Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYONO 86

Jesu Rhọvwọn Lazarọs Nushi

Jesu Rhọvwọn Lazarọs Nushi

Lazarọs vẹ iniọvo rọyen Meri vẹ Mata dia Betani. Ayen ihwo erha na igbeyan rẹ Jesu. Ẹdẹ ọvo, Jesu vwọ hẹ ẹbẹre ochekọ rẹ Jọdan, Meri vẹ Mata da vwẹ ovuẹ rhe nẹ, ‘Lazarọs muọga. Biko yanrhe kpakpata!’ Ẹkẹvuọvo, Jesu fobọ yanra-an. Ọ hẹrhẹ ẹdẹ ivẹ tavwen ọ ke vuẹ idibo rọyen nẹ, ‘E jẹ e kpo Betani. Lazarọs vwerhẹn, me ra rhọvwọn.’ Iyinkọn na da ta: ‘Lazarọs da vwerhẹn, kọyen oma rọyen na cha fobọ gan.’ Jesu da vuẹ ayen phephẹn: ‘Lazarọs ghwure.’

Jesu vwo te Betani jẹ e shi Lazarọs ẹdẹ ẹne re. Ihwo buebun yanrhe rhi bru Meri vẹ Mata uche. Mata vwo nyo nẹ Jesu rhire, ọ da djẹ brora. Ọ da ta: “Ọrovwohwo, ọ dianẹ wọ hẹ etinẹ nọ, oniọvo mẹ na e ghwu-u.” Jesu da ta kẹ: ‘Oniọvo wẹn cha rhoma vrẹn. Wo vwo imuẹro rẹ ọnana, Mata?’ Ọ da ta: ‘Me riẹnre nẹ ọ cha rhoma vrẹn vwẹ ọke rẹ evrẹnushi na.’ Jesu da vuẹ: “Mẹvwẹ hẹ evrẹnushi na kugbe arhọ na.”

Mata da ra vuẹ Meri nẹ, ‘Jesu rhire.’ Meri da djẹ bru Jesu rhe, ihwo na de ji nene. O de shiguẹ vwẹ obaro rọyen, kọ viẹ mamọ. Ọ da ta: ‘Ọrovwohwo, ọ da dianẹ wẹ hẹ etinẹ jovwo, oniọvo avwanre rhe ghwu-u!’ Jesu vwọ mrẹ obo rọ da Meri te, ọ da je viẹ. Ihwo na vwọ mrẹ Jesu rọ viẹ ayen da ta: ‘Ni oborẹ Jesu vwo ẹguọnọ rẹ Lazarọs te.’ Ẹkẹvuọvo, evo ki roro: ‘Diesorọ o rhe sivwin ugbeyan rọye-en?’ Die yen Jesu che ru enẹna?

Jesu de kpo asan re shiro phiyọ na, a vwẹ oragha orhuarho vwo rhurhu unu na. Ọ da ta: ‘Ovwan ghorie oragha na no.’ Mata da ta: ‘O te ẹdẹ ẹne re! Oma rọyen gbon re.’ Dedena, ayen de mu oragha na no, Jesu da nẹrhovwo: ‘Ọsẹ, me kpẹvwẹ owẹ wo vwo nyo vwe. Me riẹnre nẹ ọkieje wo vwo nyo vwe, ẹkẹvuọvo me ta eta nana rere ihwo nana eje vwọ riẹn nẹ wẹwẹ yen ji vwe rhe.’ Jesu de kperi vẹ upho ọgangan:  “Lazarọs, yanrhe.” Igbevwunu ọvo da rhe phia: Lazarọs da yan nẹ ushi na rhe, vẹ emwa ra vwọ pharọ. Jesu da ta: “Rhan, rere e jo kpo.”

Ihwo buebun re mrẹ obo re phiare na de vwo esegbuyota kpahen Jesu. Ẹkẹvuọvo evo da ra vuẹ ihwo rẹ Farisi na. Nẹ ọke yena yanran, ihwo rẹ Farisi ke guọnọ oborẹ ayen vwo hwe Lazarọs kugbe Jesu. Ọvo usun rẹ iyinkọn 12 na re se Judas Iskariọt, da bẹbẹ bru ihwo rẹ Farisi na ra, ọ da nọ ayen: ‘Bro igho ovwan cha kẹ vwẹ siẹrẹ me da dje Jesu kẹ ovwan?’ Ayen da tanẹ idọnọ ọfuanfon 30, Judas kọ guọnọ obo ro se vwo phi Jesu phiyọ obọ rẹ ihwo rẹ Farisi na.

“Ọghẹnẹ rẹ avwanre ọye Ọghẹnẹ rẹ esivwo; Ọghẹnẹ Ọrovwohwo na, ọye abọẹva rẹ ughwu rheri.”​—Une Rẹ Ejiro 68:20