1. Ono yin Vwo Baibol Na?

Baibol na vwo iyẹnrẹn esiri nẹ, ihworakpọ cha dia otọrakpọ na bẹdẹ. (Une Rẹ Ejiro 37:29) Ẹbe itete 66 yehẹ evunrẹ Baibol na. Omarẹ ihwo 40 ri fuevun yẹn Ọghẹnẹ vwo si Baibol na. Moses yin si ẹbe iyorin ẹsosuọ ri Baibol na, omarẹ ẹgbukpe 3,500 re wanvrẹ re. Ọyinkọn Jọn kọyen rhe si ọbe rọkoba ri Baibol na omarẹ ẹgbukpe 1,900 re wanrẹ. Eta rẹ ono yẹn e si phiyẹ Baibol na? Ọghẹnẹ yen womarẹ ẹwẹn ọfuanfon rọyen tota kẹ ihwo ri si Baibol na. (2 Samuẹl 23:⁠2) Iroro rẹ Ọghene ọyen ayen si phiyotọ, ọ dia iroro romobọ raye-en. Ọtiọyen na, Jihova yin Vwo Baibol na.​—Se 2 Timoti 3:​16; 2 Pita 1:​20, 21.

2. Die yen kẹ avwanre imuẹro nẹ Baibol na ọbe ruyota?

Avwanre riẹn nẹ obọ rẹ Ọghẹnẹ yẹn Baibol na nurhe fikiridie, ọ nabọ dje kpahen obo rẹ obaro na cha dia. Ohwọfa ro se ru ọnana herọ-ọ. (Joshua 23:14) Ọghẹnẹ ro me vwo Ẹgba na ọvo yen sa nabọ dje obo rẹ obaro rẹ akpeyeren rẹ ihworakpọ cha dia.​—Se Aizaya 42:​9; 46:⁠10.

O fori nẹ ọbe ro nẹ obọ rẹ Ọghẹnẹ rhe dia oghẹresan, ọtiọyen ọ ghene hepha. Oduduima buebun ri Baibol na yẹn a ghare re vwẹ ejajẹ buebun. Dede nẹ Baibol na krakpọ re, egba-erianriẹn ri ru ehiahiẹ rhọnvwe phiyẹ obo ri Baibol na ta kpahen erọnvwọn rẹ Ọghẹnẹ mare. Vwọba, ihwo 40 ri si Baibol na, si obo re vwọ so ohwohwo-o. * Obọ rẹ Ọghẹnẹ ọvo yẹn ota ri Baibol na ta kpahen uvi rẹ ẹguọnọ se nurhe, o ji vwo ẹgba ro se vwo ruẹ akpeyeren rẹ ihwo yovwẹn phiyọ. Uyota nana yen nẹrhẹ iduduru rẹ ihwo vwo imuẹro nẹ Baibol na ghini Ota rẹ Ọghẹnẹ.​—Se 1 Tẹsalonaika 2:⁠13.

 3. Die yin Baibol na tota kpahen?

Ọvo vwẹ usun rẹ iyovwinreta ri Baibol na tota kpahen, ọyen iyẹnrẹn esiri kpahen ọrhuẹrẹphiyotọ rẹ ẹguọnọ rẹ Ọghẹnẹ vwo kẹ ihworakpọ. Isiesi Ọfuanfon na dje oborẹ ihworakpọ kuẹ uphẹn rẹ ayen vwọ dia paradaisi kufia vwẹ ọtonphiyọ rẹ ikuegbe rẹ ihworakpọ vẹ oborẹ paradaisi sa vwọ rhoma dia.​—Se Ẹvwọphia 21:​4, 5.

Irhi, uruemu rẹ irhi kugbe uchebro je evunrẹ Ota rẹ Ọghẹnẹ. Vwọba, Baibol na ji nẹ iyẹnrẹn robo rẹ Ọghẹnẹ nene ihwo yerin wan. Womarẹ iyẹnrẹn nana, ka sa riẹn oka rẹ ohwo rẹ Ọghẹnẹ hepha. Ọtiọyen na, Baibol na sa chọnwuko vwọ riẹn Ọghẹnẹ. O ji dje obo ru wọ sa vwọ dia ugbeyan rọyen.​—Se Une Rẹ Ejiro 19:​7, 11; Jems 2:​23; 4:⁠8.

4. Mavọ yẹn wo se vwo vwo ẹruọ ri Baibol na?

Ibroshọ nana cha chọnwuko vwo vwo ẹruọ ri Baibol na siẹrẹ wọ da vwẹrokere ena ri Jesu vwo yono ihwo. Jesu riobọ kpẹ ẹdia ri Baibol sansan, ọ je “fan otọ rẹ Ẹbe Efuanfon na.”​—Se Luk 24:​27, 45.

Erọnvwọn re vwerhoma kerẹ iyẹnrẹn esiri ro nobọ rẹ Ọghẹnẹ rhe bunru-un. Jẹ itu evo rhọnvwa kerhọ-ọ, ọ tobọ miovwon ihwoevo ivun. Wo jẹ ofu ọyena djewe-e. Rere wọ sa vwọ dia bẹdẹ, ku wọ riẹn Ọghẹnẹ.​—Se Jọn 17:⁠3.

 

^ e?ko. 3 Nẹ ibroshọ na A Book for All People.