Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Obo Wo Se Yono Vwẹ Baibol Na

 UYOVWINROTA 61

Ayen Rhọnvwe Vwẹ Uyovwin Kpotọ-ọ

Ayen Rhọnvwe Vwẹ Uyovwin Kpotọ-ọ

Ọmọke vwọ wanvrẹ ọke rẹ Ovie Nẹbukadreza vwọ vwerhẹn evwerhẹn kpahen oma rode na nu, ọ da rhe vwẹ oro vwọ ma oma rode ọvo. O de muo phiyọ uphẹphẹ rẹ Dura. O de se ihwo ride rẹ otọ na ji te Shadrak, Meshak vẹ Abẹdnigo nẹ ayen mudia obaro rẹ oma na. Ovie na da ta: ‘Ovwan de nyo edo rẹ owanre, isorogun, kugbe akpata na, ovwan me vwẹ uyovwin kpotọ kẹ oma na! Kohwo kohwo rọ rhọnvwe ga oma na-a, e che do phiyọ ogidi erhanre.’ Emeshare rẹ Hibru erha na cha ga oma na gbanẹ ayen cha ga Jihova ọvo?

Ovie na da tanẹ e hworo uhworo na. Ihwo na ejobi de she bọvwọn opharo rhuotọ, ayen da ga oma na, Shadrak, Meshak vẹ Abẹdnigo ọvo yen nuro. Eshare evo de noso nẹ ayen ga oma na-a, ayen da ra vuẹ ovie na: ‘Emeshare rẹ Hibru erha na rhọnvwe ga oma wẹn na-a.’ Nẹbukadreza de se ayen, ọ da vuẹ ayen: ‘Me cha rhoma kẹ ovwan uphẹn ọfa rẹ ovwan vwọ ga oma na. Ovwan rhe ruo-o, ki mi che do ovwan phiyọ ogidi erhanre na. O vwo ọghẹnẹ vuọvo ro se sivwin ovwan nẹ abọ mẹ-ẹ.’ Ayen da kpahen kẹ: ‘Avwanre guọnọ uphẹn ọfa-a. Ọghẹnẹ avwanre se sivwin avwanre. Ẹkẹvuọvo, ọ rha tobọ sivwin avwanre-e, avwanre cha ga oma wẹn na-a.’

Ivun de miovwo Nẹbukadreza mamọ. Ọ da vuẹ isodje rọyen: ‘Ovwan ru erhanre na rere ọ gan vrẹ obo ri jovwo asakuighwrẹn!’ Ọ da je vuẹ isodje na:  ‘Gba eshare na, ovwan do ayen phiyọ erhanre na!’ Erhanre na ganre mamọ te ẹdia rẹ isodje na vwo sikẹrẹ erhanre na, ayen de ghwu ugege na. Emeshare rẹ Hibru na de she teyen evunrẹ erhanre na. Ẹkẹvuọvo, Nẹbukadreza vwo ni evunrẹ erhanre na, ọ da mrẹ eshare ẹne re yan vwẹ evun rọyen ukperẹ eshare erha. Oshọ de muo, ọ da nọ ihwo rọyen ri mudia kẹrẹ: ‘Ọ diẹ eshare erha yen avwanre do phiyọ erhanre na? Ihwo ẹne yen me mrẹ na, ọvo tobọ họhọ amakashe!’

Nẹbukadreza de sikẹrẹ erhanre na, o de kperi: ‘Ovwan yanphia, idibo rẹ Ọghẹnẹ ro Me Kpenu na!’ O de gbe ihwo eje unu ayen vwọ mrẹ Shadrak, Meshak vẹ Abẹdnigo re yan nẹ erhanre na cha, jẹ emu vuọvo ru aye-en. Ohọroma rayen, ẹto, vẹ iwun rayen torhẹ vwẹ erhanre na-a, ayen tobọ gbo ọnrhe rẹ erhanre-e.

Nẹbukadreza da ta: ‘Ọghẹnẹ rẹ Shadrak, Meshak vẹ Abẹdnigo, ọyen Ọghẹnẹ rode. O ji amakashe rọyen nẹ o rhi sivwin ayen. A mrẹ ọghẹnẹ ọfa rọ họherọ-ọ.’

Kerẹ emeshare rẹ Hibru nana, wo muegbe wọ vwọ fuevun kẹ Jihova otoro obo re phiare-e?

“Ọrovwohwo Ọghẹnẹ ọye wo shiguẹ kẹ, ọye ọvo wọ je ga.”​—Matiu 4:10