Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYONO 24

Ayen Ru Oborẹ Ayen Veri-i

Ayen Ru Oborẹ Ayen Veri-i

Jihova da ta kẹ Mosis: ‘Yanrhe enu rẹ ugbenu na. Mi che si irhi mẹ phiyọ ephapha rẹ oragha kẹ wẹ.’ Mosis de yerin kpo enu rẹ ugbenu na, ọ da dia oboyin ẹdẹ 40 vẹ ason 40. Rọ vwọ hẹ oboyin, Jihova de si Irhi Ihwe na phiyọ ephapha rẹ oragha ivẹ, ọ da vwẹ ayen kẹ Mosis.

O rhi vwo te ọke ọvo, ihwo rẹ Izrẹl ki roro nẹ Mosis kpairoro vrẹ ayen re. Ayen da vuẹ Erọn: ‘Avwanre guọnọre nẹ ohwo ọfa dia osun rẹ avwanre. Ma ọghẹnẹ kẹ avwanre!’ Erọn da ta: ‘Ovwan kẹ vwẹ iro rẹ ovwan.’ O de duvwun iro na phiyọ ọmọ rẹ erhuẹn. Ihwo na da ta: ‘Ọmọ rẹ erhuẹn nana yen Ọghẹnẹ rẹ avwanre ro si avwanre nẹ otọ rẹ Ijipt!’ Kẹ ayen ga ọmọ rẹ erhuẹn rẹ oro na, ayen da je re orẹ kẹ. Oborẹ ayen ruru na chọre? E, kidie ayen veri jovwo nẹ Jihova ọvo yen ayen cha ga. Ẹkẹvuọvo, ayen rhe ru oborẹ ayen veri na-a.

Jihova vwọ mrẹ obo re phia, ọ da ta kẹ Mosis:  ‘Wontọ bru ihwo na ra, kidie ayen churhi mẹ, ayen ga ọghẹnẹ rẹ efian.’ Mosis de wontọ bru ihwo na ra, jẹ o muẹ ephapha rẹ oragha ivẹ na.

Ro vwo sikẹre asan rẹ ihwo na hepha, Mosis de nyo edo rẹ ihwo re so une. Ọ da mrẹ ayen ri gbeha je vwẹ ẹga kẹ ọmọ rẹ erhuẹn na. Ophu de mu Mosis mamọ. Ọ da vwẹ ephapha rẹ oragha ivẹ na fotọ guọghọ. Ọ da guọghọ ẹdjọ na ugege yena. Ọ da nọ Erọn: ‘Mavọ yen ihwo nana sa vwọ riẹriẹ owẹ vwo ru umwemwu rode nana?’ Erọn da ta: ‘Wo jẹ ophu mu we-e. Wọ riẹn oborẹ ihwo nana hepha. Ayen vuẹ vwẹ nẹ me ma ẹdjọ kẹ ayen, mi de phi iro rayen phiyọ erhanre, etiyin ọmọ rẹ erhuẹn nana de yoro phia!’ Mane Erọn re ru obo ro ruru na-a. Mosis de bru Jihova ra vwẹ enu rẹ ugbenu na ra rẹ nẹ o vwo ghovwo ihwo na.

Jihova vwo ghovwo ihwo re guọnọ nyupho rọyen. Wọ mrẹ obo rọ ghanre te ihwo rẹ Izrẹl vwo nene odjekẹ rẹ Mosis?

“Wo de ve ive kẹ Ọghẹnẹ, wo gbe eghẹrẹ wọ ke hwa-a; kidie o vwo omavwerhe kpahe ẹkpa-a. Hwa osa rẹ emu wo veri.”​—Aghwoghwo 5:4