Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYOVWINROTA 7

Wo ni Arhọ Ghanghanre Kirobo rẹ Ọghẹnẹ Niro?

Wo ni Arhọ Ghanghanre Kirobo rẹ Ọghẹnẹ Niro?

“Obọ wẹn ọye ogbugbu rẹ arhọ epha.”—UNE RẸ EJIRO 36:9.

1, 2. Okẹ ọghanghanre vọ Jihova vwọ kẹ avwanre?

JIHOVA vwẹ okẹ ọghanghanre ọvo vwọ kẹ avwanre eje. Ọyehẹ okẹ rẹ arhọ. (Jẹnẹsis 1:27) Ọ guọnọre nẹ avwanre yeren omamọ akpọ. Ọtiọyena, ọ da kẹ avwanre odjekẹ re sa nẹrhẹ e bru omamọ orhiẹn. E jẹ a vwẹ odjekẹ nana vwo ruiruo e se vwo “vughe emu esiri vẹ ọbrabra.” (Hibru 5:14) E de ru ọtiọyen, jẹ avwanre vwẹ uphẹn kẹ Jihova nẹ o yono avwanre vwo vwo iroro rọ gbare. Avwanre cha mrẹ ọghanrovwẹ rẹ odjekẹ rẹ Ọghẹnẹ siẹrẹ e de nene ayen je mrẹ erhuvwu rayen vwẹ akpeyeren rẹ avwanre.

2 Ofu se dje ohwo ọkiọvo. Ẹdia evo sa vwomaphia rẹ Baibol na ghwe ji urhi kpahe-en. Kerẹ udje, ọ sa dia ona rẹ omaesivwo ro churobọ si ọbara. Mavọ yen avwanre se vwo brorhiẹn rọ cha nẹrhẹ oma vwerhen Jihova? Baibol na vọnre vẹ odjekẹ re sa nẹrhẹ a riẹn ẹro rẹ Jihova vwo ni ọbara. Avwanre de vwo ẹruọ rẹ odjekẹ nana, ke che brorhiẹn rẹ aghwanre ji vwo omamọ rẹ ẹwẹn obrorhiẹn. (Isẹ 2:6-11) Asaọkiephana, e jẹ a fuẹrẹn evo usun rẹ odjekẹ nana.

ẸRO VỌ YEN ỌGHẸNẸ VWO NI ARHỌ VẸ ỌBARA?

3, 4. (a) Mavọ yen avwanre vwọ riẹn ẹro rẹ Ọghẹnẹ vwo ni ọbara? (b) Die yen ọbara mudiaphiyọ?

3 Baibol na yono avwanre nẹ ọbara pha fuanfon kidie o mudiaphiyọ arhọ na. Vwọba, arhọ pha ghanghanre vwọ kẹ Jihova. Ken vwo hwe oniọvo rọyen nu, Jihova da vuẹ nẹ, “Urhuru rẹ ọbara rẹ oniọvo wẹn kperi nẹ otọ bru vwe rhe.” (Jẹnẹsis 4:10) Ọbara rẹ Ebẹl na mudiaphiyọ arhọ rọyen; Ken reyọ arhọ rẹ Ebẹl kidie o hwere.

4 Oghwe rẹ ọke rẹ Noa vwọ wan nu, Ọghẹnẹ da vuẹ ihworakpọ nẹ ayen sa re eranvwe. Ẹkẹvuọvo, o de ji urhi nana: “Wọ ria uvwo vẹ arhọ rọye-e, kọye ọbara rọye.” (Jẹnẹsis 9:4) Urhi nana shekpahen emọ rẹ Noa eje, ji te avwanre. Ọtiọyena, a sa tanẹ vwẹ ẹro rẹ Jihova ọbara mudiaphiyọ arhọ. Ofori nẹ avwanre je vwẹ ẹro yena vwo no.—Une Rẹ Ejiro 36:9.

5, 6. Mavọ yen Urhi rẹ Mosis vwọ nẹrhẹ a riẹn ẹro rẹ Jihova vwo ni arhọ vẹ ọbara?

5 Vwẹ Urhi rẹ Jihova vwọ kẹ Mosis, ọ da ta: “Ọ da dianẹ ohwo . . . re ọbara, ki mi hirhe opharo mẹ ku ohwo yena rọ re ọbara na, mi mi sio nẹ ohri rẹ ihwo rọye. Kidie arhọ rẹ oma na evun rẹ ọbara na ọ epha.”—Livitikọs 17:10, 11.

