Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Iseri ri Jihova

Sane ejajẹ Urhobo

 UYOVWINROTA 3

Adam vẹ Ivi Churhi rẹ Ọghẹnẹ

Adam vẹ Ivi Churhi rẹ Ọghẹnẹ

Ẹdẹ ọvo, ọrọdekọ ọvo da ta ota kẹ Ivi, jẹ Adam hẹ etiyi-in. Ọ da ta: ‘Ghini uyota nẹ Ọghẹnẹ rhọnvwere nẹ ovwan re emamọ rẹ irhe na eje rehẹ ogba na-a?’ Ivi da ta: ‘Avwanre sa re emamọ rẹ irhe na eje, ọvuọvo yen nuro. Avwanre da re omamọ rẹ urhe yena, avwanre che ghwu.’ Ọrọdekọ na da ta: ‘Ovwan che ghwu-u. Ovwan da riọ, ovwan ke cha họhọ Ọghẹnẹ.’ Ọyena uyota? Ẹjo, ọyena ofian. Ẹkẹvuọvo, Ivi vwo imuẹro kpahọn. Ivi vwọ tẹnrovi omamọ, urhuru rọyen de sio. Ọ da re omamọ na, ọ da je kẹ Adam. Adam riẹnre nẹ ayen che ghwu ayen da churhi rẹ Ọghẹnẹ. Dedena, ọ re omamọ na ghene.

Vwẹ ovwọnvwọn rẹ ẹdẹ yena, Jihova da ta ota kẹ Adam vẹ Ivi. Ọ da nọ ayen oboresorọ ayen vwọ churhi rọyen. Ivi gunro nyẹ ọrọdekọ na, Adam de rhe guon nyẹ Ivi. Jihova da djẹ Adam vẹ Ivi nẹ ogba na kidie ayen churhi rọyen. O de phi emekashe vẹ ọlọkọ rẹ erhanre phiyọ anurhoro rẹ ogba na rere ayen vwo jẹ ogba na ẹruọ.

Jihova da tanẹ ohwo ro gun efian kẹ Ivi na je cha rioja. Ọ diẹ ọrọdekọ na yen ghene ta ota kẹ Ivi-i. Jihova ma eredekọ e vwọ ta ota-a. Amakashe ọbrabra ọvo yen nẹrhẹ ọrọdekọ na ta ota. O ruro ọ vwọ phiẹn Ivi. Amakashe yena yen e se Eshu rọ dia Idẹbono na. Vwẹ obaro na, Jihova cha ghwọrọ Eshu, ọ rha cha sa phiẹn ihwo vwo ru erọnvwọn ebrabra-a.

“Idẹbono . . . ozighẹ o ruẹ nẹ otọrhe, kaka uyota rhere-e, fikiridie uyota na hẹ evun rọye-e.”​—Jọn 8:44