Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Ga Jihova, Ọ Dia Eshu-u

Ga Jihova, Ọ Dia Eshu-u

Avwanre eje cha jẹ ojẹ sẹ Jihova yẹrẹ Idẹbono vẹ emekashe rọyen, yen avwanre cha ga. Avwanre cha sa ga Jihova vẹ Eshu kugbe-e. Aghwanre herọ siẹrẹ avwanre da ga Jihova!

Jihova Ọyen Ohwo Esiri

Kirobo re yono re na, oma vwerhen emekashe rẹ Idẹbono siẹrẹ ayen da phiẹn ihwo je wan ayen oma. Ọ dia ọtiọyen Jihova hepha-a. Jihova vwo ẹguọnọ rẹ ihworakpọ kirobo rẹ ọsẹ vwo ẹguọnọ rẹ emọ rọyen. Ọyen re vwẹ “kemu kemu esiri na ejobi” vwọ kẹ ihwo. (Jems 1:17) O si emu esiri ọvuọvo nẹ kẹ ihworakpọ-ọ, o toro obo rọ ghanre kẹ te-e.—Ẹfesọs 2:4-7.

Jesu, rọ dia Ọmọ rẹ Ọghẹnẹ dje ẹguọnọ rọyen phia ro vwo sivwin ihwo re muọga

Roro oborẹ Jesu Ọmọ rẹ Ọghẹnẹ ruru vwẹ otọrakpọ na. Ọ nẹrhẹ idin tota, o rhie ẹro rẹ irhuẹro, o sivwin ehọnvwoti vẹ ikpono, ọ djẹ emekashe rẹ Idẹbono nẹ ihwo oma, o ji sivwin koka koka rẹ ọga. Jesu tobọ reyọ ẹgba rẹ Ọghẹnẹ vwọ rhọnvwọ ihwo ri ghwuru.—Matiu 9:32-35; 15:30, 31; Luk 7:11-15.

Ọghẹnẹ ta uyota ọkieje, ọ vwọrọn ofia-an. Ọ phiẹn ohwo vuọvo-o.—Ukeri 23:19.

 Kẹnoma kẹ Irueru ri Jẹfuọn

Kirobo rẹ ifi-alẹ yọnrọn inyẹ, ọtiọyen emekashe rẹ Idẹbono je vwẹ ifi vwo mu ihwo womarẹ ophiẹnvwe rayen. Ayen nẹrhẹ ihwo djoshọ rẹ ihwo ri ghwuru, emekashe rẹ Idẹbono na, iyorin, ẹbo, kugbe inehweri. Ihwo tiọyena ji vwobọ vwẹ iruemu imiomiovwin efa. Ọtiọyena, Eshu ko sun ayen womarẹ efian vẹ ẹkuruemu echọchọ. Idibo rẹ Ọghẹnẹ che se she ro ifi rẹ Idẹbono nana-a.

Jihova vwo ẹgba vrẹ Eshu shesheri. Wọ da ga Jihova, ọ cha sẹro wẹn nẹ abọ rẹ emekashe rẹ Idẹbono. (Jems 4:7) A cha sa ruan wẹ-ẹn. Kerẹ udje, vwẹ Nigeria, eshare erha re bọepha, duvwun ẹbo rẹ ayen vwo hwe Oseri ri Jihova ọvo rọ rhọnvwe vrẹn nẹ orere raye-en. Ẹkẹvuọvo, oshọ de mu ọvo usun rayen kidie ẹbo na wianre-e, ko bru Oseri na ra, ọ da rẹ nẹ o vwo ghovwo ọyen.

Ihwo rẹ Ẹfesọs torhẹ ẹbe ri majiki rayen

Kperi se Jihova siẹrẹ emekashe rẹ Idẹbono de kpokpo uwe, ọ cha chọn wẹ uko. (Isẹ 18:10) Tavwen Ọghẹnẹ ke sa sẹro wẹn, ku wọ kẹnoma kẹ kemu kemu ro churobọ si uruemu rẹ orhan vẹ ẹga rẹ emekashe rẹ Idẹbono, kirobo rẹ idibo rẹ Ọghẹnẹ rehẹ Ẹfesọs ruru vwẹ ọke awanre. Ayen torhẹ ẹbe ri majiki rayen eje. (Iruo 19:19, 20) O ji fo nẹ idibo rẹ Ọghẹnẹ ru ọtiọyen nonẹna. Ghwọrọ inehweri, “igbele,” ẹbe ri majiki, vẹ kemu kemu wo vwori ro churobọ si uruemu rẹ orhan kufia.

 Ga Ẹga rẹ Uyota

Sioma nẹ ẹga efian, siobọnu obo re brare, rere wọ ga ẹga rẹ uyota. Baibol na dje obo ro mudiaphiyọ:

Kpo omẹvwa rẹ Inene-ri-Kristi.—Hibru 10:24, 25

Yono Baibol na.​—Jọn 17:3

Ghwoghwo ota kẹ ihwo.​—Matiu 24:14

Nẹrhovwo rhe Jihova.​—Filipae 4:6, 7

Bromaphiyame.​—Iruo 2:41

 Kuomakugbe Iseri ri Jihova

Idẹbono vẹ emekashe rọyen vwo ihwo vwẹ otọrakpọ na ri yono ji ru obo re brare. Jihova ji vwo ihwo. E se ayen Iseri ri Jihova. (Aizaya 43:10) Iseri ri Jihova rehẹ akpọneje vrẹ iduduru ẹrenren. Ayen eje davwẹngba vwo ruẹ obo ri yovwirin, ayen ji yono ihwo uyota na. Vwẹ irere buebun, wọ sa mrẹ ayen siẹrẹ wo de kpo Ọguan Ruvie rayen, ayen cha nabọ dede uwe.

Ayen chọn ihwo uko vwọ ga Ọghẹnẹ. Ayen che yono uwe Baibol na vwevunrẹ uwevwin wẹn, rere wọ sa riẹn obo ra ga Jihova vwẹ idjerhe rọ guọnọre. Wọ cha hwosa phiyọ uyono na-a. Oma cha vwerhen Iseri ri Jihova rẹ ayen vwo yono uwe uyota na kidie ayen vwo ẹguọnọ rẹ ihwo, ayen ji vwo ẹguọnọ rẹ Jihova Ọghẹnẹ.

Iseri ri Jihova cha chọn wẹ uko vwọ ga Ọghẹnẹ