1. Diesorọ Ọghẹnẹ vwo koko emọ rẹ Izrẹl vwẹ ọke awanre?

Ọghẹnẹ si emọ rẹ Ebraham koko, ọ da rhuẹrẹ ayen phiyẹ ẹgborho, je vwẹ irhi kẹ ayen. Ẹgborho nana ro seri “Izrẹl” na ọvo yen vwẹ ẹga ruyota vwọ kẹ. Ayen ọvo, Ọ je vwẹ Ota rọyen kẹ nẹ, ayen sẹro rọyen. (Une Rẹ Ejiro 147:​19, 20) Ọtiọyena, ihwo rẹ akpọ na eje ke sa mrẹ ebruba womarẹ Izrẹl rhe.​—Se Jẹnẹsis 22:⁠18.

Ọghẹnẹ jẹ emọ rẹ Izrẹl reyọ rere ayen vwọ dia iseri rọyen. Ikuegbe rayen djerephia nẹ, ravwọ yan nene irhi rẹ Ọghẹnẹ vọnre vẹ erere. (Urhi Rivẹ 4:⁠6) Idjerhe nana, ihwo ke sa womarẹ Izrẹl riẹn Ọghẹnẹ ruyota na.​—Se Aizaya 43:​10, 12.

2. Diesorọ e vwo koko Inene-ri-Kristi ruyota?

Ọ rhi vwo te ọkiọvo, Izrẹl de ru obo re nẹrhẹ oyerinkugbe rayen vẹ ọrẹ Ọghẹnẹ ghwru vrẹ ayen abọ. Jihova da vwẹ ukoko rẹ Inene-ri-Kristi ruyota vwo wene ẹdia rayen. (Matiu 21:43; 23:​37, 38) Enẹna, Inene-ri-Kristi ruyota yen reyọ ẹdia rẹ emọ rẹ Izrẹl rẹ ayen vwo soseri ki Jihova.​—Se Iruo Rẹ Iyinkọn na 15:​14, 17.

Jesu vwẹ iji kẹ idibo rọyen nẹ ayen ghwoghwota kẹ ihwo rẹ akpọ na eje, ji yono ayen vwọ dia idibo rọyen. (Matiu 10:​7, 11; 24:14; 28:​19, 20) Owian nana joma re re, keridie oba rẹ eyeren na yẹn a pha na. Ọna yẹn ọke ẹsosuọ vwẹ ikuegbe rẹ ihworakpọ rẹ, iduduru rẹ ihwo vwẹ akpọ na eje, vwo kuomakugbe vwọ vwẹ ẹga ruyota kẹ Jihova. (Ẹvwọphia 7:​9, 10) Inene-ri-Kristi ruyota kuomakuẹgbe rẹ ayen vwọ chọn ohwohwo uko je bọn ohwohwo gan vwẹ ukoko na. Uyono ri Baibol vuọvo yẹn ayen yono vwẹ emẹvwa rayen vwẹ akpọeje.​—Se Hibru 10:​24, 25.

 3. Mavọ yẹn ukoko rẹ Iseri Jihova tonphiyọ wan vwẹ ọke ravwanre?

Vwẹ ikpe re kpahẹn 1870, ẹmẹko rẹ ihwo ri yono Baibol na de rhi vwo ọmrẹvughe rẹ iyono ri Baibol ri ghwruru jovwo. Ayen rhe vwọ riẹn nẹ Jesu vwo ọrhuẹrẹphiyotọ rẹ ukoko rẹ Inene-ri-Kristi na vwo ghwoghwota, kẹ ayen tuẹn iruo aghwoghwo rẹ Uvie na phiyọ vwẹ akpọeje. Ukpe ri 1931 kọyen ayen rhe reyọ odẹ na, Iseri ri Jihova.​—Se Iruo Rẹ Iyinkọn na 1:8; 2:​1, 4; 5:​42.

4. Ọrhuẹrẹphiyotọ vọ yẹn ukoko rẹ Iseri ri Jihova vwori?

Ikoko rẹ Inene-ri-Kristi vwẹ ẹgbukpe ujorin rẹsosuọ mrẹ erere nẹ ọrhuẹrẹphiyotọ rẹ ẹko rọvwẹrote ri Jesu rọ dia Ọgbuyovwin rẹ ukoko na vwo mu. (Iruo Rẹ Iyinkọn na 16:​4, 5) Ọtiọyen ọje hepha nonẹna, Iseri ri Jihova vwẹ akpọ na eje je mrẹ erere nẹ ọrhuẹrẹphiyotọ rẹ Ẹko Rọvwẹrote na. Ẹko nana yen vwẹrote eghọn rukoko rẹ Iseri ri Jihova ri ruiruo ravwọ fan ẹbe revwo yono Baibol na kpẹ ejajẹ re vrẹ 600. Ayen je vwẹrote ẹteyọn kugbe ẹgharọ rẹ ẹbe na. Idjerhe nana yẹn Ẹko Rọvwẹrote na vwọ reyọ ọbọngan kugbe odjekẹ vwọ kẹ ikoko re vrẹ 113,000 vwẹ akpọ na eje. Vwẹ ukoko ọvuọvo, o vwẹ eshare ri muwan re ga kerẹ ekpako yẹrẹ iniruo. Ekpako nana yen nabọ vwẹrote igodẹ rẹ Ọghẹnẹ.​—Se 1 Pita 5:​2, 3.

Iseri ri Jihova vwo ọrhuẹrẹphiyotọ rẹ ayen vwo ghwoghwota, ji vwo yono ihwo vwọ dia idibo ri Jesu. Avwanre ji ghwoghwota nẹ uwevwin kpẹ uwevwin kerẹ iyinkọn na. (Iruo Rẹ Iyinkọn na 20:20) Avwanre vwẹ uyono ri Baibol muẹ kẹ ihwo ri vwo ẹwẹn esiri. Ẹkẹvuọvo, Iseri-ri-Jihova vrẹ ukoko ghevweghe. Avwanre orua vuọvo ri vwo Ọsẹ ro vwo ẹguọnọ ravwanre. Avwanre eje iniọvo ri vwo ọdavwẹ rẹ ohwohwo. (2 Tẹsalonaika 1:⁠3) Ọdavwẹ rẹ Iseri ri Jihova vwo koko yẹn, ayen vwo ru ọhọre rẹ Ọghẹnẹ je chọn ihwoefa uko. Ọyen sorọ ayen vwọ dia ihwo rẹ oma ma vwerhan vwẹ akpọ na.​—Se Une Rẹ Ejiro 33:12; Iruo Rẹ Iyinkọn na 20:⁠35.