Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Ẹvwọsuọ rọ Vwomaphia Vwẹ Obo Odjuvwu

Ẹvwọsuọ rọ Vwomaphia Vwẹ Obo Odjuvwu

Eshu reyọ ọrọdekọ vwọ tota kẹ Ivi, Ivi da vwomaba Eshu vwọso Ọghẹnẹ

Emekashe na eje rẹ Jihova mare yovwirin. Jẹ, ọvo da rhe dia brabra. E se nẹ Eshu yẹrẹ Idẹbono na. Eshu guọnọre nẹ ihworakpọ ga ọyen, ukperẹ ayen vwọ ga Jihova. Ọnana yen obo re phiare:

Irhe buebun hẹ ogba rẹ Idẹn re mọ emamọ evwevwerhen. Jihova vuẹ Adam vẹ aye rọyen Ivi nẹ ayen sa re komamọ komamọ rọhẹ ogba na. Ẹkẹvuọvo, o vwo urhe ọvo rẹ Ọghẹnẹ tare nẹ ayen ria-a. Ọ vuẹ ayen nẹ siẹrẹ ayen da riọ, ayen che ghwu.—Jẹnẹsis 2:9, 16, 17.

Ẹdẹ ọvo rẹ Ivi ọvo vwọ herọ, ọrọdekọ da rhe tota kẹ. Vwọrẹ uyota, ọ dia ọrọdekọ na yen tota-a; Eshu yen ruro rọ vwọ họhọ nẹ ọrọdekọ na yen tota. Eshu da vuẹ Ivi nẹ ọ da re omamọ ra vuẹ rẹ nẹ ọ ria na-a, ko che vwo aghwanre kerẹ Ọghẹnẹ. Ọ je vuẹ nẹ o che ghwu-u. Ẹkẹvuọvo, ọyena ofian. Ivi de se ota rẹ Eshu gbuyota, ọ da re omamọ na. Ọ da je vwẹ evo kẹ Adam re.—Jẹnẹsis 3:1-6.

Womarẹ ikuegbe nana, avwanre yonori nẹ Eshu ọyen ohwo rọ vwọ sua kugbe ọvwọnrofian. Ọ vuẹ Ivi nẹ siẹrẹ ọ da churhi Ọghẹnẹ, o che ghwu-u. Ọyena ofian. Adam vẹ Ivi ghwuru. Ẹkẹvuọvo, Eshu ghwuru vwẹ ọke yena-a, dedena o ji che ghwu, kidie o ru umwemwu. Nonẹna, ọ je phiẹn ihwo. Ọvwọnrofian yen o ruẹ, ọ riẹriẹ ihwo vwọ churhi rẹ Ọghẹnẹ.—Jọn 8:44.

 Emekashe Efa je Vwọso

Ọke vwọ yan obaro na, emekashe efa de ji ru obo re brare. Emekashe nana vwọ mrẹ eya ri vwo erhuvwu vwẹ akpọ na, ayen de vwo urhurusivwe rẹ ayen vwo nene eya na vwerhẹn. Ayen da rhe otọrakpọ na, ayen de wene oma kpẹ ihworakpọ. Ayen da reyọ eya kẹ oma rayen. Ọyena vwọso ọhọre rẹ Ọghẹnẹ.—Jẹnẹsis 6:1, 2; Jude 6.

Emekashe umwemwu rhe otọrakpọ na rhi nene eya gbe ọfanrhiẹn

Ọnana je so okpetu kẹ ihworakpọ mamọ. Eya rẹ emekashe nana de vwiẹ emọ re rho vrẹ ihworakpọ. Ayen da rhe dia erhuaran ri sianro, ri ji gbe ozighi. Ukuotọ rọyen, akpọ na da rhe vọn vẹ ozighi, Jihova de brorhiẹn nẹ ọ cha vwẹ oghwe vwọ ghwọrọ ihwo umwemwu na. Noa rọ dia ọvwata vẹ orua rọyen ọvo, yin sivwin rhọ.​—Jẹnẹsis 6:4, 11; 7:23.

Emekashe umwemwu na ghwuru-u, ayen rhivwin kpo obo odjuvwu. Ẹkẹvuọvo, Ọghẹnẹ vwẹ oja vwọ re ayen. Ọ rhọnvwere nẹ ayen kuomakugbe emekashe evwata na-a. Vwọba, Jihova da reyọ ẹgba rẹ ayen vwo wene oma phiyọ ihworakpọ, mie ayen. Ayen che ghwu vwevunrẹ ẹdjọeguo rode rọ cha na.—2 Pita 2:4; Jude 6.

 A Djẹ Eshu Nẹ Obo Odjuvwu

A djẹ Eshu vẹ emekashe ebrabra rọyen nẹ obo odjuvwu

Vwẹ ọtonphiyọ rẹ ẹgbukpe ujorin rọ wanre na, e phi ofovwin ọvo vwẹ obo odjuvwu. Ọbe rẹ Ẹvwọphia de djisẹ rẹ obo re phiare: “Asaọkiephana ofovwi de rhi she vwẹ obo odjuvwu, Maekẹl [Jesu ra kpare nushi rhe] vẹ emakashe [esiri] rọyen ki nene Okpodje na [Eshu] họnra; Okpodje na vẹ emakashe [ebrabra] rọyen je ghwa họnra, ẹkẹvuọvo e di phi ayen kua a gbe mrẹ asan vwẹ obo odjuvwu rọ gba aye-en. A da djẹ Okpodje rode na rhe otọ, ọrọdekọ rẹ awanre na, re se Idẹbono kugbe Ukọn na, ọphiẹn rẹ akpọ na ejobi—a da djẹ vẹ emakashe rọyen ejobi wontọ.”

Die yin nẹ obuko rọyen rhe? Ikuegbe na je yan obaro: “Ghọghọ, E odjuvwu kugbe ovwan re dia evun rọyen!” Emekashe esiri ke sa ghọghọ, kidie a djẹ Eshu vẹ emekashe ebrabra na nẹ obo odjuvwu re. Kẹ ihworakpọ vwo? Baibol na da ta: “Ekan kẹ ovwan, E akpọ kugbe abadi, kidie Idẹbono wontọ bru ovwan rhire vwẹ evun rẹ ophu rode, fikiridie ọ riẹnre nẹ ọke rọyen pha krẹkrẹ.”—Ẹvwọphia 12:7-9, 12.

Eshu vẹ emekashe rọyen na phiẹn ihwo, je so okpetu kẹ ayen. Ayen ivwighrẹn rẹ Ọghẹnẹ. Ayen evwuvumwemwu.