Pho kpẹ obo revun rọyen

Pho kpẹ mẹnu rivẹ

Iseri ri Jihova

Urhobo

Wọ Guọnọ Riẹn Ẹkpahọphiyọ rẹ Enọ Nana?

Wọ Guọnọ Riẹn Ẹkpahọphiyọ rẹ Enọ Nana?

ẸKPAHỌPHIYỌ vwọ kẹ enọ vọ? Kpahẹn evo usun rẹ enọ re ma ghanre kparobọ rẹ ihworakpọ nọ. Ọkeọvo wo ji roro kpahẹn enọ nana obọvo re:

  • Ọghẹnẹ ghine davwerhọ ravwanre?
  • Ofovwin kugbe ojaẹriọ che ghine vwoba?
  • Die yen phia kẹ avwanre siẹrẹ avwanre de ghwu nu?
  • Iphiẹrophiyọ evo ghine herọ vwọ kẹ ihwo ri ghwuru?
  • Mavọ me nẹrhovwon wan Ọghẹnẹ de nyovwe?
  • Mavọ mi ru sa mrẹ omavwerhovwẹn vwẹ evun rẹ akpeyeren?

Tivọ wọ da guọnọ ẹkpahọphiyọ vwọ kẹ enọ nana? Ọ da dianẹ wo kpẹ asan ra da sẹro rẹ ẹbe yẹrẹ ushoghwa rẹ ẹbe, wọ sa mrẹ uriorin buebun rẹ ẹbe re ta tanẹ ayen vwo ẹkpahọphiyọ rayen. Jẹ ọke buebun ọbe ọvo vwọsua ọrochekọ. Efa họhọ obo ri mwẹro asaọkiephana ẹkẹvuọvo o krẹ tavwen o ki kpẹ awanre-e, a me rhoma vwariẹn si yẹrẹ vwẹ ọfa vwo wene.

Ẹkẹvuọvo, o vwo ọbe ọvo ro vwo ẹkpahọphiyọ ra sa vwẹroso. Ọbe rẹ uyota ọyen o ruẹ. Jesu Kristi ta kẹ Ọghẹnẹ vwẹ evun rẹ ẹrhovwo: “Ota wẹn hẹ uyota.” (Jọn 17:17) Nonẹna avwanre riẹn Ota yena phiyẹ Baibol Ọfuanfon na. Vwẹ evun rẹ aruẹbe rehẹ obaro na, wo che vwo oniso krẹn rẹ ẹkpahọphiyọ ro fiotọ ruyota ro nẹ Baibol rhe vwọ kẹ enọ rehẹ obenu na.

Ọghẹnẹ Ghine Davwerhọ Ravwanre?

Ọshare rẹ otu rihwo gbogba riariẹ

OBORESORỌ RẸ ONỌ NA VWỌ VWOMAPHIA: Avwanre yerẹn vwẹ evun rẹ akpọ rọ vọnre vẹ uvun ọbrabra kugbe orhiẹn ihuhu. Ẹga buebun yono ihwo tanẹ oja ravwanre ria na ọhọre r’Ọghẹnẹ.

OBO RI BAIBOL NA YONORI: Ọghẹnẹ vwẹ ọke vuọvo sua obo re brare-e. “Ọghẹnẹ rẹ uyota na ru obo re brare-e, Ọrovwoẹgba na o ji brorhiẹn ihuhu-u!” Eriyin Job 34:10 ta re. [New World Translation of the Holy Scriptures—With References] Ọghẹnẹ vwo omamọ iroro rẹ ẹguọnọ vwọ kẹ ihworakpọ. Ọyen sorọ Jesu vwo yono avwanre tanẹ a nẹrhovwo: “Ọsẹ rẹ avwanre rọ hẹ obo odjuvwu.…Jẹn uvie wẹn rhe, ru ẹguọnọ wẹn vwẹ akpọ na kirobo re ruẹ vwẹ obo ojuvwu.” (Matiu 6:9, 10) Ọghẹnẹ vwo ọdavwẹ okokodo kpahẹn avwanre te asan rẹ ọ da wian gangan mamọ rere o se vwo ru orugba rẹ ọhọre rọyen vwọ dia imwẹro.—Jọn 3:16.

