Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 ẸBẸRE 1

Ẹga na Eje Yin Yono Uyota Na?

Ẹga na Eje Yin Yono Uyota Na?

1. Erhọ yen ẹga evo rehẹ evunrẹ Africa?

IHWO buebun rehẹ Africa rhọnvwere nẹ ofori ravwọ ga Ọghẹnẹ. Ẹkẹvuọvo, obo rẹ ayen ga Ọghẹnẹ wan fẹnẹre. Evo kpẹ ẹga alufa, efa ga edjọ. O ji vwo efa ri kpẹ ishọshi. Jẹ ọ chọre revwo roro nẹ ẹga erha yena yehẹ evunrẹ Africa. Vwevunrẹ ẹga alufa, esegbuyota vẹ irhi rayen fẹnẹ ohwohwo. Obo rẹ ihwo ga edjọ wan fẹnẹre vwẹ asan sansan. Ofẹnẹ rode je herọ vwẹ uvwre rẹ ihwo ri se oma rayen Inene-ri-Kristi. Vwọ vrẹ enana, ẹga efa buebun je herọ vwevunrẹ Africa.

Ẹga Ravwanre Me Diẹ Ọrẹ Uyota

2. (a) Die yin mwu ihwo buebun vwo kpẹ ẹga rẹ ayen hepha na? (b) Kẹ enana djerephia nẹ Ọghẹnẹ rhọnvwe phiyẹ ẹga rayen? Dje kpahọn.

2 Die yin mwu ihwo vwo kpẹ ẹga rẹ ayen hepha na? Buebun rihwo kpẹ ẹga rẹ ọsẹ vẹ oni rayen hepha. Obo re phiare ọke grogron rọ wanre, ọyen mwu ihwoevo vwo kpẹ ẹga rẹ ayen hepha na. Ọbe re se The Africans​—A Triple Heritage da ta: “Ẹga alufa hrabọ te obohwẹre rẹ ọnre rẹ ubrotọ ri Sahara ọke rẹ ayen vwo phi ẹbẹre yena kparobọ, . . . ọtiọyen ẹga rẹ Inene-ri-Kristi je vwọ hrabọ te obọrhen rẹ ọnre rẹ ubrotọ ri Sahara. Ẹga alufa hrabọ ro obohwẹre rẹ ọnre rẹ ubrotọ ri Sahara womarẹ ọlọkọ, ẹga rẹ Inene-ri-Kristi kọ rha hrabọ ruẹ obọrhen rẹ ọnre rẹ ubrotọ ri Sahara womarẹ ọhwunu.” Dede na, ihwo buebun vwo imwẹro nẹ Ọghẹnẹ rhiabọreyẹ ẹga rayen. Ẹkẹvuọvọ, avwanre de kpẹ ẹga rẹ ọsẹ vẹ oni ravwanre, ọ diẹ ọyen ọ vwọ dia ọ ruyota-a, yẹrẹ  keridie nẹ ihwoevo gba esẹ ride ravwanre vwọ reyọ, kọyen ọ je vwọ dia ọ ruyota-a.

3-5. Udje vọ yen sa chọn avwanre uko vwọ riẹn nẹ ọ diẹ ẹga na eje yin yono uyota na-a?

3 Dede nẹ ẹga na eje ta nẹ ayen ga Ọghẹnẹ, jẹ obo rẹ ayen ga wan fẹnẹ ohwohwo. Obo rẹ ayen yono kpahen ọka rohwo rẹ Ọghẹnẹ hepha kugbe obo rọ guọnọ mie avwanre fẹnẹre. Roro kpahen udje nana: Reyọ phiyọ nẹ wọ mrẹ iruo vwevunrẹ ikọpini rode ọvo. Ẹdẹ rẹsosuọ wo vwo kpẹ iruo na, a da vuẹ wẹ nẹ ọga na kpẹ asan. Wọ da nọ ihwo erha re wian vwẹ etiyin kpahen obo rẹ ọga na guọnọre nẹ wo ru. Ọrẹsosuọ da vuẹ wẹ nẹ ọga na guọnọre nẹ wo hwerhe ogba na. Ọrive da vuẹ wẹ nẹ wọ vwẹ ọda vwo gbe uwevwin na. Ọrerha da vuẹ wẹ nẹ, ra ghare ileta kẹ ihwo.

4 Wọ da nọ ayen kpahen okarohwo rẹ ọga na hepha. Ọrẹsosuọ da vuẹ wẹ nẹ ọga na pha grogron, eghene o ruẹ, o ji sianro. Ọrivẹ da vuẹ wẹ nẹ ọga na pha krẹkrẹ, ọ ghwanrire, ohwo esiri o ji ruẹ. Ọrerha da vuẹ wẹ nẹ ọhwo ro vwo ikọpini na diẹ ọshare dede-e, aye yen o ruẹ. Aphro herọ-ọ, wọ cha rhọnvwe nẹ obo rẹ ayen eje tare na cha sa dia uyota-a. Wọ da ghene guọnọ iruo na ru, kẹ wọ cha guọnọ idjerhe ọfa wọ vwọ riẹn ohwo rẹ ọga na ghini hepha, vẹ obo rọ guọnọre nẹ wo ru.

5 Ọtiọyen ẹga je hepha. Ọ vwọ dianẹ ihwo yono erọnvwọn buebun kpahen okarohwo rẹ Ọghẹnẹ hepha vẹ obo rọ guọnọ mie avwanre na, kẹ ofori nẹ avwanre ga Ọghẹnẹ vwẹ iderhe ruyota. Ẹkẹvuọvo mavọ yen avwanre sa vwọ riẹn Ọghẹnẹ vwọrẹ uyota?