Jihova che si erọnvwọn ebrabra eje rẹ Idẹbono soro no karekare. Jihova vwẹ Jesu vwo mu Ovie ro che sun otọrakpọ na eje. Vwẹ otọ rẹ usuon rọyen, otọrakpọ na che hirhe phiyọ iparadaisi.—Daniẹl 7:13, 14; Luk 23:43.

Enana yen oborẹ Jihova veri:

  • EMU CHA VỌN AKPỌ NA: “Akpọ na yovwin emu buebun; Ọghẹnẹ, Ọghẹnẹ rẹ avwanre, o bruphiyọ kẹ avwanre nure.” “E jẹ ọka buebun dia otọ na; vwẹ enu rẹ igbenu na etiyin i de kpogho.”—Une Rẹ Ejiro 67:6; 72:16.

  • IFOVWIN CHE VWOBA: “Yanrhe, wo rhi nughe rẹ iruo rẹ Ọrovwohwo, obo ro ruiruo rẹ ẹghwọrọ vwẹ evun rẹ akpọ na. Ọ nẹrhẹ ofovwin fuen re te oba rẹ akpọ na.”—Une Rẹ Ejiro 46:8, 9.

  • IRUIMWEMWU RHA CHA DIA-A: “Kidie a cha nyavwe oruimwemwu kufia . . . Ọmọke krẹn, oruimwemwu gbe cha dia-a; wọ da tọn ẹro vi otọ ni ẹdia rọyen a gbe cha mrẹ-ẹ.”—Une Rẹ Ejiro 37:9, 10.

  •  EMIAVWE, UVWERI YẸRẸ UGHWU RHA CHA DIA-A: “Etiyin ẹro rẹ orhuẹro ko rhie, erhọn rẹ odierhọn ko phẹn ghwroro; etiyin ukpono ko pho kerẹ uzo, ẹrẹnvwe ro diunu ko so ine rẹ aghọghọ.”—Aizaya 35:5, 6.

    “Ọghẹnẹ ko bru ayen rhe dia, ko ririe ameoviẹ nẹ ẹro rayen, ughwu gbe cha dia ọfa-a, eyẹ omaemuohọ eyẹ oviẹ eyẹ odjadja ọfa-a, kidie emu rẹ awanre na wanvrẹn nure.”—Ẹvwọphia 21:3, 4.

Vwọ fẹnẹ Idẹbono vẹ emekashe rọyen, Jihova vwọrọn efia-an. Ive rọyen eje che rugba. (Luk 1:36, 37) Jihova vwo ẹguọnọ wẹn, ọ je guọnọ nẹ wọ dia Iparadaisi rọyen na. Nokpẹn rẹ uyono ri Baibol mie Iseri ri Jihova wọ sa vwọ riẹn oborẹ Baibol na yonori kpobarophiyọ. Wọ da vwẹ uyota ri Baibol na vwọba akpọ yerin, ko si we nẹ uyono rẹ efian, esegbuyota ro churobọ si uruemu orhan kugbe akpọ rẹ ebri. Ko ji si we nẹ ọviẹn rẹ umwemwu vẹ ughwu vwẹ ọke rọ cha vwẹ obaro. Kerẹ ota ri Jesu: “Ovwan ke riẹn uyota na, uyota na ko ru ovwan phihọ ọmuvwiẹ.”—Jọn 8:32.