Ji re ni Jẹnẹsis 1:26-28; Jems 1:13; kugbe 1 Pita 5:6, 7.

Ofovwin kugbe Ojaẹriọ Che Ghine Vwoba?

Isodje buebun

OBORESORỌ RẸ ONỌ NA VWỌ VWOMAPHIA: Ofovwi hwe ihwo ri junu-evwo rhi duvwu nonẹna. Ojaẹriọ rẹ ohworakpọ te avwanre ihwoeje oma.

OBO RI BAIBOL NA YONORI: Ọghẹnẹ tarọphiyotọ nẹ ọke ọvo cha rẹ ọyen cha vwọ vwẹ ufuoma mu vwẹ otọrakpọ na eje. Vwẹ obotọ rẹ Uvie rọyen, rọ diẹ usuon robẹ odjuvwu, ihworakpọ rhe che “yono ofovwi ọfa-a.” Ukpe rẹ ọtiọyen kẹ ayen “che duvwu oda rayen phihọ ighwro.” (Aizaya 2:4) Ọghẹnẹ cha vwẹ orhiẹn ihuhu kugbe ojaẹriọ ejobi vwo te oba. Baibol na vephiyọ: “[Ọghẹnẹ] ko ririe ameoviẹ nẹ ẹro rayen, ughwu gbe cha dia ọfa-a, eyẹ omaemuohọ eye oviẹ eyẹ odjadja ọfa-a, kidie emu rẹ awanre [ji te orhiẹn ihuhu kugbe ojaẹriọ ri nonẹna ejobi] wanvrẹn nure.”—Ẹvwọphia 21:3, 4.

Ji re ni Une rẹ Ejiro 37:10, 11; 46:9; kugbe Maika 4:1-4.

Die Yen Phia kẹ Avwanre Siẹrẹ Avwanre De Ghwu Nu?

Ushi ọvo

OBORESORỌ RẸ ONỌ NA VWỌ VWOMAPHIA: Buebun rẹ ẹga rẹ akpọ ri nonẹna yono tanẹ o vwo orọvwọn ọvo evun rẹ ohworakpọ rọ dia yanran siẹrẹ ohwo na de ghwu nu. Evo segbuyota tanẹ irivwin sa kuan ihwo rehẹ akpọ oma yẹrẹ tanẹ Ọghẹnẹ vwẹ oja riẹ irumwemwu womarẹ orhiẹn-ebrohwe vwo kpẹ ojaẹriọ ri bẹdẹ vwẹ evun rẹ ẹtẹrhe rẹ erhanre.

OBO RI BAIBOL NA YONORI: Ọke rẹ ughwu, ihworakpọ ke dobọ rẹ akpeyeren jẹ. “Ihwo ri ghwuru riẹn emu ọvuọvo-o.” Ọtiọyen Aghwoghwo 9:5 ta re. Rọvwọ dianẹ ihwo ri ghwuru riẹn emu vuọvo-o, nyemu oma-a, yẹrẹ rhiẹromrẹ emu vuọvo-o na, e rha sa vwẹ omaẹkuọn ke yẹrẹ vwẹ ukẹcha ke otu rehẹ akpọ-ọ.—Une rẹ Ejiro 146:3, 4.

Ji re ni Jẹnẹsis 3:19 kugbe Aghwoghwo 9:6, 10.

Iphiẹrophiyọ Evo Ghine Herọ Vwọ kẹ Ihwo ri Ghwuru?

Ọmo ro vwerhe ughwu rẹ ọ ro vwo ẹguọnọ kpahen

OBORESORỌ RẸ ONỌ NA VWỌ VWOMAPHIA: Avwanre guọnọ yeren akpọ, avwanre je guọnọ riakpọ vẹ ihwo ravwanre vwo ẹguọnọ kpahen. Ọyena obo rọhepha notọvotọrhe tanẹ avwanre vwo urhurusivwe ravwọ rhoma mrẹ ihwo rẹ avwanre vwo ẹguọnọ kpahen ri ghwuru.

