Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Iyẹnrẹn Esiri Ro Nẹ Obọ Rẹ Ọghẹnẹ Rhe!

 UYONO 2

Ono yẹn Ọghẹnẹ?

Ono yẹn Ọghẹnẹ?

1. Diesorọ o vwo fo nẹ avwanre ga Ọghẹnẹ?

Ọghẹnẹ ruyota na yen Ma erọnvwọn eje. O vwo ọtonphiyọ-ọ, o ji vwo oba-a. (Une Rẹ Ejiro 90:⁠2) Ọyen vwo iyẹnrẹn esiri ri Baibol na. (1 Timoti 1:​11) Ọghẹne ọvo ofori nẹ avwanre ga keridie ọyen ma avwanre.​—Se Ẹvwọphia 4:​11.

2. Oka rẹ Ohwo vọ Yẹn Ọghẹnẹ Hepha?

Ohwo vuọvo je mrẹ Ọghẹnẹ dẹvo-o, keridie ọyen ohwo rẹ Ẹwẹn. Kerẹ Ohwo rẹ ẹwẹn, ọ rho nẹ emama rehẹ akpọ na eje. (Jọn 1:​18; 4:​24) Dede na, avwanre se vughe oka rẹ ohwo rẹ Ọghẹnẹ hepha womarẹ ekuakua rọ mare. Kerẹ udje, avwanre mrẹ aghwanre vẹ ẹguonọ rẹ Ọghẹnẹ vwẹ emamọ vẹ idodo sansan rọ mare. A je mrẹ ẹgba rọyen vwẹ obo rẹ odjuvwu vẹ akpọ na rho te.​—Se Rom 1:​20.

Avwanre sa riẹn oka rẹ ohwo rẹ Ọghẹnẹ hepha kpobaro phiyọ siẹrẹ avwanre de se Baibol na. Kerẹ udje, Baibol na vuẹ avwanre obo re vwerhẹn Ọghẹnẹ ivun kugbe obo ri miovwo ivun, obo rẹ ọ vẹ ihwo yerin wan vẹ obo ro ruru vwẹ ọke sansan.​—Se Une Rẹ Ejiro 103:​7-​10.

3. Ọghẹnẹ Vwo Odẹ?

Jesu tare nẹ: ‘Ọsẹ ravwanre rọhẹ obẹ odjuvwu, e je ru odẹ wẹn fon’ (Matiu 6:⁠9) Dede nẹ Ọghẹnẹ vwo edeva buebun, oderhi vuọvo yẹn o vwori. Ejajẹ sansan vwo obo rẹ ayen se odẹ na. Vwẹ Urhobo, e se odẹ na “Jihova.” Ẹkẹvuọvo, ihwoevo se “Yahweh.”​—Se Une Rẹ Ejiro 83:​18NW.

A reyọ edeva kerẹ Ọghẹnẹ yẹrẹ Ọrovwohwo vwo wene oderhi rẹ Ọghẹnẹ vwẹ Baibol buebun. Ẹkẹvuọvo, ọke revwo si Baibol na, odẹ rẹ Ọghẹnẹ vwomaphia omarẹ abọ 7,000. Ọke ri Jesu vwo yono ihwo kpahẹn Ọghẹnẹ, o dje odẹ rẹ Ọghẹnẹ kẹ ayen.​—Se Jọn 17:⁠26.

4. Jihova davwerhọn rẹ avwanre?

Kerẹ ọse nana ro vwo ẹguọno na, Ọghẹnẹ ruẹ erọnvwọn re cha hwarhiẹ erhuvwu ri bẹde rhe avwanre

Ojaẹriọ vwọ vọn asan eje nonẹna, ko mudiaphiyọ nẹ Jihova Ọghẹnẹ rha davwerhọn rẹ avwanre-e? Ihwoevo ta nẹ Ọghẹnẹ vwẹ ojaẹriọ vwọ davwen avwanre nẹ, ẹkẹvuọvo, ọyena dia uyota-a.​—Se Jems 1:​13.

Ọghẹnẹ bru ọghọ phiyọ avwanre oma rọ vwọ kẹ avwanre uphẹn rẹ avwanre vwo brorhiẹn romobọ. O rhe fo nẹ avwanre dje ọdavwaro phia womarẹ a vwọ vwẹ ugbomọphẹ rẹ avwanre vwori na vwọ ga Ọghẹnẹ? (Joshua 24:15) Ẹkẹvuọvo, ihwoevo jojẹ rẹ ayẹn vwo ru umiovwon, kọyen sorọ ihwo buebun vwọ rioja. Oshenyẹ ọtiọyen na da Jihova.​—Se Jẹnẹsis 6:​5, 6.

Jihova ọyen Ọghẹnẹ rọ davwerhọn rẹ avwanre. Ọ guọnọre nẹ avwanre yeren akpọ rẹ omavwerhovwẹn. O rhe che kri-i, Jihova che si ojaẹriọ vẹ ihwo re suọ no. Dede na, o vwo oboresorọ rọ vwọ vwẹ uphẹn kẹ ojaẹrio nẹ ọ dia rhi te ọke nana. Avwanre cha mrẹ oboresorọ vwẹ uyono 8 rẹ ọbe nana.​—Se 2 Pita 2:9; 3:​7, 13.

5. Mavọ yẹn avwanre se vwo sikẹre Ọghẹnẹ?

Jihova durhie avwanre nẹ avwanre si kẹrẹ ọyen womarẹ ẹrhovwo. O vwo ọdavwẹ rẹ avwanre ohwo vuọvo. (Une Rẹ Ejiro 65:2; 145:18) O muegbe rọvwọ vwẹ imwemwu ravwanre vwo ghovwo avwanre. O vwo oniso rẹ oborẹ avwanre davwẹngba te, e se vwo ru obo re vwerhọn ivun, ọ da tobọ dianẹ avwanre ruẹ chọ ọkeọvo. Dedenẹ avwanre gbare-e, avwanre vẹ Ọghẹnẹ se vwo oyerinkugbe rọ kpẹkpẹre.​—Se Une Rẹ Ejiro 103:​12-​14; Jems 4:⁠8.

Rọvwọ dianẹ Jihova yin ma avwanre na, ko fori nẹ avwanre vwo ẹguọnọ rọyen vrẹ kohwo kohwo. (Mak 12:30) Wo che sikẹre Ọghẹnẹ phiyọ, siẹrẹ wo de vwo ẹguọnọ rọyen, yono kpahọn, ji ru ọhọre rọyen.​—Se 1 Timoti 2:4; 1 Jọn 5:⁠3.