Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Iseri ri Jihova

Sane ejajẹ Urhobo

 UYOVWINROTA 99

Ọlọkpa rẹ Uwodi Ọvo Kurhẹriẹ

Ọlọkpa rẹ Uwodi Ọvo Kurhẹriẹ

Vwevunrẹ Filipae, o vwo ọmọtẹ ọvo rẹ ẹwẹn rẹ Idẹbono hẹ oma rọyen, ọmọtẹ na ọviẹn. Ẹwẹn rẹ Idẹbono na muo vwọ mraro, aroẹmrẹ na kọ nẹrhẹ inini rọyen mrẹ igho buebun. Pọl vẹ Sailas vwo kpo Filipae, ọmọtẹ na de nene ayen ẹdẹ buebun. Ẹwẹn rẹ Idẹbono na kọ nẹrhẹ ọmọtẹ na kperẹ: “Eshare nana hẹ idibo rẹ Ọghẹnẹ ro me kpenu na.” Pọl da vuẹ ẹwẹn rẹ Idẹbono na: ‘Vwẹ odẹ rẹ Jesu Kristi, vrẹn nẹ oma rọyen!’ Ẹwẹn rẹ Idẹbono na de vrẹn nẹ oma rẹ ọmọtẹ na.

Ọke rẹ inini rẹ ọmọtẹ na vwọ mrẹvughe nẹ ayen rha cha sa mrẹ igho-o, ivun de miovwo ayen gangan. Ayen de kpono Pọl vẹ Sailas bru iguẹdjọ na ra, ayen da ta: ‘Eshare nana yọnrọn urhi-i, ayen ji kpokpo orere rẹ avwanre!’ Iguẹdjọ na da tanẹ e hwe Pọl vẹ Sailas, e ji mu ayen phiyọ uwodi. Ọlọkpa rẹ uwodi na da vwẹ igoni kanre abọ vẹ awọ rayen, o de do ayen phiyọ asan ro me mu ebri vwẹ uwodi na.

Pọl vẹ Sailas ke suine kẹ Jihova, jẹ ihwo efa rehẹ uwodi na kerhọ. Siẹvuọvo na, otọ de mu kpogho vwẹ uherevie rẹ ason, o de kpogho uwodi na gangan. Ẹchẹ rẹ uwodi na de rhiephiyọ, igoni ra vwọ kanre ihwo rehẹ uwodi na da kpare she. Ọlọkpa na vwọ mrẹ nẹ ẹchẹ rẹ uwodi na rhiephiyọ, ko rorori nẹ ihwo rehẹ uwodi na djẹ vabọ re, ọtiọyena o de yoro ọlọkọ rọyen rere o vwo hwe oma rọyen.

Ugege yena, Pọl de bunu: ‘Wo hwe oma wẹ-ẹn! Avwanre hẹ etinẹ!’ Ọlọkpa na de shiguẹ vwẹ obaro rẹ Pọl vẹ Sailas. Ọ da nọ ayen: “Kidie mi ru me vwọ rhọ?” Ayen da ta kẹ: ‘Wẹ vẹ evwruwevwin wẹn se Jesu gbuyota.’ Pọl vẹ Sailas de yono ayen ota rẹ Jihova, ọlọkpa na vẹ evwruwevwin rọyen eje de bromaphiyame.

“A cha shabọ họ ovwan ayen mi mu ovwan, sun ovwan kpo Sinegọg vẹ uwodi, ka reyọ ovwan kpo obaro rẹ ivie kugbe isun fikirẹ odẹ mẹ. Ọnana kọ cha dia ọke rẹ ovwan che vwo se iseri.”​—Luk 21:12, 13