Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYONO 72

Jesu Vwọ hẹ Ẹgbukpe Ihwivẹ

Jesu Vwọ hẹ Ẹgbukpe Ihwivẹ

Josẹf vẹ Meri, kugbe Jesu vẹ emọ rayen ri chekọ dia Nazarẹt. Josẹf ọyen ọkarirhe; iruo nana yen ọ vwọ ghẹrẹ orua rọyen, o ji yono ayen kpahen Jihova vẹ Urhi rọyen. Orua na kpo uwevwin ẹga na ọkeneje, ayen ji kpo Jerusalẹm re ru orẹ rẹ Ọwanvrẹn na kukpe kukpe.

Jesu vwọ hẹ ẹgbukpe 12, orua rọyen da kpo Jerusalẹm kirobo rẹ ayen ruẹ jovwo. Orere na vọnre vẹ ihwo sansan re rhe orẹ rẹ Ọwanvrẹn na. Orẹ na vwo re nu, Josẹf vẹ Meri de roro nẹ Jesu hẹ ohri rayen, ayen vwọ hẹ idjerhe kpo. Ẹkẹvuọvo, ayen vwọ guọnọ vwẹ uvwre rẹ ihwo rayen, ayen rha mrẹ-ẹ.

Josẹf vẹ Meri de rhivwin kpo Jerusalẹm, ayen da guọnọ Jesu ẹdẹ erha soso. Ukuotọ rọyen, ayen da mrẹ vwẹ uwevwin ẹga na. Jesu chidia vwẹ ohri rẹ iyono na, rọ vwọ kerhọ kẹ ayen je nọ ayen emamọ enọ. O gbe iyono na unu mamọ te  ẹdia rẹ ayen ke je nọ Jesu enọ. Ẹkpahọnphiyọ rọyen gbe ayen unu dẹn. Ayen mrẹvughe nẹ Jesu nabọ vwo ẹruọ rẹ Urhi rẹ Jihova.

Oshọ mu Josẹf vẹ Meri mamọ. Meri da ta: ‘Ọmọ mẹ, avwanre guọnọ owẹ bẹn! Tivọ wọ hepha jovwo?’ Jesu da ta: ‘Wọ rha riẹn nẹ ofori nẹ me dia uwevwin rẹ Ọsẹ mẹ?’

Jesu de nene ọsẹ vẹ oni rọyen rhivwin kpo Nazarẹt. Josẹf yono Jesu iruo ra vwọ karirhe na. Oka rẹ ohwo vọ yen wo rorori nẹ Jesu hepha kerẹ eghene? Rọ vwọ ghwanra na, jẹ aghwanre rọyen rhuaphiyọ, oma rọyen kọ vwerhẹn Ọghẹnẹ vẹ ihworakpọ.

“Me vwo omavwerhe ru ọhọre wẹn, E Ọghẹnẹ mẹ; urhi wẹn ọ hẹ evun rẹ udu mẹ.”​—Une Rẹ Ejiro 40:8