Vwẹ ọke rẹ Ẹzra, o vwo ohwo rẹ Izrẹl ọvo re se Nehemaya, odibo rẹ Ovie Artaxerxes. Ọ dia orere rẹ Pẹsha re se Susa. Oniọvo rẹ Nehemaya da ghwa orharhe rẹ iyẹnrẹn nẹ Juda rhe nẹ, ‘Ihwo ri rhivwin kpo Jerusalẹm na hẹ ẹdia rẹ imuoshọ. A je rhoma rhe bọn anurhoro rẹ orere na vẹ igbẹhẹ rọyen rẹ isodje rẹ Babilọn guọghọre na-a.’ Ọnana de kpokpo Nehemaya mamọ. Ọ guọnọ rhivwin kpo Jerusalẹm ra rhuẹrẹ ẹdia na phiyọ, ọtiọyena ọ da nẹrhovwo nẹ e jẹ ovie na siobọnu ọyen.

Ẹdẹ ọvo, ovie na de noso nẹ Nehemaya muomaphiyọ. Ọ da ta: ‘Me je mrẹ wẹ ọtiọna dẹvo-o. Die yen phiare?’ Nehemaya da ta: ‘Mi muomaphiyọ kidie orere mẹ Jerusalẹm, guọghọ totọ.’ Ovie na da nọ: ‘Die wọ guọnọ nẹ mi ru kẹ wẹ?’ Ugege yena, Nehemaya da nẹrhovwo vwẹ ubiudu rọyen. Ọ da ta: ‘Biko, ji mi rhivwin kpo Jerusalẹm ra bọn igbẹhẹ na.’ Ovie na da rhọnvwe nẹ ọ yanran, o de ji vwo ọrhuẹrẹphiyotọ rere emu vuọvo vwo jẹ Nehemaya eruo vwẹ idjerhe. Ọ da vwẹ Nehemaya vwo mu osun rẹ Juda, je kẹ irhe re che vwo ru anurhoro rẹ orere na.

Nehemaya vwo te Jerusalẹm, o de ni orere na riariẹ. O de koko irherẹn kugbe isun na, ọ da vuẹ ayen nẹ, ‘Ẹdia na muoshọ mamọ. E jẹ a ton owian phiyọ kpakpata.’ Ihwo na da rhọnvwe, ayen da ton ebabọn rẹ igbẹhẹ na phiyọ.

Ẹkẹvuọvo, ivwighrẹn rẹ ihwo rẹ Izrẹl ke vwẹ ayen jehwẹ, ayen ke ta: ‘Urhiranko dede se gere igbẹhẹ rẹ ovwan na she.’ Ihwo rẹ wiowian na kpahenphiyọ ehwẹjẹ rayen na-a, ayen tẹnrovi iruo na. Igbẹhẹ na ko kpenu phiyọ kẹdẹ kẹdẹ.

Ivwighrẹn na de brorhiẹn nẹ ayen cha kpare ofovwin rhe Jerusalẹm, ayen cha wan ẹbẹre sansan rhe. Ihwo rẹ Ju na vwo nyo ọnana, oshọ ko mu ayen. Ẹkẹvuọvo, Nehemaya da ta: ‘Ovwan djoshọ-ọ. Jihova vẹ avwanre herọ.’ O de phi eshare phiyọ ẹdia sansan rere ewiowian na se vwo ruiruo na, ivwighrẹn na rha sa mrẹ asan wan rhe-e.

 Vwẹ ẹdẹ 52 ọvo, ayen da bọn igbẹhẹ vẹ anurhoro rẹ orere na re. Nehemaya de koko emọ rẹ Livae na vwọ kẹ ẹvwọkpahotọ rẹ igbẹhẹ na vẹ anurhoro na. Ọ da ghare ayen phiyọ ẹko ivẹ rẹ ibuine. Ayen da wan okọkọ rẹ Anurhoro rẹ Ogbugbu na yerin kpo enu rẹ igbẹhẹ na, ayen da yan riariẹ orere na, ẹko ọvo wan obọhwẹre ẹko ochekọ da rha wan obọrhen. Ayen hworo igogo, ekpata, vẹ isorogun vwọ suine ujiri kẹ Jihova. Ẹko ọvo nene Ẹzra, ẹko ochekọ de rhe nene Nehemaya, ukuotọ rọyen ayen da vwoma vwẹ uwevwin ẹga na. Ihwo na eje, te eshare te eya, kugbe emọ de ze izobo kẹ Jihova jẹ ayen ghọghọ. A tobọ nyo edo rẹ aghọghọ rayen vwẹ asan oshesheri.

“Orọvwọ re duvwu vwọ so owẹ se yovwi-i.”​—Aizaya 54:17