6 Urhi rẹ Mosis tare nẹ ohwo de hwe eranvwe fikirẹ emuọre, e jẹ o ku ọbara rọyen kuotọ. Ọnana mudiaphiyọ nẹ a vwẹ arhọ rẹ eranvwe na vwọ kẹ Ọmemama na, Jihova. (Urhi Rivẹ 12:16; Izikiẹl 18:4) Ọ dia Jihova rhẹro rọyen nẹ ihwo rẹ Izrẹl na si ọbara na eje rọhẹ oma rẹ eranvwe na no kare kare-e. Ẹkẹvuọvo  ayen da davwẹngba rayen vwo si ọbara na no, ayen ke sa re eranvwe na vẹ ẹwẹn obrorhiẹn rọ fonro. Ayen de ni ọbara rẹ eranvwe ghanghanre, kọyen ayen muọghọ kẹ Jihova, ohwo rọ ma arhọ na. Urhi na je tanẹ ihwo rẹ Izrẹl vwẹ eranvwe vwo ze izobo fikirẹ evwoghovwo rẹ imwemwu rayen.—Ni Eta rẹ Odjefiotọ 19 vẹ 20.

7. Idjerhe vọ yen Devid vwo djephia nẹ ọbara pha ghanghanre?

7 Avwanre sa mrẹ ọghanrovwẹ rẹ ọbara vwo nẹ oborẹ Devid ruru ọke ro vwo nene ihwo rẹ Filistia họnra. Isodje rẹ Devid mrẹvughe nẹ urhuru rẹ ame sio, ayen de phi arhọ rayen phiyọ ẹdia rẹ imuoshọ rẹ ayen vwọ ro asan rẹ ivwighrẹn rayen hepha re vo ame kẹ Devid. Ẹkẹvuọvo, ayen vwo mu ame na rhe, Devid rhọnvwe da-a, “o de kuo vwọ kẹ Ọrovwohwo.” Devid da ta: “E jo bi nu vwe oma sheri, E Ọrovwohwo ri mi vwo ru ọnana. Me da ọbara rẹ ihwo ri ku uyovwi rayen fia?” Devid riẹn oborẹ arhọ vẹ ọbara ghanre te vwọ kẹ Ọghẹnẹ.—2 Samuẹl 23:15-17.

8, 9. Ẹro vọ yen ofori nẹ Inenikristi vwo ni ọbara nonẹna?

8 Vwẹ ọke rẹ Inenikristi rẹsosuọ, ihwo rẹ Ọghẹnẹ rha vwẹ eranvwe vwo ze izobo-o. Ẹkẹvuọvo, o ji fo nẹ ayen vwẹ ẹro abavo vwo ni ọbara. Ọvo usun rẹ Irhi rẹ Mosis rẹ Jihova je guọnọ nẹ Inenikristi yọnre, ọyehẹ: “Gha . . . ọbara.” Kirobo ra je guọnọ nẹ a gha ọfanrhiẹn vẹ edjọẹgọ.—Iruo Rẹ Iyinkọn Na 15:28, 29.

Mavọ mi se vwo dje orhiẹn-ebro mẹ fiotọ kpahen erọnvwọn ra rhẹ nẹ ẹbẹre ẹne ra ghare ọbara phiyọ?

9 Ọtiọyen ọ je hepha nonẹna. Avwanre riẹnre nẹ Jihova yen Esiri rẹ arhọ, ọyen ji vwo arhọ ejobi. Avwanre je riẹn nẹ ọbara pha fuanfon, o ji mudiaphiyọ arhọ. Ọtiọyena, e jẹ a fuẹrẹn odjekẹ rẹ Baibol  siẹrẹ avwanre de che brorhiẹn rẹ omaesivwo ro shekpahen ọbara.

OBO RA REYỌ ỌBARA VWO RUIRUO WAN VWẸ OMAESIVWO

10, 11. (a) Ẹro vọ yen Iseri rẹ Jihova vwo ni ẹreyọ rẹ ọbara vẹ ẹbẹre ẹne ra ghare ọbara phiyọ? (b) Orhiẹn romobọ vọ yen Onenikristi ọvuọvo che bru?

