OBORESORỌ Ọ VWỌ GHANRE

Siẹrẹ wẹ vẹ ọsẹ kugbe oni wẹn da riẹn ruẹ kuẹgbe, akpeyeren wẹn ko yovwinphiyọ.

DIE WO CHE RU?

Vwẹ ẹro roro udje nana: Vwẹ ason rẹ Wednesday, Geoff rọhẹ ẹgbukpe 17 wian owian rẹ uwevwin rọyen nure, ọtiọyena, ọ guọnọ rovwonma! O de chidia agbara ro me je, ọ da vwẹ TV vwo mu.

Vwẹ ọke yena, ọsẹ rọyen da mrẹ, ẹkẹvuọvo oma vwerhen rọ-ọ.

“Geoffrey! Diesorọ wọ vwọ ghwọrọ ọke vwo nughe rẹ TV, ukpe wọ vwọ vwẹ ukẹcha kẹ oniọvo wẹn otete vwo ruiruo ra vwọ kẹ vwẹ isikuru? O vwo ọke vuọvo wo vwo ru obo ra vuẹ wẹ-ẹ!”

Geoff de brenu nẹ “o rhe muphiyọ re,” ọsẹ rọyen nyo obo rọ tare na.

Ọsẹ rọyen de sikẹrẹ, ọ da ta: “Die wọ tare na?”

Geoff da fiunu kpahen kẹ nẹ “me ta ota vuọvo-o.”

Asaọkiephana, ivun miovwo ọsẹ na re. Ọsẹ na de si Geoff orhọ, “wọ rha davwọn ta ota kẹ wẹ ọtiọyen ọfa rẹ!”

Ọ da dia owẹ yen Geoff, die wo re ru vwọ kẹnoma kẹ ẹdia nana?

FỌ WO RORO!

Wẹ vẹ ọsẹ kugbe oni wẹn vwọ ta ota kugbe họhọ ra vwọ djẹ imoto. Wọ da djẹ te asan rẹ orọnvwọn de she gbere idjerhe, wọ cha guọnọ asan ọfa wan.

 KERẸ UDJE:

Ọmọtẹ ọvo re se Leah tare nẹ, “Ọ pha bẹnbẹn rẹ mẹvwẹ vẹ ọsẹ mẹ vwọ ta ota kugbe. Ọkiọvo, me da ta ota kẹ, kọ cha vuẹ vwẹ nẹ ‘wọ ghwọ-ọ, wọ ta ota kẹ vwẹ jovwo?’”

LEAH VWO ERỌNVWỌN ERHA RO SE RU.

  1. Ọ sa van ku ọsẹ rọyen.

    Leah da van, “Wọ nyo vwe! Obo me cha vuẹ wẹ na pha ghanghanre!”

  2. Ọ sa dobọ rẹ ota ẹta kẹ ọsẹ rọyen ji.

    Leah rha rhọnvwe ta ota kẹ ọsẹ rọyen kpahen ebẹnbẹn rọyen ọfa-a.

  3. Ọ sa hẹrhẹ ọke ro shephiyọ rọ vwọ rhoma vwẹ ota na phia.

    Leah guọnọ ọke ọfa vwọ ta ota kẹ ọsẹ rọyen, yẹrẹ si ileta kẹ kpahen ebẹnbẹn rọyen.

Ọ vọ yen wọ cha vuẹ Leah nẹ o ru?

RORO: Orọnvwọn ọfa mu ẹwẹn rẹ ọsẹ rẹ Leah reyọ, kọyensorọ ọ rha riẹn kpahen ofudjevwe rẹ Lea-ah. Ọtiọyena, Leah da jẹ Ojẹ 1, ọsẹ na cha sa riẹn oboresorọ rẹ Leah vwọ va-an. Ojẹ nana cha sa nẹrhẹ ọsẹ rẹ Leah kerhọ kẹ eta rẹ Lea-ah, o ji che dje ọghọ phia kẹ ọsẹ na-a. (Ẹfesọs 6:2) Vwọrẹ uyota, ohwo vuọvo cha sa mrẹ erere vwo nẹ ojẹ nana rhe-e.

