Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Ẹkpahọnphiyọ rẹ Enọ 10 rẹ Ighene Nọ

 ONỌ 6

Mavọ Mi Se Vwo Mudia Vwọso Ọnyẹ rẹ Otu?

Mavọ Mi Se Vwo Mudia Vwọso Ọnyẹ rẹ Otu?

OBORESORỌ Ọ VWỌ GHANRE

Wọ da riẹn obo wo ruẹ, kẹ wo se sun akpeyeren wẹn, ukperẹ ihwo efa vwo suon kẹ wẹ.

DIE WO CHE RU?

Vwẹ ẹro roro udje nana: Ọke rẹ emọ rẹ isikuru rọyen ivẹ vwọ yan cha, udu de bru Brian. Abọ ivẹ vwevunrẹ udughwrẹn nana yen ayen davwẹngba ayen vwọ riẹriẹ vwo phopho isigati re. Ọna kẹ ọ rẹ abọ rerha.

Ọmọshare rẹsosuọ da ta:

“Wọwẹ ọvo yen he etinẹ? Ji mi dje orọnvwọn ọvo kẹ wẹ.”

Ọke rọ vwọ vuẹ kpahen “orọnvwọn” na, jẹ ọ hwẹ, ọ da reyọ nẹ ekpu rẹ ewun rọyen rhe, ọ da riẹn vwọ kẹ.

Brian mrẹ isigati na vwẹ obọ rẹ ọmọshare na. Udu ro bro na da rhoma ganphiyọ.

Brian da ta. “Wọ ghwọ-ọ, me vuẹ wẹ jovwo re nẹ me guọnọ . . .”

Ọmọshare rivẹ na de gbe ota phiyọ unu: “Wọ djẹ oshọ nọ!”

Brian de fiudugberi ta. “Oshọ mu vwe-e!”

Ọmọshare rivẹ na da ghwobọ kpahen igabọ rẹ Brian. Ọ da vuẹ vẹ upho re bọrọ bọrọ “ghwa reyọ.”

Ọmọshare rẹsosuọ na da riẹn isigati na kẹre opharo rẹ Brian, ọ da ta: “Avwanre cha vuẹ ohwo vuọvo-o. Ohwo vuọvo ji che nyo kpahọ-ọn.”

Ọ da dia owẹ yen Brian, die wo che ru?

 FỌ WO RORO!

Emeshare na ghini roro kpahen oborẹ ayen ruẹ na? Ayen brorhiẹn romobọ re? Ọkiọvo ayen ji rhi ru ọtiọye-en. Ayen vwẹ uphẹn vwọ kẹ otu rayen nẹ i sun ayen. Ayen guọnọ vwomaba otu, ọtiọyena ayen da vwẹ uphẹn kẹ ihwo efa nẹ i sun ayen.

Wọ da mrẹ oma wẹn vwevunrẹ ẹdia tiọyena, mavọ wọ sa vwọ jẹ ojẹ rọ fẹnẹre, ji mudia vwọso ọnyẹ rẹ otu?

  1. MUEGBE PHIYOTỌ

    Baibol na da ta: “Ọvwiroro da mrẹ ukpokpogho rọ cha ko sioma rọye reyọ; ẹkẹvuọvo ẹkpa da họrhọ ruọ, kọ re oja.”—Isẹ 22:3.

    Ọke buebun, wọ sa riẹn nẹ okpetu cha. Kerẹ udje, wọ kpaẹro mrẹ emọ rẹ isikuru wẹn ri phopho isigati. Wo de roro kpahen obo re sa phia, ku wo muegbe hẹrhẹ.

  2. RORO

    Baibol na da ta: “Jẹ evun wẹn fon.”—1 Pita 3:16.