10 Iseri rẹ Jihova riẹnre nẹ ra vwọ “gha . . . ọbara” vrẹ a vwọ riọ je da. O ji mudiaphiyọ nẹ e che se ọbara phiyọ oma-a, a cha vwẹ ọbara rẹ avwanre vwọ kẹ ihwo efa-a, yẹrẹ sẹro rẹ ọbara rẹ avwanre phiyọ asan rere a vwọ rhoma se phiyọ oma avwanre-e. O ji mudiaphiyọ nẹ a cha reyọ ẹbẹre ẹne ra ghare ọbara phiyọ-ọ, re dia red cells, white cells, platelets, kugbe plasma.

11 A je sa rhẹ erọnvwọn efa vwo nẹ ẹbẹre ẹne ra ghare ọbara phiyọ na. Onenikristi ọvuọvo yen che brorhiẹn sẹ ọ cha reyọ erọnvwọn ra rhẹre na. Ọtiọyen ọ je hepha kpahen ona rẹ omaesivwo ro churobọ si ọbara romobọ ohwo. Ohwo ọvuọvo yen che brorhiẹn rẹ obo ra cha vwẹ ọbara rọyen vwo ru vwẹ ọke rẹ oma-ẹbẹrẹ, ra vwọ davwan ọbara nẹ, yẹrẹ ona rẹ omaesivwo evo ra mrẹ nonẹna.—Ni Eta rẹ Odjefiotọ 21.

12. (a) Diesorọ orhiẹn ro shekpahen ẹwẹn obrorhiẹn vwo fiemu kẹ Jihova? (b) Mavọ yen e se vwo brorhiẹn romobọ ro shekpahen ona rẹ omaesivwo?

12 Orhiẹn ro shekpahen ẹwẹn obrorhiẹn romobọ fiemu kẹ Jihova? E, o fiemu kẹ. Jihova guọnọ riẹn iroro rẹ avwanre. (Se Isẹ 17:3; 24:12.) Ọ vwọ dia ọtiọyena, avwanre de che brorhiẹn rẹ ona rẹ omaesivwo,  ofori nẹ a nẹrhovwo kpahen odjekẹ rẹ Jihova, ji ru ehiahiẹ kpahen omaesivwo na. E de ru ọyena nu, ka cha vwẹ ẹwẹn obrorhiẹn ra vwẹ Baibol vwo yono na vwo brorhiẹn na. Ofori nẹ a nọ ihwo efa kpahen oborẹ ayen che ru ayen da hẹ ẹdia rẹ avwanre na-a, yẹrẹ e jẹ ihwo efa brorhiẹn kẹ avwanre-e. “Kidie, dohwo doghwa rọye gba cha ghwa.”—Galesha 6:5; Rom 14:12.

IRHI RẸ JIHOVA DJEREPHIA NẸ O VWO ẸGUỌNỌ RẸ AVWANRE

13. Die avwanre yono nẹ irhi vẹ odjekẹ rẹ Jihova ri shekpahen ọbara?

13 Kemu kemu rẹ Jihova vuẹ avwanre nẹ e ru, ọ tare nẹ e ruo fikirẹ erhuvwu romobọ rẹ avwanre, o ji djephia nẹ o vwo ẹguọnọ rẹ avwanre. (Une Rẹ Ejiro 19:7-11) Avwanre yọnrọn irhi rẹ Ọghẹnẹ kidie avwanre vwo ẹguọnọ rọyen, ọ ghwa dia fikirẹ erere ro che te avwanre-e. Ẹguọnọ nana kọyen mu avwanre vwọ kẹnoma kẹ ẹreyọ rẹ ọbara. (Iruo Rẹ Iyinkọn Na 15:20) Ọnana je sẹro rẹ arhọ rẹ avwanre. Ihwo buebun nonẹna riẹn kpahen imuoshọ re herọ re vwo se ọbara phiyọ oma, idọktọ buebun je riẹn nẹ ra vwọ bẹrẹ ohwo ababọ rẹ ọbara yen me yovwin. Vwọrẹ uyota, idjerhe rẹ Jihova ghene vọn vẹ aghwanre kugbe ẹguọnọ.—Se Aizaya 55:9; Jọn 14:21, 23.

14, 15. (a) Irhi vọ yen Jihova vwọ kẹ ihwo rọyen re sẹro rayen? (b) Ẹdia efa vọ yen a da sa vwẹ irhi nana vwo ruiruo?