Kirobo rẹ wọ cha nẹrhẹ oyan wẹn vwo oba vwẹ asan rẹ orọnvwọn de gbere idjerhe na-a, wọ sa guọnọ idjerhe rẹ wẹ vẹ ọsẹ kugbe oni wẹn vwo ru kugbe

Dede nẹ ọhọhọre nẹ Ojẹ 2 yen ma lọhọ, jẹ ọ dia ọyen me yovwi-in. Diesorọ? Kiridie Leah ki se phi ebẹnbẹn rọyen kparobọ, ofori nẹ ọ ta ota kẹ ọsẹ rọyen. Ọsẹ na ke sa vwẹ ukẹcha vwọ kẹ, ko ji fo nẹ ọ riẹn obo re phia vwẹ akpeyeren rẹ Leah. Rọ vwọ fọ cha sa vwẹ ukẹcha phia-a.

Ẹkẹvuọvo, Leah da jẹ Ojẹ 3, kọyen ọ vwẹ uphẹn vwọ kẹ orọnvwọn ro she gbere idjerhe rọyen nẹ ọ vwẹ oyan rọyen vwo te oba-a. Ukperẹ ọtiọyen, ọ davwẹngba rọ vwọ ta ota kpahọn ọkiọfa. Ọ da rha jẹ ojẹ ro vwo si ileta kẹ ọsẹ rọyen, ọnana sa nẹrhẹ ẹwẹn rọyen totọ ugege yena.

Ọkiọvo, ileta na sa vwẹ ukẹcha vwọ kẹ vwo si obo rọ ghene guọnọ ta. Ọke rẹ ọsẹ na de se ileta na, kọ cha riẹn oborẹ Leah guọnọ vuẹ, ọnana sa nẹrhẹ ọsẹ na nabọ riẹn obo ri kpokpo Leah. Ọtiọyena, Ojẹ 3 che fi erere kẹ Leah vẹ ọsẹ rọyen. Owenẹ ọ ta ota kẹ, yẹrẹ o si ileta kẹ, ojẹ nana shephiyọ uchebro rẹ Baibol na rọ tare nẹ “nene idjerhe rẹ ufuoma.”—Rom 14:19.

Ọ rhọ yen ojẹ ọfa rẹ Leah sa jẹ?

Davwen sẹ wo se roro kpahen ojẹ ọvo, rere wo roro kpahen obo ri se nẹ obuko rẹ ojẹ yena rhe.

 Kẹnoma Kẹ Eta Re Se Vwo Ẹruọ Rayen Vwẹ Idjerhe Ivẹ

Karophiyọ nẹ obo wọ tare vẹ oborẹ ọsẹ kugbe oni wẹn vwo ẹruọ rọyen cha sa dia ọvuọvo ọkieje-e.

KERẸ UDJE:

Ọsẹ vẹ oni wẹn nọ wẹ oboresorọ wo vwo muomaphiyọ. Wọ da ta, “Emu vuọvo-o.”

Ẹkẹvuọvo, oborẹ ọsẹ vẹ oni wẹn vwo ẹruọ rọyen kẹ ọna: “Me vwẹroso ovwan te asan rẹ me da ta obo rehẹ ẹwẹn mẹ kẹ ovwa-an. Me sa ta obo rehẹ ẹwẹn mẹ kẹ igbeyan mẹ, ọ dia ovwa-an.”

Vwẹ ẹro roro nẹ wo hirharoku ebẹnbẹn, ọsẹ yẹrẹ oni wẹn kọ guọnọ vwẹ ukẹcha kẹ wẹ. Ẹkẹvuọvo, wọ da ta: “Wo brudu-u. Mi se ruo komobọ mẹ.”

  • Die yen ọsẹ yẹrẹ oni wẹn se nyo?

  • Ẹkpahọnphiyọ ro shephiyọ vọ wọ sa vwọphia?