Aizik rọvwọn Rebeka ọke rọ vwọ hẹ ẹgbukpe 40. O vwo ẹguọnọ rọyen mamọ. Ọke vwọ yanran na, ayen de vwiẹ ejimẹ, emeshare ivẹ.

Isọ yen ọkpako, Jekọp ke rha hẹ ọrotete. Isọ dia uwevwi-in, o kpo ibefi ọkieje. Ẹkẹvuọvo, Jekọp dia uwevwin ọkieje.

Vwẹ ọke awanre, ọmọshare ọkpako yen a vwẹ etọ vẹ igho rẹ orua na vwọ kẹ siẹrẹ ọsẹ na de ghwu. E se ọnana uku. Vwẹ orua rẹ Aizik, ive rẹ Jihova ve kẹ Ebraham na, ọyen ọvo usun rẹ uku ra cha ghare kẹ ọmọkpako na. Isọ ni ive nana fiemu-u, ẹkẹvuọvo Jekọp niro ghanghanre.

Ẹdẹ ọvo, oma ghwọrọ Isọ mamọ ọke ro vwo nẹ ibefi te uwevwin. O de nyo ọrhen rẹ emu ọvwevwerhen rẹ Jekọp chere, ọ da ta: ‘Owẹnvwe hwe vwe gangan! Biko kẹ vwẹ emu!’ Jekọp da ta: ‘Me cha kẹ wẹ, ẹkẹvuọvo, ve kẹ vwẹ nẹ mẹvwẹ yen cha riuku ro fori nẹ a vwọ kẹ wẹ na.’ Isọ da ta: ‘Die yen te vwe te uku na! Biko reyọ. Kẹ vwe emu.’ Ọyena omamọ orhiẹn yen Isọ bruru na? Ẹjo, kakaka. Isọ kpare ughwẹ ọghanghanre yena kufia fikirẹ emu ghevweghe.

Aizik ghwore, o te ọke rọ vwọ nẹrhovwo kẹ ọmọkpako rọyen re. Ẹkẹvuọvo, Rebeka da vwẹ ukẹcha kẹ Jekọp rere ẹrhovwo na brora dede nẹ ọyehẹ ọrotete. Isọ vwọ riẹn  obo re phiare na, ophu de muo mamọ ọ da tanẹ ọyen che hwe Jekọp. Aizik vẹ Rebeka guọnọre nẹ emu vuọvo te Jekọp oma-a, ọtiọyena ayen da vuẹ: ‘Yanran re nene Laban, oniọvo oni wẹn dia, bẹsiẹ ophu rẹ Isọ na vwo kpotọ.’ Jekọp kerhọ rẹ uchebro rẹ ọsẹ vẹ oni rọyen, ọ da djẹ.

“Didi erere ri te ohwo, ro de vwo akpọ na ejobi ro de ku arhọ rọye fia? Gbenẹ kidie ohwo se vwo wene arhọ rọye?”​—Mak 8:36, 37