14 Ọkieje yen irhi rẹ Ọghẹnẹ vwọ ghwa erhuvwu vwo rhe ihwo rọyen. Jihova vwẹ irhi kẹ ihwo rẹ Izrẹl re sẹro rayen vwo nẹ omaẹwan. Kerẹ udje, ọvo usun  rẹ irhi na tare nẹ ohwo da bọn uwevwin ọ me bọn igbẹhẹ otete riariẹ ọkọkọ rẹ enu uwevwin na, rere ohwo vwo je she nẹ uwevwin na. (Urhi Rivẹ 22:8) Urhi ọfa shekpahen eranvwe. Ohwo ro vwo erhuẹn rọ djoma, e jẹ ọ nabọ churo rere o vwo jẹ omaẹwan ẹsuọ kẹ ihwo yẹrẹ o vwo jẹ ohwo ehwe. (Eyanno 21:28, 29) Ohwo rẹ Izrẹl rha yọnrọn irhi nana-a, kọyen a cha yọnre siẹrẹ ohwo de ghwu fikirẹ rọyen.

15 Urhi na nẹrhẹ a riẹn nẹ arhọ pha ghanghanre kẹ Jihova. Mavọ yen ofori nẹ ọnana djobọte avwanre wan? E jẹ e djephia nẹ avwanre ni arhọ ghanghanre womarẹ oborẹ uwevwin yẹrẹ imoto avwanre hepha, oborẹ a gua imoto wan, vẹ ehẹha ri je avwanre. Ihwo evo, ma rho ighene na, roro nẹ emu vuọvo cha sa phia kẹ aye-en, kọ nẹrhẹ ayen vwẹ arhọ vwọ heha. Ọ dia ọtiọyen Jihova guọnọ nẹ avwanre ru-u. Ọ guọnọre nẹ avwanre ni arhọ rẹ avwanre vẹ ọ rẹ ihwo efa ghanghanre.—Aghwoghwo 11:9, 10.

16. Ẹro vọ yen Jihova vwo ni evun-ẹkpanrọ?

16 Arhọ rẹ ihworakpọ eje pha ghanghanre kẹ Jihova. Arhọ rẹ ọmọ re ji vwiẹ dede-e je ghanre kẹ. Vwẹ Urhi rẹ Mosis, ohwo da wan aye vẹ evun oma kpregede, aye na yẹrẹ ọmọ na de ghwu, Jihova niro nẹ ohwo na dẹ ozighẹ. Ọnana djerephia nẹ dede nẹ obọ chọ ohwo na, jẹ e niro nẹ o hwe ohwo, ko ji fo nẹ a hwosa rẹ arhọ na. (Se Eyanno 21:22, 23.) Ọghẹnẹ niro nẹ ọmọ re ji vwiẹ dede-e, jẹ ohworakpọ dẹn. Ẹro vọ kọyen wo vwo ni evun-ẹkpanrọ? Mavọ yen  wo rori nẹ oma che ru Ọghẹnẹ siẹrẹ ọ da mrẹ iduduru rẹ emọ re hwe kukpe kukpe womarẹ evun-ẹkpanrọ?

17. Die yen sa nẹrhẹ ẹwẹn rẹ ohwo rọ kpanre evun tavwen ọ ke mrẹ Jihova vughe totọ?

17 Kẹ ọ da dianẹ ohwo kpanre evun tavwen ọ ke mrẹ Jihova vughe vwo? O se vwo imuẹro nẹ Jihova se vwo ghovwo womarẹ izobo rẹ Jesu. (Luk 5:32; Ẹfesọs 1:7) O rhe fo nẹ ẹwẹn rẹ ohwo ọtiọyen kpokpo siẹrẹ o de kurhẹriẹ nu-u. “Ọrovwohwo vọnre vẹ arodọvwẹ vẹ ehrọre . . . Kirobo rẹ obaro ọnre sheri te kẹ obuko ọnre na, ọtiọye o ji si ogbeku rẹ avwanre nu sheri te kẹ avwanre.”—Une Rẹ Ejiro 103:8-14.

KẸNOMA KẸ IRORO RẸ UTUOMA

18. Diesorọ o vwo fo nẹ a davwẹngba vwo si iroro rẹ utuoma nẹ ubiudu avwanre?

18 Ubiudu rẹ avwanre yen ọghọemuo vwọ kẹ okẹ rẹ arhọ da tuanphiyọ. Ọnana churobọ si iroro rẹ avwanre kpahen ihwo efa. Ọyinkọn Jọn de si: “Ohwo kohwo rẹ ivun rẹ omoni rọye miovwiri yẹ ozighẹ o ruẹ.” (1 Jọn 3:15) E rhe nomaso-o, ivuemiovwo tiọyena se hirhephiyọ utuoma ọgangan. Utuoma sa nẹrhẹ e yinvwaro kpahen ihwo efa, ta eta rẹ efian kpahen ayen, yẹrẹ tobọ guọnọ nẹ ayen ghwu. Jihova riẹn oborẹ avwanre roro kpahen ihwo efa. (Livitikọs 19:16; Urhi Rivẹ 19:18-21; Matiu 5:22) Avwanre de noso nẹ avwanre vwo iroro rẹ utuoma kpahen ohwo ọvo, ofori nẹ a davwẹngba vwo sio no.—Jems 1:14, 15; 4:1-3.