    Nọ oma wẹn, ‘Die yen che nẹ obuko rọyen rhe siẹrẹ mi de gbe nene otu na?’ Vwọrẹ uyota, wọ sa vrabọ rẹ ẹvwọsua rayen ọmọke krẹn. Ẹkẹvuọvo mavọ oma che ru we obọ? Wọ choma wo vwo ku oka re vwo vughe uwe kufia kidie nẹ wọ guọnọ ru obo re cha vwerhen emọ rẹ iklasi wẹn oma?—Eyanno 23:2.

  3. BRORHIẸN

    Baibol na da ta: “Ọvwaghwanre soma bruche.”—Isẹ 14:16.

    O kriri o vwori-i avwanre che brorhiẹn, ji hirharoku obo ri che nẹ obuko rọyen rhe. Baibol na vuẹ avwanre kpahen eshare kerẹ Josẹf, Job, kugbe Jesu, re jẹ ojẹ ri shephiyọ. Ọ je vuẹ avwanre kpahen ihwo kerẹ Ken, Isọ, kugbe Judas, re jẹ ojẹ ri shephiyọ-ọ. Die wo che ru?

Baibol na da ta: “Ru ọ rẹ esiri.” (Une Rẹ Ejiro 37:3) Ọ da dianẹ wo roro kpahen obo ri che nẹ obuko rọyen rhe, ji brorhiẹn wẹn nure, kọ lọhọ wọ vwọ ta obo rehẹ ẹwẹn wẹn, wọ je cha mrẹ erere.

Wo brudu-u, a guọnọ eta buebu-un. ẸJO ọvo teri. Yẹrẹ wọ da guọnọ nẹ ayen riẹn nẹ wo che se wene oborẹ wọ tare na-a, wọ sa ta:

  • “Mi che se ruo-o!”

  • “Mi ru oka rẹ emu tiọyena-a!”

  • “Wọ riẹnre ọ!”

Obo ri me yovwin ọyen ẹkpahenphiyọ re kpatakpata vẹ imuẹro. Wo de ru ọtiọyen, o che gbewunu nẹ otu wẹn cha kẹnoma kẹ wẹ!

 Hirharoku Ehwẹjẹ

Wọ da vwẹ uphẹn kẹ ọnyẹ rẹ otu, wọ cha họhọ irọbọtu rẹ ayen suẹn cha suẹn kpo

Otu wẹn da vwẹ owẹ jehwẹ vwo? Ayen da tanẹ, “Die yen ru we, oshọ mu we?” Riẹn nẹ oka rẹ ehwẹjẹ nana ọyen ọnyẹ rẹ otu ọfa. Die yen cha dia ẹkpahọnphiyọ wẹn? Ọ da hanvwe mamọ, wo vwo ojẹ ivẹ.

  • Wo sa rhọnvwe nẹ oshọ mu we. (“Obo wọ tare na gbare, oshọ mu vwe!” Gba vuẹ oboresorọ wọ vwọ ta ọtiọyen.)

  • Wọ sa vuẹ nẹ oshọ mu we-e. Gba vuẹ oboresorọ wọ vwọ sen, vuẹ vwẹ idjerhe ro de roro kpahọn. (“Mi rorori nẹ ofori ohwo kerẹ owẹ na vwo phopho isigati-i!”)

Otu wẹn da je vwẹ owẹ jehwẹ, yan nẹ etiyin! Karophiyọ, wọ da dia etiyin krinọ, ọnyẹ na cha ganphiyọ. Wọ da yan nẹ etiyin, jẹ wo djephia nẹ wọ vwẹ uphẹn kẹ ihwo efa nẹ i wene oka rẹ ohwo ru wọ hepha-a.

Vwọrẹ uyota, wo che hirharoku ọnyẹ rẹ otu. Ẹkẹvuọvo, wo se brorhiẹn rẹ oborẹ wo che ru, ta obo rehẹ ẹwẹn wẹn, ji sun ẹdia na. Ukuotọ rọyen, ojẹ na ọwẹn!—Joshua 24:15.