Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Ihwo rẹ Ẹwẹn Dia Ihworakpọ ri Ghwuru-u

Ihwo rẹ Ẹwẹn Dia Ihworakpọ ri Ghwuru-u

Ihwo rẹ ẹwẹn herọ! I ri yovwirin vẹ e re brare. Ayen ihworakpọ ri ghwuru?

Ẹjo, kakaka. Ihwo ri ghwuru kpo akpọ rẹ ihwo rẹ ẹwẹn kirobo rẹ ihwo buebun rorori-i. Mavọ avwanre ru riẹn? Baibol na yen tarọ. Baibol na, ọyen ọbe rẹ uyota ro nẹ obọ ri Jihova, Ọghẹnẹ rẹ uyota vuọvo na rhe. Jihova rọ ma ihworakpọ, riẹn obo re phia kẹ ayen siẹrẹ ayen de ghwu.—Une Rẹ Ejiro 83:18; 2 Timoti 3:16.

Adam nẹ ekpẹn rhe, o ji rhivwin kpo ekpẹn

Baibol na tare nẹ Ọghẹnẹ “vwẹ ekpẹn rẹ otọ na vwọ ma” Adam rọ dia ohwo ẹsosuọ. (Jẹnẹsis 2:7) Ọghẹnẹ de phio phiyọ Iparadaisi, vwẹ ogba rẹ Idẹn. Mane kẹ Adam nyupho ri Jihova jovwo, o rhe ghwu-u; ọ rha dia otọrakpọ na te nonẹna. Ẹkẹvuọvo, ọke rẹ Adam vwọ churhi rẹ Ọghẹnẹ nu, Ọghẹnẹ da ta kẹ: “Wo che . . . rhivwin kpo otọ ri wo nurhe, ekpẹn wo ji che hirhe ra.”—Jẹnẹsis 3:19.

Die yen ọnana mudiaphiyọ? Tivọ yen Adam hepha tavwen Jihova ke vwẹ ekpẹn vwọ ma? Ọ hẹ asan ọvuọvo-o. Ọ diẹ ohwo rẹ ẹwẹn ro yerẹn vwẹ obo odjuvwu-u. O yerẹn vwẹ asan vuọvo-o. Jihova vwọ vuẹ Adam nẹ o che “rhivwin kpẹ otọ” na, o mudiaphiyọ nẹ, Adam che ghwu. O kpo akpọ rẹ ihwo rẹ ẹwẹn yẹrẹ erivwi-in. Adam vwo ghwu nu, o rhe vwo arhọ-ọ, ọ rha herọ-ọ. Ughwu, ọyen ẹdia rẹ jẹ arhọ e vwo.

 Kẹ ihwo efa ri ghwure vwo? Ayen je hẹ ẹdia rẹ jẹ arhọ e vwo? Baibol na da ta:

  • “Asan ọvo ayen ejobi [te ihworakpọ te eranvwe] ra; iwurhie ayen ejobi nurhe, iwurhie ayen je cha rhoma ra.”—Aghwoghwo 3:20.

  • “Ihwo ri ghwuru riẹn emu ọvuọvo-o.”—Aghwoghwo 9:5.

  • “Ẹguọnọ rayen vẹ ometuo rayen vẹ omẹriọ rayen ghwọrọ kufia nure.”—Aghwoghwo 9:6.

  • “Kidie ushi wọ cha ra na, o vwo iruo-o eyẹ iroro-o eyẹ erianriẹ-ẹn eyẹ aghwanre-e.”—Aghwoghwo 9:10.

  • “Ko rhivwin kpo ekpẹn rọyen; vwẹ ẹdẹ yena ọvuọvo na iroro rọ jẹre ejobi mi ghwru.”—Une Rẹ Ejiro 146:4.

Ihwo ri yerẹn yen se ru emu nana

 Ọ bẹnre wọ vwọ rhọnvwe phiyọ eta ri Baibol nana? Ọ da dia ọtiọyen, gbe roro kpahen ọnana: Vwẹ erua buebun, ọshare na yen wiowian vwọ ghẹrẹ evwruwevwin rọyen. Ọshare na de ghwu, orua rọyen sa rioja. Ọkiọvo, aye rọyen vẹ emọ rọyen rha sa mrẹ igho ro te ayen vwọ ghẹrẹ oma raye-en. Ivwighrẹn rẹ ọshare na ji se shenyẹ ayen. Gba nọ oma wẹn: ‘Ọ da dianẹ ọshare na hẹ asan ọvo yerẹn, diesorọ ọ rha sa ghẹrẹ orua rọye-en? Diesorọ ọ rha sa chochọn rẹ orua rọyen vwo nẹ abọ rẹ ihwo ebrabra-a?’ Kidie, obo ri Baibol na tare yen gbare. Ọshare na rhe vwo arhọ-ọ, kọyen sorọ o rhe se ru emu vuọvo-o.—Une Rẹ Ejiro 115:17.

Ihwo ri ghwuru cha sa vwẹ ukẹcha kẹ ihwo rẹ owẹnvwe hwe yẹrẹ i re shenyẹ-ẹ

Ko mudiaphiyọ nẹ ihwo ri ghwuru na rha sa rhoma dia-a? Ẹjo, ọ dia ọtiọye-en. Avwanre cha tota kpahen evrẹnushi vwẹ obaro obọ. Ẹkẹvuọvo, ihwo ri ghwure cha sa riẹn obo wo ruẹ-ẹ. Ayen cha sa mrẹ wẹ, nyo we, yẹrẹ tota kẹ wẹ-ẹ. Ofori nẹ wọ djoshọ raye-en. Ayen cha sa chọn wẹ uko yẹrẹ wan wẹ oma-a.—Aghwoghwo 9:4; Aizaya 26:14.