1. Diesorọ Ọghẹnẹ vwọ ma otọrakpọ na?

Jihova vwẹ otọrakpọ na kẹ ihworakpọ nẹ ayen dia. Ọyen uwevwin ravwanre. Ọtiọyena, otọrakpọ na ọyen Ọghẹnẹ ma kẹ Adam vẹ Ivi nẹ ayen vẹ emọ rayen dia, ọ diẹ odjuvwu-u​—Emekashe yẹn Ọghẹnẹ mare nẹ e dia odjuvwu (Job 38:​4, 7) Fikirẹ ọnana, Ọghẹnẹ de phi ọshare rẹ ẹsosuọ na phiyẹ paradaisi re se ogba rẹ Idẹn. (Jẹnẹsis 2:​15-​17) Jihova kẹ Adam vẹ emọ rọyen iphiẹrophiyọ rẹ ayen vwọ re avwerhen rẹ paradaisi bẹdẹ.​—Se Une Rẹ Ejiro 37:29; 115:⁠16.

Vwẹ ẹsosuọ, ogba rẹ Idẹn ọvo yin paradaisi. Aye vẹ ọshare rẹ ẹsosuọ na vwẹ uphẹn rẹ ayen vwo vwiẹ akpọ na vọn. Kpobaro phiyọ, kẹ ayen vwẹrote akpọ na eje, ji ruo phiyẹ paradaisi. (Jẹnẹsis 1:​28) O vwo ọke vuọvo rẹ akpọ na cha vwọ ghwọrọ-ọ. Ọ cha dia uwevwin rẹ ihworakpọ bẹdẹ.​—Se Une Rẹ Ejiro 104:⁠5.

2. Diesorọ otọrakpọ na rha dia paradaisi asaọkiephana-a?

Jihova djẹ Adam vẹ Ivi nẹ ogba rẹ Idẹn keridie ayen nyupho rọye-en. Ayen de ku paradaisi na kufia. O vwo ohwo vuọvo rọ sa rhoma reyọ rhivwin rhe, rhi te ọke nana-a. Baibol na da ta: ‘Akpọ na rhe vọn vẹ iruimwemwu rẹ ihwo.’​—⁠Job 9:​24.​—Se Jẹnẹsis 3:​23, 24.

Ọna nẹrhẹ Jihova kpairoro vrẹ ọhọre rọyen vwọ kẹ ihworakpọ? Ẹjo! Kerẹ Ohwo ro me vwo ẹgba, o che se ku avwanre phiyọ otọ-ọ. (Aizaya 45:18) O che ru akpọ na phiyọ paradaisi vwọ kẹ ihworakpọ, kirobo rọ guọnọre nẹ ọ dia nẹ ọtonphiyọ rhe.​—Se Une Rẹ Ejiro 37:​11, 34.

3. Mavọ yin Paradaisi sa vwọ rhoma dia vwẹ otọrakpọ na?

A cha rhoma vwẹ paradaisi rhe vwẹ ọke ri Jesu Kristi che vwo sun. Jesu che sun emekashe rẹ Ọghẹnẹ vwẹ ofovwin rẹ Amagidọn vwo si iruimwemwu na no. Jesu mi rhe mu Eshu phiyẹ uwodi vwẹ ikpe 1,000. Ihwo rẹ Ọghẹnẹ cha ghwọrọ-ọ, keridie Jesu che sivwin ayen. Kẹ ayen cha dia Paradaisi vwẹ otọrakpọ na bẹdẹ.​—Se Ẹvwọphia 20:​1-3; 21:​3, 4.

4. Ọke vọ yẹn ojaẹriọ che vwo vwoba?

Ọke vọ yẹn Ọghẹnẹ che vwo si umiovwon nẹ akpọ na? Jesu dje “oka” ra vwọ riẹn nẹ oba na sikẹre re. Akpọ rẹ avwanre yerẹn asaọkiephana vọnre vẹ imwoshọ ro djerephia nẹ avwanre hẹ “ọke oba rẹ akpọ na.”​—Se Matiu 24:​3, 7-​14, 21, 22.

Vwẹ Uvwre rẹ ikpe 1,000 ri Jesu che vwo sun akpọ nẹ odjuvwu rhe na, o che si ojaẹriọ no kakare. (Aizaya 9:​6, 7; 11:⁠9) Jesu yen cha dia Ovie. Ọ je cha dia Orherẹn Rode ro che si umwemwu rẹ ihwo ri vwo ẹguọnọ rẹ Ọghẹnẹ no. Ọghẹnẹ kọ cha vwẹ Jesu si ọga, ọghwo kugbe ughwu no.​—Se Aizaya 25:8; 33:24.

5. Ihwo vọ yen cha dia Paradaisi na?

Vwẹ Ọguan Ruvie, wọ cha mrẹ ihwo ri vwo ẹguọnọ rẹ Ọghẹnẹ, re je guọnọ ruẹ ọhọre rọyen

Ihwo re kerhọ rẹ Ọghẹnẹ yen cha dia Paradaisi. (1 Jọn 2:​17) Jesu ji idibo rọyen nẹ ayen yanran ra guọnọ ihwo dẹndẹn, rere ayen yono ayen idjerhe rẹ Ọghẹnẹ. Enẹna, Jihova muegbe rẹ iduduru rẹ ihwo re cha dia Paradaisi vwẹ otọrakpọ na. (Zẹfanaya 2:⁠3) Vwẹ Eguan Ruvie rẹ Iseri ri Jihova, e yono avwanre obo rẹ avwanre sa vwọ dia emamọ rẹ eshare, esẹ, eya, kugbe ini. Emiọvwọn kugbe emọ rayen koko ga Jihova. Ayen ji yono obo rẹ ayen sa vwọ mrẹ erere nẹ iyẹnrẹn esiri na rhe.​—Se Maika 4:​1-4.