19. Mavọ yen ofori nẹ ẹro rẹ Jihova vwo ni ozighi djobọte avwanre wan?

19 O ji vwo idjerhe ọfa re se vwo djephia nẹ avwanre ni arhọ ghanghanre. Vwẹ Une Rẹ Ejiro 11:5, avwanre yonori nẹ Jihova vwo utuoma “kpahe ohwo  ro gbe ozighi.” Avwanre de nughe rẹ ozighi, o se djephia nẹ avwanre vwo ẹguọnọ rẹ ozighi. Ukperẹ avwanre vwo phi eta, iroro vẹ ihoho rẹ ozighi phiyọ ẹwẹn avwanre, ofori nẹ e phi omamọ iroro rọ vọnre vẹ ufuoma phiyọ ẹwẹn avwanre.—Se Filipae 4:8, 9.

KẸNOMA KẸ IKOKO RI JẸ ỌGHỌ EMUO KẸ ARHỌ

20-22. (a) Ẹro vọ yen Jihova vwo nẹ akpọ rẹ Eshu nana? (b) Mavọ yen ihwo rẹ Ọghẹnẹ se vwo djephia nẹ ayen “dia e rẹ akpọ na-a”?

20 Akpọ rẹ Eshu nana muọghọ kẹ arhọ-ọ, ọtiọyena Jihova niro nẹ ọ riabe rẹ ọbara. Vwẹ ikpe buebun rhire na, ihwo ri suẹn so ughwu rẹ iduduru rẹ ihwo, ji te idibo rẹ Jihova. Vwẹ Baibol na, a vwẹ eranvwe re djoma vwo dje isuesun rẹ akpọ nana. (Daniẹl 8:3, 4, 20-22; Ẹvwọphia 13:1, 2, 7, 8) Eki rode ọvo rẹ ihwo chua nonẹna yen ẹshẹ rẹ ekuakua rẹ ofovwin. Ọ dia ọmọrhiẹ erere yen ihwo mrẹ nẹ ekuakua nana cha-a. Vwọrẹ uyota, “akpọ na ejobi hẹ obo rẹ ogangan rẹ ohwo umwemwu na.”—1 Jọn 5:19.

21 Ẹkẹvuọvo, Inenikristi rẹ uyota “dia e rẹ akpọ na-a.” Ihwo rẹ Jihova vwobọ vwẹ oseghe rẹ usuon vẹ ofovwi-in. Ayen hwe ihwo-o, ayen ji biẹcha ikoko ri hwe ihwo-o. (Jọn 15:19; 17:16) E de muẹkpahen Inenikristi, ayen gbe ozighi-i. Jesu tare nẹ e vwo ẹguọnọ rẹ ivwighrẹn rẹ avwanre.—Matiu 5:44; Rom 12:17-21.

22 Ẹga ji vwobọ vwẹ ughwu rẹ iduduru rẹ ihwo. Ọke rẹ Baibol na vwọ ta ota kpahen Babilọn Rode, rọ dia okugbe rẹ ẹga rẹ efian eje, ọ da ta: “A da rhe mrẹ ọbara rẹ emraro na kugbe ihwo efuanfon na vwẹ  evun wẹn kugbe ayen otu re hweri vwẹ akpọ na.” O muẹro nẹ wọ rhe riẹn oboresorọ Jihova vwọ vuẹ avwanre nẹ “Vrẹn no rhe, ihwo mẹ.” Ihwo re ga Jihova dia ẹbẹre ọvo rẹ ẹga rẹ efia-an.—Ẹvwọphia 17:6; 18:2, 4, 24.

