1. Erere vọ yẹn wọ cha mrẹ siẹrẹ wo de yono Baibol na kpobaro phiyọ?

Imuẹro herọ nẹ, iyono ri Baibol ra fuẹrẹnre vwevunrẹ ọbe nana nẹrhẹ ẹguọnọ wẹn kpahen Jihova gan. Rere ẹguọnọ nana sa vwọ ganphiyọ, ọ guọnọ owian. (1 Pita 2:⁠2) Wọ sa vwọ dia bẹdẹ, ku wo sikẹre Ọghẹnẹ womarẹ uyono rẹ Ota rọyen.​—Se Jọn 17:3; Jude 21.

Eriariẹn wẹn kpahen Ọghẹnẹ vwo buẹnphiyọ na, esegbuyota wẹn kọ je cha ganphiyọ. Esegbuyota wẹn chọnwuko vwo ru obore vwerhan Ọghẹnẹ ivun. (Hibru 11:​1, 6) O che mu we vwo kurhẹriẹ, ji vwo ru ewene ro fori vwẹ akpeyeren wẹn.​—Se Iruo Rẹ Iyinkọn na 3:⁠19.

2. Mavọ yẹn ihwoefa sa vwọ mrẹ erere nẹ eriariẹn rẹ Ọghẹnẹ ru wo vwori?

Wẹ vi Jihova sa dia igbeyan re kpẹkpẹre

Oma cha vwerhen owẹ ru wọ vwọ vuẹ ihwoefa kpahen obo ru wo yonori​—⁠omavwerhan ihwoeje ri ghwoghwo iyẹnrẹn esiri na. Rẹ wo vwo yono Baibol na kpobaro phiyọ ye, wọ cha riẹn obo ra vwẹ Baibol na vwo dje esegbuyota phia. Marho kẹ esegbuyota wẹn kpahen Jihova vẹ iyẹnrẹn esiri na.​—Se Rom 10:​13-​15.

Ihwo buebun ri yono obo re ghwoghwota, ke ghwoghwo kẹ igbeyan vẹ ihwo rẹ orua rayen. Ukpe ru wọ vwọ vuẹ ayen nẹ ẹga rayen yovwiri-in, vwẹ aghwanre vuẹ ayen kpahen ive rẹ Ọghẹnẹ. Karophiyọ nẹ uruemu esiri re djephia te ihwo ubiudu vrẹ obo rẹ avwanre vuẹ ayen.​—Se 2 Timoti 2:​24, 25.

3. Oyerinkugbe vọ yẹn wẹ vẹ Ọghẹnẹ se vwo?

Wo de yono Ota rẹ Ọghẹnẹ, oyerinkugbe wẹn vẹ ọrẹ Ọghẹnẹ kọ cha ganphiyọ. Ememerha na, wọ vẹ Jihova ke cha  rhi dia uvi rẹ igbeyan. Ku wọ cha rhe dia ọvo vwẹ usun rẹ ihwo rẹ orua rọyen.​—Se 2 Kọrẹnt 6:​18.

4. Mavọ wo se ru yan kpobaro phiyọ?

Oyerinkugbe wẹn vẹ ọrẹ Ọghẹnẹ se kpobaro phiyọ siẹrẹ wo de yono Ota rọyen ọkieje. (Hibru 5:​13, 14) Vuẹ oseri ri Jihova ọvo nẹ ọ rhe vwẹ ọbe na Die Yen Baibol na Se Yono Avwanre? vwo yono uwe. Akpeyeren wẹn che yovwin phiyọ ru wo vwo yono Ota rẹ Ọghẹnẹ na.​—Se Une Rẹ Ejiro 1:​1-3; 73:​27, 28.

Obọ ri Jihova, Ọghẹnẹ rẹ omavwerhan na, ọyen iyẹnrẹn esiri na nurhe. Wo de sikẹre ihwo rọyen, ugbeyan wẹn vẹ ọrẹ Ọghẹnẹ kọ kpẹkpẹ phiyọ. (Hibru 10:​24, 25) Siẹrẹ wọ da davwẹngbe vwo ruẹ ọhọre rẹ Jihova, ju wo ruẹ oborẹ arho ri bẹdẹ se vwo te we obọ. Obo ri me fo nẹ wo ru ọyen, wo vwo sikẹre Ọghẹnẹ.​—Se 1 Timoti 1:​11; 6:​19.