Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYONO 77

Jesu Ta Ota kẹ Aye Ọvo Vwẹ Orhare

Jesu Ta Ota kẹ Aye Ọvo Vwẹ Orhare

Orẹ rẹ Ọwanvrẹ na vwọ wan nu, Jesu vẹ idibo rọyen da wan Sameria ayen vwo kpo Galili. Ayen da domaji vwẹ asan re se orhare rẹ Jekọp, rọ kẹrẹ orere rẹ Saka. Ọke rẹ Jesu vwo rovwonma vwẹ etiyin, idibo na da ro orere na ra guọnọ emu dẹ.

Aye ọvo de rhi vo ame vwẹ etiyin. Jesu da ta kẹ: “Kẹ vwẹ ame da.” Aye na da ta: ‘Diesorọ wọ vwọ ta ota kẹ vwẹ? Mẹvwẹ ohwo rẹ Sameria. Ihwo rẹ Ju ta ota kẹ ihwo rẹ Sameria-a.’ Jesu da vuẹ: ‘Wọ da riẹn oka rẹ ohwo me hepha, wọ cha nokpẹn rẹ ame mie vwe, ke me kẹ wẹ ame rẹ arhọ.’ Aye na da nọ: ‘Die yen ota wẹn na mudiaphiyọ? Wọ tobọ vwo ikoroba-a.’ Jesu da ta: ‘Kohwo kohwo rọ da ame ri mi vwori na, urhuru rẹ ame rhe che hwe ọfa-a.’ Aye na da ta: “Ọga, kẹ vwẹ ame nana.”

Jesu da vuẹ: ‘Re se ọshare wẹn rhe.’ Aye na da ta: ‘Mi vwo ọshare-e.’ Jesu da ta: ‘Uyota wọ tare. Abọ iyorin yen wọ rọvwọnre, ọshare wo nene dia asaọkiephana diẹ ọshare wẹ-ẹn.’ Aye na da ta: ‘Me rhe mrẹvughe nẹ wẹwẹ ọmraro. Ihwo mẹ vwo imuẹro nẹ avwanre sa ga Ọghẹnẹ vwẹ enu rẹ ugbenu nana, ẹkẹvuọvo ihwo rẹ Ju tare nẹ Jerusalẹm ọvo yen a da sa ga Ọghẹnẹ. Mi vwo imuẹro nẹ Mesaya na da rhe, o che yono avwanre obo ra ga ẹga wan.’ Etiyin Jesu da vuẹ ota rọ je vuẹ ohwo ọfa dẹvo-o: ‘Mẹvwẹ yen Mesaya na.’

Aye na de brokpakpa kpo orere rọyen na, ọ da ra vuẹ  ihwo rẹ Sameria na nẹ, ‘Ọ họhọre nẹ me mrẹ Mesaya na re. Ọ riẹn ikuegbe rẹ akpọ mẹ eje. Ovwan yanrhe!’ Ayen de nene kpo orhare na, ayen da kerhọ kẹ uyono rẹ Jesu.

Ihwo rẹ Sameria na da vuẹ Jesu nẹ ọ rhe dia orere rayen. Jesu dia etiyin ẹdẹ ivẹ, o de yono ayen, ihwo buebun de vwo esegbuyota kpahọn. Ayen da vuẹ aye na: ‘Avwanre vwọ kerhọ kẹ ọshare nana nure na, avwanre rhe riẹnre nẹ ọyen yen osivwin rẹ akpọ na.’

“Yanrhe. E jẹn ohwo rẹ urhuru rẹ ame hwe yanrhe, e jẹn ohworọ guọnọre da amerẹ arhọ na ọphẹ.”​—Ẹvwọphia 22:17