Jihova rhuẹrẹ ogba ọvo phiyọ asan re se Idẹn. Ogba na vọnre vẹ idodo, irhe, kugbe eranvwe. Ọghẹnẹ da reyọ ekpẹn vwọ ma ọshare rẹsosuọ na, Adam, ọ da wẹn phiyọ inwe rọyen. Wọ riẹn obo re phiare? Ọshare na da rhe dia ohworakpọ! Jihova vuẹ Adam nẹ ọ vwẹrote ogba na, ji mu odẹ kẹ eranvwe na eje.

Jihova de ji urhi ọghanghanre ọvo vwọ kẹ Adam. Ọ vuẹrẹ nẹ, ‘Wọ sa re emamọ rẹ irhe na eje, ẹkẹvuọvo wọ ria omamọ rẹ urhe ọvo-o. Wọ da riọ, ku wo ghwu.’

Ọke vwọ yanran na, Jihova da ta: ‘Me cha ma ọchuko vwọ kẹ Adam.’ Ọghẹnẹ da nẹrhẹ ovwerhẹn okokodo sun Adam, ọ da reyọ ubiedada rọyen ọvo vwọ ma aye kẹ. Odẹ rẹ aye na yen Ivi. Adam vẹ Ivi da rhe dia orua rẹsosuọ. Die yen Adam ruru ọ vwọ mrẹ aye rọyen? Oma vwerhenrọ mamọ, ọ da  ta: ‘Ni oborẹ Jihova vwẹ ubiedada mẹ vwọ ma! Ọnana ohwo kerẹ omẹvwẹ.’

Jihova vuẹ Adam vẹ Ivi nẹ ayen vwiẹ rere ayen vọn otọrakpọ na. Ọ guọnọre nẹ oma vwerhen ayen, ayen ru otọrakpọ na eje yoyovwin kerẹ ogba rẹ Idẹn. Ẹkẹvuọvo, erọnvwọn rha phia nene ọtiọye-en. Diesorọ? Uyovwinrota rọ vwọ kpahen ọnana cha vuẹ avwanre.

“Ohwo rọ ma ayen notọrhe ọshare vẹ aye ọ ma [ayen].”​—Matiu 19:4