Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYONO 9

Mavọ Omavwerhovwẹn Sa Vwọ Dia Evunrẹ Orua Wẹn?

Mavọ Omavwerhovwẹn Sa Vwọ Dia Evunrẹ Orua Wẹn?

1. Diesorọ orọnvwe vwọ dia obo re ghanre kẹ omavwerhovwẹn rẹ orua?

Obọ ri Jihova yẹn Iyẹnrẹn esiri na nurhe. Ọyen Ọghẹnẹ rẹ oma vwerhan, rọ guọnọre nẹ oma vwerhen korua korua. (1 Timoti 1:​11) Ọyen ton ọrhuẹrẹphiyotọ rẹ orọnvwe phiyọ. Orọnvwe re ru nene urhi pha ghanghanre keridie, ọ ghwa omavwerhovwẹn vẹ omafuvwe brẹ emọ cha. Ofori rẹ Inene-ri-Kristi vwọ yan nene urhi rẹ anadjaibo ravwọ ghwobọ phiyẹ ọbe rẹ orọnvwe.​—Se Luk 2:1, 4, 5

Ẹro vọ Ọghẹnẹ vwo nẹ orọnvwe? Ọ guọnọre nẹ orọnvwe rẹ ọshare vẹ aye fa-an. Jihova guọnọre nẹ eshare vẹ eya rayen fuevun kẹ ohwohwo. (Hibru 13:4) O vwo utuoma kpahen orọnvwe-ẹfan. (Malakae 2:16) Ẹkẹvuọvo, ọ rhọnvwe kẹ Inene-ri-Kristi rẹ irivẹ rayen gbe igberadja nẹ, ayen sa fan orọnvwe na, ayen da je guọnọ dede, ayen je sa rhoma rọnvwọ.​—Se Matiu 19:3-6, 9.

2. Mavọ yẹn ọshare vẹ aye rọyen yerin wan?

Jihova ma ọshare vẹ aye rere ayen vwọ chọn ohwohwo uko. (Jẹnẹsis 2:18) Kerẹ ọgbuyovwin rẹ orua na, ọshare yin vwo oghwa rọ vwọ ghẹrẹ orua rọyen vwọrẹ ugboma, ọ me je vwẹ eta rẹ Ọghẹnẹ yono ayen. Ofori nẹ ẹguọnọ rọyen kpahen aye rọyen dia ọ ro kodori. O fori nẹ eshare vẹ eya vwo ẹguọnọ rẹ ohwohwo, ayen mi ji mu ọghọ kẹ ohwohwo. Fikiridie nẹ ayen gbare-e, ko fori nẹ ayen vwo ghovwon ohwohwo rere omavwerhovwẹn sa vwọ dia uvwre rayen.​—Se Ẹfesọs 4:31, 32; 5:22-25, 33; 1 Pita 3:7.

3. Ofori nẹ wo vrẹno orọnvwe rẹ omavwerhovwẹn kanre?

Ebẹnbẹn da vwomaphia vwẹ orọnvwe na, ovwan davwẹngba vwo yerinkugbe vwọrẹ ẹguọnọ. (1 Kọrẹnt 13:4, 5) Baibol  na ghwe jiri omaẹhẹriẹ fikirẹ eme ebẹnbẹn re vwomaphia vwẹ orọnvwe na-a.​—Se 1 Kọrẹnt 7:10-13.

4. Emọ, oka rẹ akpeyeren vọ yẹn Ọghẹnẹ guọnọ kẹ ovwan?

Jihova guọnọre nẹ oma vwerhen ovwan. Ọ kẹ ovwan uvi rẹ uchebro rọ sa nẹrhẹ ovwan re avwerhen rẹ ọke ighene rovwan. Esẹ vẹ ini rovwan vwo aghwanre fikirẹ obo rẹ ayen rhiẹromre re. Kọyen sorọ Ọghẹnẹ vwọ guọnọ nẹ ovwan yono miẹ ayen. (Kọlose 3:20) Jihova je guọnọ nẹ ovwan mrẹ aghọghọ ro nẹ eruo robo re nẹrhẹ oma vwerhọn vẹ Ọmọ rọyen.​—Se Aghwoghwo 11:9–12:1; Matiu 19:13-15; 21:15, 16.

5. Emiọvwọn, die yin fori nẹ ovwan ru oma vwọ vwerhen emọ rovwan?

Ovwan wian gan rere emọ rovwan sa vwọ mrẹ emuọre, irhuon, kugbe asan rayen dia. (1 Timoti 5:8) Oma vwọ vwerhen ayen dẹn, ofori nẹ ovwan yono ayen obo rẹ ayen se vwo vwo ẹguọno rẹ Ọghẹnẹ, ji yono mie. (Ẹfesọs 6:4) Omamọ rẹ udje rẹ ẹguọnọ rovwan vwo kpahen Ọghẹnẹ, rẹ ayen mrẹ, se djobọte ubiudu rẹ emọ na. Siẹrẹ ovwan de mu uyono rovwan kpahen ota rẹ Ọghẹnẹ, emọ rovwan ki che roro kpahen obo rayen vwo ru obo ri yovwinrin ọkieje.​—Se Urhi Rivẹ 6:4-7; Isẹ 22:6.

Wo de phiudu phiyọ awọ rẹ emọ wẹn ji jiri ayen, ọna nẹrhẹ oma vwerhen ayen. Ayen je guọnọ ọkpọvi vẹ ọghwọku. Oka rẹ uyono ọtiọyen na sẹro rayen nẹ iruemu re sa nẹrhẹ ayen muomaphiyọ. (Isẹ 22:15) Ẹkẹvuọvo, we jẹ ọghwọku na dia ọrẹ omaẹdja-a.​—Se Kọlose 3:21.

Iseri-ri-Jihova teyen ẹbe buebun re sa vwẹ ukẹcha kẹ emiọvwọn vẹ emọ rayen. Baibol na yẹn e si ayen nurhe.​—Se Une Rẹ Ejiro 19:7, 11.