23. Die yen o churobọ si re vwo ‘vrẹn nẹ’ Babilọn Rode?

23 Re vwo “vrẹn” nẹ Babilọn Rode churobọ si re vwo dje phephẹn nẹ avwanre siomanu ẹga rẹ efian kare kare. Kerẹ udje, jẹ o mu avwanre ẹro nẹ e si odẹ rẹ avwanre nẹ ẹga rayen. Jẹ ọ vrẹ ọtiọyen. O ji fo nẹ e vwo utuoma rẹ erọnvwọn ebrabra rẹ ẹga rẹ efian ruẹ, a me je sen ayen. Ẹga rẹ ẹfian vwẹ uphẹn kẹ ọfanrhiẹn, oseghe rẹ usuon, vẹ urhuru; ayen ji titi erọnvwọn nana. (Se Une Rẹ Ejiro 97:10; Ẹvwọphia 18:7, 9, 11-17) Vwẹ ikpe evo rhire na, iduduru rẹ ihwo yen ghwuru fikirẹ erọnvwọn nana.

24, 25. Siẹrẹ a da nabọ riẹn Jihova, mavọ yen ọ sa vwọ kẹ avwanre ufuoma vẹ omamọ rẹ ẹwẹn obrorhiẹn?

24 Vwẹ idjerhe ọvo yẹrẹ ọfa avwanre eje ji ke vwobọ vwẹ erọnvwọn ebrabra rẹ akpọ na tavwen a ke rhe riẹn Jihova. Ẹkẹvuọvo, avwanre wene re. Avwanre rhiabọreyọ ọtanhirhe na ji vwomakpahotọ vwọ kẹ Ọghẹnẹ re. Avwanre vwo “omamọ rẹ eyere . . . rẹ Ọrovwohwo na.” Avwanre vwo ufuoma vẹ omamọ rẹ ẹwẹn obrorhiẹn kidie avwanre riẹnre nẹ avwanre ru ọhọre rẹ Ọghẹnẹ.—Iruo Rẹ Iyinkọn Na 3:19; Aizaya 1:18.

25 Ọ da tobọ dianẹ a ka dia evunrẹ ukoko ro muọghọ kẹ arhọ-ọ, Jihova se vwo ghovwo avwanre womarẹ ọtanhirhe na. Oma nabọ vwerhen avwanre  kpahen okẹ rẹ arhọ rẹ Jihova vwọ kẹ avwanre. E se dje omavwerhovwẹn na phia siẹrẹ a da davwẹngba rẹ avwanre eje vwọ vwẹ ukẹcha kẹ ihwo efa vwo yono kpahen Ọghẹnẹ, ayen vwọ kẹnoma kẹ akpọ rẹ Eshu nana ji vwo uvi rẹ oyerinkugbe vẹ Ọghẹnẹ.—2 Kọrẹnt 6:1, 2.

VUẸ IHWO EFA KPAHEN UVIE NA

26-28. (a) Iruo rẹ oghẹresan vọ yen Jihova vwọ kẹ Izikiẹl? (b) Die yen Jihova guọnọ mie avwanre nonẹna?

26 Vwẹ ọke rẹ ihwo rẹ Izrẹl, Jihova da vuẹ ọmraro Izikiẹl nẹ ọ vwẹ orhọesio vwọ kẹ ihwo nẹ a cha ghwọrọ Jerusalẹm kẹrẹkpẹ, o mi ji yono ayen obo ro fori nẹ ayen ru ayen sa vwọ rhọ. Izikiẹl rhe si ihwo na orhọ-ọ, Jihova cha nọ orhiẹn kpahen arhọ rẹ ihwo na. (Izikiẹl 33:7-9) Izikiẹl davwẹngba rọyen eje vwọ vuẹ ihwo na ovuẹ ọghanghanre yena kidie o ni arhọ ghanghanre.

27 Jihova je vuẹ avwanre nẹ e si ihwo orhọ kpahen oghwọrọ rẹ akpọ rẹ Idẹbono nana, a me je vwẹ ukẹcha kẹ ayen vwọ riẹn Jihova rere ayen sa vwọ ro akpọ kpokpọ na. (Aizaya 61:2; Matiu 24:14) E jẹ a davwẹngba avwanre eje vwọ vuẹ ihwo efa kpahọn. Avwanre guọnọ ta oborẹ Pọl tare: “Abọ mẹ pha fuanfon kpahe ọbara rẹ ovwan ejobi, kidie mi sioma reyọ vwo jẹ iroro rẹ Ọghẹnẹ e dje kẹ ovwa-an.”—Iruo Rẹ Iyinkọn Na 20:26, 27.

28 O ji vwo ẹdia efa vwẹ akpeyeren a da guọnọ nẹ avwanre fon. E jẹ a fuẹrẹn evo vwẹ uyovwinrota rọ vwọ kpahen ọnana.