Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Ẹkpahọnphiyọ rẹ Enọ 10 rẹ Ighene Nọ

 ONỌ 2

Diesorọ Me Vwọ Ro Ẹwan Kpahen Ugboma Mẹ?

Diesorọ Me Vwọ Ro Ẹwan Kpahen Ugboma Mẹ?

OBORESORỌ Ọ VWỌ GHANRE

Ọ dia oborẹ wọ mrẹ vwẹ ughegbe yen ma ghanre-e.

DIE WO CHE RU?

Vwẹ ẹro roro udje nana: Kọke kọke rẹ Julia de ni ughegbe, kọ mrẹ oma rọyen nẹ ọ rhuoma nọ. Dede nẹ ọsẹ vẹ oni kugbe igbeyan rọyen vuẹ nẹ “ọ pha dọn dọn,” Julia je tanẹ “ofori nẹ mi siame emerha.”

O ghwe rhi kri nọ-ọ na, Julia roro kpahen obo ro se ru rere “o vwo siame emerha.” O de chiri owẹnvwe vwẹ ẹdẹ evo . . .

Oka rẹ iroro rẹ Julia de rhe we, die wo che ru?

FỌ WO RORO!

Ẹro wo vwo ni oma wẹn sa họhọ uhoho ọchọchọ rẹ oma wẹn ru wọ mrẹre vwẹ ughegbe

Ọ chọre wo vwo roro kpahen ugboma wẹ-ẹn. Baibol na ta ota kpahen eya kugbe eshare evo ri vwo erhuvwu, ihwo kerẹ Sera, Rachel, Abigail, Josẹf, kugbe Devid. Baibol na tare nẹ aye ọvo re se Abishag “vwo erhuvwu gangan.”—1 Ivie 1:4.

Ẹkẹvuọvo, ighene buebun ro ẹwan kpahen ugboma rayen gan nọ. Ọnana sa so ebẹnbẹn ọgangan. Roro:

  • Vwẹ ehahiẹ ọvo re ruru, ẹkẹn 58 rẹ 100 rẹ emetẹ yen tare nẹ ayen vwo ọnyẹ gan nọ, ẹkẹvuọvo, ẹkẹn 17 yen ghini vwo ọnyẹ gan nọ.

  • Vwẹ ehahiẹ ọfa, ẹkẹn 45 rẹ 100 rẹ eya ri ghwe vwo ọnyẹ-ẹ, yen rorori nẹ ayen vwo ọnyẹ gan nọ!

  • Vwẹ ẹgbaẹdavwọn e vwo si nẹ ọnyẹ, ighene evo rhi she ro ọga ra vwọ vwẹ owẹnvwe hwe oma, rọ sa so ughwu kẹ ayen.

 Wo de vwo ọga ra vwọ vwẹ owẹnvwe hwe oma, guọnọ ukẹcha. Ta ota kpahọn kẹ ọsẹ vẹ oni wẹn yẹrẹ ohwo ọfa rọ ghwanre tedje rẹ wọ vwẹroso. Baibol na da ta: “Igbeyan vwo ẹguọnọ kpahe ohwo kọke kọke, e vwiẹ oniọvo kpahe ohwo fiki rẹ ẹdoja.”—Isẹ 17:17.

OWỌẸJẸ RO ME YOVWIN WỌ SA JẸ!

Uruemu rẹ ohwo yen djephia nẹ ohwo vwo erhuvwu. Roro kpahen Absalọm ọmọ rẹ Ovie Devid. Baibol na da ta:

“Ohwo ọvuọvo re jirẹ kerẹ Absalọm vwẹ erhuvwu ọ herọ-ọ. . . . O vwo asan ra vwọ harhọ-ọ.”—2 Samuẹl 14:25.

Dedena, eghene nana vọnre vẹ ophiẹnvwe kugbe omaẹkparọ, o ji vwo urhurusivwe rẹ usuon! Ọtiọyena, Absalọm dje omamọ rẹ uruemu rẹ Baibol na ta ota kpahe-en, Baibol na dje Absalọm kerẹ ozighẹ kugbe ohwo rọ fuevu-un.

Kọyensorọ Baibol na vwọ kẹ avwanre uchebro nana:

“Ku ohwo ọkpokpọ na phihọ.”—Kọlose 3:10.

“We jẹn osẹnvwe rẹ ovwan dia ọ rẹ ẹtoeme ọvo-o . . . , ẹkẹvuọvo e jẹn dia ohwo rọ djahere vwẹ obo udu.”—1 Pita 3:3, 4.

Dede nẹ ọ chọre a vwọ vwẹrote ugboma rẹ ohwo-o, jẹ uruemu rẹ avwanre yen ma ghanre. Ukuotọ rọyen, iruemu iyoyovwin ru wo vwori yen cha nẹrhẹ ihwo jiri owẹ vrẹ erhuvwu rẹ ugboma wẹn! Ọmọtẹ ọvo re se Phylicia da ta: “Erhuvwu rẹ ugboma yen ihwo ka mrẹ, ẹkẹvuọvo omamọ rẹ uruemu wẹn yen cha nẹrhẹ ayen karophiyọ owẹ.”

JE RORO KPAHEN UGBOMA WẸN

Ofu dje we fikirẹ oborẹ ugboma wẹn hepha?

O vwo ọkiọvo wo vwo brorhiẹn nẹ wo che chiri owẹnvwe, wene ohọroma yẹrẹ ru erọnvwọn efa kerẹ eyena fikirẹ asan ọvo ro she chọ vwẹ oma wẹn?

Die yen wo che wene vwẹ oma wẹn ọ da dia oborẹ wo se ru? (Jokaphiyọ e rẹ wọ guọnọre.)

  • UGRONGRON

  • ỌNYẸ

  • ẸTO

  • UGBOMA

  • OPHARO

  • OHỌROMA

Ẹkpahọnphiyọ wẹn da dia E vwọ kẹ onọ rẹsosuọ vẹ ọrivẹ na, wọ da je jokaphiyọ erha yẹrẹ vrẹ ọtiọyen vwẹ ọ rerha na, roro kpahen ọnana: O muẹro nẹ ọ dia ẹro rẹ wo vwo ni oma wẹn, yen ihwo efa vwo ni we-e. Ọ pha lọlọhọ wọ vwọ ro ẹwan kpahen ugboma wẹn gan nọ.—1 Samuẹl 16:7.