OBO RI BAIBOL NA YONORI: Buebun rẹ ihwo ri ghwu re, a cha rhọvwọn ayen nẹ ushi rhe. Jesu vephiyọ tanẹ “irivwi rẹ hẹ evun rẹ ishi ejobi cha…yan phia.” (Jọn 5:28, 29) Vwo nene ọhọre r’Ọghẹnẹ ri notọvotọrhe, otu ri vrẹnushi rhe kerẹ ihworakpọ che vwo uphẹn re vwọ dia vwẹ evun rẹ otọrakpọ na vwẹ paradais. (Luk 23:43) Obaro r’akpọ nana re vephiyọ na, omakpokpọ ọgbagba kugbe arhọ ri bẹdẹ vwọ kẹ ihworakpọ ri nyẹmẹ je vwọba. Baibol na tare: “Ọvwata cha re ughwẹ rẹ otọ na, kọ dia enu rọye bẹdẹ.”—Une rẹ Ejiro 37:29.

Ji re ni Job 14:14, 15; Luk 7:11-17; kugbe Iruo rẹ Iyinkọn Na 24:15.

Mavọ Me Nẹrhovwo Wan Ọghẹnẹ De Nyovwe?

Ọshare rọ nẹrhovwo

OBORESORỌ ONỌ NA VWỌ VWOMAPHIA: Kohwo kohwo ro kpẹ ẹga ejobi eyen nẹrhovwo. Dede na, ẹwẹn ri buebun vuayen tanẹ a kpahan phiyẹ ẹrhovwo raye-en.

OBO RI BAIBOL NA YONORI: Jesu yono avwanre nẹ a kẹnoma kẹ ẹko reta re rori re djẹ ẹvwẹvwariẹn vwẹ evun rẹ ẹrhovwo. Ọ da ta: “Ovwan da nẹ ẹrhovwo wa ta ota ọvo asiava-a.” (Matiu 6:7) Avwanre da guọnọ nẹ Ọghẹnẹ kerhọ rẹ ẹrhovwo ravwanre, o vwobo rọ wanre-e, avwanre ke nẹrhovwo nene idjerhe rọ rhọvwephiyọ. Revwo ọyena, avwanre ki yono obo rẹ ọhọre r’Ọghẹnẹ mudia phiyọ tavwen a ke nẹrhovwo wan idjerhe tiọyen. Jọn rẹsosuọ 5:14 djere fiotọ: “Avwanre da nọ ekpẹn rẹ emu ro shephihọ ọhọre [r’Ọghẹnẹ] ko nyo kẹ avwanre.”

Ji re ni Une rẹ Ejiro 65:2; Jọn 14:6, 14; kugbe 1 Jọn 3:22.

Mavọ Mi Ru Sa Mrẹ Omavwerhovwẹn Vwẹ Evun rẹ Akpeyeren?

Aye rọ guọnọ omavwerhovwẹn womarẹ isese rẹ Baibol na

OBORESORỌ ONỌ NA VWỌ VWOMAPHIA: Ihwo buebun vwo esegbuyota tanẹ igho, odẹ, yẹrẹ erhuvwun eyen cha kẹ ayen omaverhovwẹn. Kọyensorọ rẹ ayen vwọ tua erọvwọn tieyena. Ukuotọ rọyen ayen me rhe mrẹvughe nẹ omavwerhovwẹn va ayen abọ.

OBO RI BAIBOL NA YONORI: Jesu dje usiaphrẹ rẹ omavwerhovwẹn phia ọke rọ vwọ ta: ‘Ebruba kẹ ihwo ri vwo ọdavwẹ rẹ emu rẹwẹn rayen.’ (Matiu 5:3) Ọke vuọvo ra sa vwọ mrẹ omaverhovwẹn ruyota ọyen siẹrẹ avwanre da jowọ re vwo nenesi rẹ ọdavwẹ ravwanre rọ ma rho, kọyehẹ, ọdavwẹ rẹ avwanre vwọ riẹn Ọghẹnẹ kugbe ọhọre rọyen vwọkẹ avwanre. Uyota yena evun rẹ Baibol na a da mrẹ. A da riẹn uyota yena ọ sa chọn avwanre uko vwo vughe obo re ghine dia ghanghanre kugbe obo ro jẹ dia. E de phi uphẹn phiyotọ kẹ uyota ri Baibol na nẹ o sun orhiẹn-ebro kugbe uruemu ravwanre o se sun avwanre kpẹ akpeyeren ro me fioto.—Luk 11:28.

