Jesu vwo ghwoghwo vwẹ omarẹ ẹgbukpe ọvo gbẹ ubro nu, o de hirharoku orhiẹn ọghanghanre ọvo. Amono yen ọ cha sane ri che nene wian kugbe? Amono yen o che yono rere ayen sa vwọ vwẹrote ukoko rẹ Inenikristi na? Ro se vwo brorhiẹn nana, Jesu guọnọ ukẹcha rẹ Jihova. Ọtiọyena, o de kpo ugbenu ọvo, ọ da nẹrhovwo vwẹ ọsoso ason na eje. Ọke vwo rhie, Jesu de se idibo rọyen evo, ọ da sane iyinkọn 12 na. Ọvo yen wọ karophiyọ odẹ rọyen? Edẹ rayen yen Pita, Andru, Jems, Jọn, Filip, Batalomiu, Tọmọs, Matiu, Jems ọmọ rẹ Alfiọs, Tadiọs, Saimọn, kugbe Judas Iskariọt.

Andru, Pita, Filip, Jems

Eshare Ihwivẹ nana ki che nene kpo kasan kasan. O vwo yono ayen nu, o de ji ayen kpo iruo aghwoghwo na. Jihova kẹ ayen ẹgba ayen vwọ djẹ ẹwẹn rẹ Idẹbono nẹ oma rẹ ihwo, ayen mi ji sivwin ihwo re muọga.

Jọn, Matiu, Batalomiu, Tọmọs

Jesu se ayen igbeyan rọyen, ọ je vwẹroso ayen. Ihwo rẹ Farisi na niro nẹ iyinkọn na, ihwo ghevweghe ri kpo  isikuru-u. Ẹkẹvuọvo, Jesu nabọ yono ayen vwọ kẹ owian na. Ayen che bicha Jesu vwẹ ọke oghẹresan rẹ akpeyeren rọyen, kerẹ, tavwen e ki hwe vẹ ọke ra da rhọnvwọn nushi nu. Kerẹ Jesu, buebun rẹ iyinkọn ihwivẹ na nẹ Galili rhe. Evo rayen rọvwọnre.

Jems ọmọ rẹ Alfiọs, Judas Iskariọt, Tadiọs, Saimọn

Iyinkọn na, ihwo ri jẹgba ri ji ruẹchọ. Ọkiọvo ayen roro tavwen ayen ke ta ota-a, ayen ji brẹ orharhe orhiẹn. Ayen je vwo odirin ọkiọvo-o. Ayen tobọ je phraphro kpahen ohwo rọ ma rho vwẹ uvwre rayen. Ẹkẹvuọvo, ayen emamọ ihwo ri vwo ẹguọnọ rẹ Jihova. Ayen yen cha vwẹrote ukoko rẹ Inenikristi na siẹrẹ Jesu de rhivwin kpo odjuvwu nu.

“Mi se ovwan igbeyan, kidie obo ri mi nyo mie Ọsẹ mẹ ejobi me vwẹ ayen phia kẹ ovwan.”​—Jọn 15:15