia ovie ọke rọ vwọ hẹ ẹgbukpe 30. Ikpe evo vwọ wan nu, o de ru umwemwu ọgangan ọvo. Vwẹ ovwọnvwọn ọvo, ọ vwọ hẹ enu rẹ uwevwin rọyen, ọ da mrẹ aye ọvo ro vwo erhuvwu mamọ. Devid da rhe riẹn nẹ odẹ rọyen Batsheba, aye rẹ Yuraya, rọ dia ọvo usun rẹ isodje rọyen. Devid da tanẹ e se Batsheba rhe ọguan rọyen. Ọ vẹ aye na da vwerhẹn, aye na da rhe mrevun. Devid davwẹngba o vwo si obo ro ruru na nu. Ọ da vuẹ onotu rẹ isodje na nẹ o phi Yuraya phiyọ obaro rẹ ofovwin na rere ayen siomauko kẹ. Yuraya vwo ghwu vwẹ ofovwin yena nu, Devid da rọvwọn Batsheba.

Ẹkẹvuọvo, Jihova mrẹ erọnvwọn eje ro ruru na. Die yen Jihova che ru? O de ji ọmraro rọyen re se Natan bru Devid ra. Natan da ta: ‘Ọdafe ọvo vwo igegede buebun, ẹkẹvuọvo ovwiogbere ọvo de rhe vwo ogegede vuọvo ro vwo ẹguọnọ kpahen mamọ. Ọdafe na da reyọ ogegede vuọvo rẹ ovwiogbere na.’ Ophu de mu Devid, ọ da ta: ‘Ofori nẹ ọdafe yena ghwu!’ Natan da vuẹ Devid: ‘Wẹwẹ yen ọdafe yena!’ Ubiudu rẹ Devid da kuọrọn, ọ da vuẹ Natan: ‘Mi ru umwemwu vwọso Jihova.’ Umwemwu nana ghwa okpetu buebun rhe Devid vẹ orua rọyen. Jihova gboja kẹ Devid ẹkẹvuọvo o ghwuru-u kidie ọ vwomakpotọ, ọ je rhọnvwe oruchọ rọyen.

Devid guọnọ bọn uwevwin ẹga vwọ kẹ Jihova, ẹkẹvuọvo Jihova da tane ọmọ rẹ Devid re se Solomọn yen cha bọn uwevwin na.  Devid de muegbe rẹ erọnvwọn phiyotọ kẹ Solomọn, ọ da ta: ‘Ofori nẹ uwevwin rẹ Jihova na vwo erhuvwu mamọ. Ẹkẹvuọvo, Solomọn je ghwanre-e, mi che muegbe rẹ erọnvwọn eje phiyotọ.’ Devid de phi igho buebun phiyotọ vwọ kẹ iruo na. Ọ guọnọ ewena buebun phiyotọ. O koko iro vẹ idonọ efuanfon buebun, o de ji mu igedu buebun nẹ Taya vẹ Saidọn rhe. Ughwu rọyen vwo siẹkẹrẹ re, ọ da vwẹ isiesi rẹ obo ra cha bọn uwevwin na wan vwọ kẹ Solomọn. Ọ da ta: ‘Jihova yen tare nẹ mi si erọnvwọn nana phiyotọ kẹ wẹ. Jihova cha chọn wẹ uko. Wo jẹ oshọ mu we-e. Fiudugberi, rere wo ruiruo na.’

“Ohwo ro si ogbeku rọye nu che se yovwi-i, ẹkẹvuọvo ohwo rọ rhọvwerọ ro de siobọ nẹ ayen cha mrẹ arodọvwẹ.”​—Isẹ 28:13