Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Obo Wo Se Yono Vwẹ Baibol Na

 UYOVWINROTA 87

Emu Ovwọnvwọn rẹ Jesu

Emu Ovwọnvwọn rẹ Jesu

Ihwo rẹ Ju na ruẹ orẹ rẹ Ọwanvrẹn na vwẹ ẹdẹ 14 rẹ emeranvwe rẹ Nisan kukpe kukpe. Ọnana nẹrhẹ ayen karophiyọ oborẹ Jihova sivwin ayen nẹ eviẹn vwẹ Ijipt, ọ da vwẹ ayen rhe Otọ rẹ Ive na. Vwẹ ukpe rẹ 33 C.E., Jesu vẹ idibo rọyen de ru orẹ rẹ Ọwanvrẹn na vwẹ uwevwin ọvo rọhẹ Jerusalẹm. Ayen vwo ru orẹ na nu, Jesu da ta: ‘Ọvo usun rẹ ovwan na cha shẹ vwẹ.’ O de gbe iyinkọn na unu, ayen da nọ Jesu: ‘Ono?’ Jesu da ta: ‘Ohwo re me cha vwẹ ikara nana vwọ kẹ na.’ Jesu da vwẹ ikara na vwọ kẹ Judas Iskariọt. Ugege yena, Judas de vrẹn jẹ ayen vwo.

Jesu da nẹrhovwo, o de bru ikara na ibribro, ọ da vwọ kẹ iyinkọn ichekọ na. Ọ da ta: ‘Re ikara nana. O mudiaphiyọ ugboma mẹ re me cha vwọkpahotọ kẹ ovwan.’ Ọ da je nẹrhovwo phiyọ udi na ọ da reyọ vwọ kẹ iyinkọn na. Ọ da ta: ‘Ovwan da udi nana. O mudiaphiyọ ọbara mẹ re me cha vwọkpahotọ rere ovwan vwọ mrẹ evwoghovwo rẹ imwemwu. Mi ve kẹ ovwan nẹ ovwan vẹ ovwẹ cha dia ivie vwẹ odjuvwu. Ru ọnana kukpe kukpe vwọ karophiyọ ovwẹ.’ Idibo rẹ Jesu ji ruẹ ẹkarophiyọ nana kukpe kukpe. Ayen sere Emu Ovwọnvwọn rẹ Ọrovwori na.

 Ayen vwo riemu na nu, iyinkọn na ke phraphro kpahen ohwo rọ ma rho vwẹ usunrayen. Jesu da vuẹ ayen: ‘Ohwo ro ni oma rọyen hanhanvwe vwẹ uvwre rẹ ovwan na ọyen ohwo rọ ma rho kparobọ.

‘Ovwan igbeyan mẹ. Me vuẹ ovwan kemu kemu rẹ Ọsẹ mẹ guọnọre nẹ me vuẹ ovwan. Ọmọke krẹn, mi che bru Ọsẹ mẹ ra vwẹ odjuvwu. Me cha yanjẹ ovwan vwo, ihwo ke cha riẹn nẹ ovwan idibo mẹ fikirẹ ẹguọnọ rẹ ovwan vwo kẹ ohwohwo. Ovwan vwo ẹguọnọ rẹ ohwohwo kirobo mi vwo ẹguọnọ rẹ ovwan.’

Ukuotọ rọyen, Jesu da nẹrhovwo nẹ Jihova sẹro rẹ iyinkọn rọyen ejobi. O je yare nẹ e jẹ Jihova chọn ayen uko vwọ wiankugbe vwọrẹ ufuoma. Ọ je rẹ nẹ e ru odẹ rẹ Jihova fon. Jesu vẹ iyinkọn na da suine ujiri kẹ Jihova ayen da ro otafe. Ọke re che vwo mu Jesu siẹkẹrẹ re.

“Wa djẹ oshọ-ọ, imigegede mẹ, kidie evun esiri rẹ Ọsẹ na rọ vwọ vwẹ uvie na kẹ ovwan.”​—Luk 12:32