Ji re ni Isẹ 3:5, 6, 13-18 kugbe 1 Timoti 6:9, 10.

Obo re djunute na dehẹ ẹkpahọphiyọ krẹn ri Baibol na vwọ kẹ enọ esan yena. Wọ je guọnọ ẹkpahọphiyọ re vrẹn ọtiọyen? Wọ da dia ọvo usun rihwo ri vwo “ọdavwẹ rẹ emu rẹwẹn rayen,” aphro herọ-ọ, wọ guọnọre. Wo se ji roro kpahẹn enọ efa, kerẹ: ‘Ọ da dianẹ Ọghẹnẹ vwo ọdavwẹ kpahẹn avwanre, kẹ diesorọ ọ rha vwọ vwẹ uphẹn kẹ ogbudugbu rẹ umiovwo kugbe ojaẹriọ rọ herọ vwẹ evun rẹ ikuegbe rẹ ohworakpọ rhabae rhe? Mavọ mi ru se phiba uwan rẹ akpeyeren rẹ orua mẹ?’ Baibol na vwẹ ẹkpahọphiyọ rọ vọn evun vwọ phia vwọ kẹ enọ nana kugbe efa buebun.

Dede na, ihwo buebun nonẹna ruẹ kẹmẹ kẹmẹ ri vwo se Baibol na. Ayen no kerẹ ọbe rhuarho rẹ siẹvo ẹruọ rọyen vwa bẹnbẹn. Wọ guọnọ ukẹcha a vuọ guọnọ ẹkpahọphiyọ rehẹ evun rẹ Baibol na? Iseri ri Jihova vwo erọvwọn ivẹ re sa chọn wẹn uko.

Ọrẹsosuọ, broshọ na Die Ọyẹn Ọghẹnẹ Guọnọ mie Avwanre? e ruro ọ sa vwọ vwẹ ukẹcha kẹ ihwo re fobọ mrẹ uphẹn vwọ fuẹrẹn ẹkpahọphiyọ phephẹn ri Baibol na vwọ kẹ enọ eghanghanre. Orọvwọn rivẹ ọyehẹ ọrhuẹrẹphiyotọ rẹ uyono ri Baibol evun rẹ uwevwi ọphẹ. Ọvo usun rẹ Iseri ri Jihova ro mwuwan rọ sa vwẹ Baibol na vwo yono uwe ọphe se bruwe rhe evun rẹ uwevwi wẹn yẹrẹ asan ọfa ro shephiyọ kẹ wẹ rẹ ọ vowẹ me ghwọrọ ọmọke kudughwrẹn kudughwren vwo dje kpahẹn Baibol na. Iduduru rihwo vwẹ akpọ na eje e mrẹ erere nẹ evun rẹ ọrhuẹrẹphiyotọ nana rhire. Ukuotọ rọyen buebun rihwo nana ke rhe ta: “Me mrẹ uyotoa na re!”

O vwo efe ọfa rọ rhonọ ọnana ra sa mrẹ-ẹ. Uyota ri Baibol na sivwẹ avwanre nabọ rẹ esegbuyota ro vwotọ-ọ, otighi, kugbe oshọ ro mu ohwo rọ. Ọ Kẹ avwanre iphiẹrophiyọ, iroro rẹ akpeyeren, kugbe aghọghọ. Jesu tare: “Ovwan ke riẹn uyota na, uyota na ko ru ovwan phihọ ọmuvwiẹ.”—Jọn 8:32.

1. Ọshare ro yono obo rẹ Baibol na yonori; 2. Aye ro yono obo rẹ Baibol na yonori