“Jẹ evun wẹn fon.”​—1 PITA 3:16.

1, 2. Diesorọ ikọmpasi vwọ dia orọnvwọn ọghanghanre, mavọ yen a sa reyọ vwo dje ẹwẹn obrorhiẹn?

ỌGUOKỌ rọ gua okọ vwevunrẹ abadi, ohwo rọ yan oyan oshesheri vwevunrẹ aton, ohwo rọ djẹ aropleni vwẹ ophephe na. Wọ riẹn orọnvwọn ọvo rẹ ihwo erha nana vwo ruiruo? Ayen se hirharoku ebẹnbẹn siẹrẹ ayen rha reyọ ikọmpasi vwo ruiruo-o, ma rho siẹrẹ erọnvwọn efa re vwo ruiruo nonẹna rha herọ-ọ.

2 Ikọmpasi ọyen orọnvwọn re vwo ruiruo, ro vwo egbede ro hirharoku obenu ọnre vwẹ uherevie rọyen. Siẹrẹ ikọmpasi na da nabọ ruiruo, ma rho a da reyọ vwo ruiruo vẹ imapu rọ gbare, ọ sa chọn wẹ uko vwọ vrabọ rẹ ebẹnbẹn re sa so ughwu kẹ wẹ. A sa reyọ ikọmpasi na vwo dje okẹ ọghanghanre ọvo rẹ Jihova vwọ kẹ avwanre re se nẹ ẹwẹn  obrorhiẹn. (Jems 1:17) Avwanre rhe vwo ẹwẹn obrorhiẹ-ẹn, jẹ avwanre ghwruru. A da vwẹ ẹwẹn obrorhiẹn na vwo ruiruo vwẹ idjerhe ro shephiyọ, ọ sa chọn avwanre uko vwọ mrẹ, je dia evunrẹ idjerhe ro suẹn kpo arhọ na. Ọtiọyena, e jẹ avwanre roro kpahen oborẹ ẹwẹn obrorhiẹn na hepha, vẹ oborẹ o ruiruo wan. Ọke yena re, avwanre ki se yono ẹkpo nana: (1) Obo re se vwo yono ẹwẹn obrorhiẹn na, (2) oboresorọ avwanre vwo roro kpahen ẹwẹn obrorhiẹn rẹ ihwo efa, vẹ (3) erhuvwu rẹ ohwo se vwo siẹrẹ ọ da sẹro rẹ omamọ ẹwẹn obrorhiẹn.

OBORẸ ẸWẸN OBRORHIẸN NA HEPHA VẸ OBO RO RUIRUO WAN

3. Die yen ubiota rẹ Grik re se “ẹwẹn obrorhiẹn” na mudiaphiyọ, die yen a reyerọ vwo dje?

3 Vwevunrẹ Baibol na, ubiota rẹ Grik re se “ẹwẹn obrorhiẹn” mudiaphiyọ “erianriẹn rẹ ohwo vwo vughe omobọ rọyen.” Avwanre fẹnẹ emama efa vwẹ otọrakpọ na kidie Ọghẹnẹ kẹ avwanre ẹgba ra sa vwọ riẹn omobọ rẹ avwanre. Avwanre se roro kpahen oborẹ avwanre ru wan re, sẹ avwanre ru obo ri yovwirin yẹrẹ obo ri miovwirin. Kerẹ orọnvwọn ro se oseri kẹ avwanre vwẹ obevun, yẹrẹ oguẹdjọ, ẹwẹn obrorhiẹn na sa fuẹrẹn iruemu vẹ ojẹ rẹ avwanre. O se sun avwanre vwo bru omamọ rẹ orhiẹn, yẹrẹ si avwanre orhọ kpahen obo re chọre. Ọ je sa nẹrhẹ oma vwerhen avwanre siẹrẹ e de ru obo ri yovwirin yẹrẹ vwẹ oja re avwanre siẹrẹ e de ru obo ri miovwirin.

4, 5. (a) Mavọ avwanre ru riẹn nẹ Adam vẹ Ivi vwo ẹwẹn obrorhiẹn, die yen phiare kidie nẹ ayen churhi rẹ Ọghẹnẹ? (b) Idje vọ yen djerephia nẹ eshare re fuevun vwẹ ọke awanre vwo ẹwẹn obrorhiẹn re wian?

4 Nẹ ọtonphiyọ rhe yen a vwọ kẹ ọshare vẹ ayen rẹsosuọ ẹwẹn obrorhiẹn. Adam vẹ Ivi djerephia nẹ ayen vwo ẹwẹn obrorhiẹn. Avwanre mrẹ ọyena vughe womarẹ oma rọ vo ayen ọke rẹ ayen vwo ru umwewmu nu. (Jẹnẹsis 3:7, 8) Ọ  da ohwo mamọ nẹ ẹwẹn obrorhiẹn ro kpokpo ayen ọke yena rhe se sivwin ayen ọfa-a. Ayen vwẹ arogba vwọ churhi rẹ Ọghẹnẹ. Ọtiọyena, arogba yen ayen vwọ jẹ ojẹ rẹ ayen vwo gbevwọso Jihova Ọghẹnẹ. Kerẹ ihworakpọ re gbare, ayen riẹn oborẹ ayen ruru, ayen rhe se rhivwin bru Ọghẹnẹ ra ọfa-a.

5 Vwọ fẹnẹ Adam vẹ Ivi, buebun rẹ ihworakpọ ri jẹgba kerhọ rẹ ẹwẹn obrorhiẹn rayen. Kerẹ udje, Job rọ dia ohwo rọ fuevun da ta: “Me yọnrọn ọvwata mẹ kokoroko, mi che siobọ no-o; udu mẹ ji bruhwe vwe ẹdẹ ọvuọvo-o.” * (Job 27:6) Job nabọ kerhọ rẹ ẹwẹn obrorhiẹn rọyen. Ọ nẹrhẹ ẹwẹn obrorhiẹn rọyen sun iruemu kugbe orhiẹn-ebro rọyen. Ọtiọyena, Job kọ sa vwobọ so udu nẹ ẹwẹn rọyen bru hwe vwọrẹ omavovwẹ yẹrẹ abe-e. Jokaphiyọ ofẹnẹ rọ herọ uvwre rẹ Job kugbe Devid. Ọke rẹ Devid vwo dje uruemu rẹ jẹ ọghọ emuo phia vwọ kẹ Sọl rọ dia ovie rẹ Jihova vwo mu, “udu rẹ Devid ọvo da rhoma bru hwe.” (1 Samuẹl 24:5) Devid mrẹ erere vwo nẹ ẹwẹn obrorhiẹn rọyen ro bru hwe, kidie o yono Devid uruemu re vwo dje ọghọ phia.

6. Die yen djerephia nẹ ẹwẹn obrorhiẹn na okẹ vwọ kẹ ihworakpọ eje?

6 Idibo rẹ Jihova ọvo yen vwo okẹ rẹ ẹwẹn obrorhiẹn na? Roro kpahen ota rẹ ọyinkọn Pọl nana: “Ọke rẹ ihwo re vwo urhi na-a da vwẹ evun rẹ obọ rẹ ayen yọnrọn urhi na, yẹ ayen vwo urhi kẹ omaobọ rẹ ayen, dede na jẹ ayen vwo urhi jovwo-o. Ayen dje phia nẹ e si obo rẹ urhi na guọnọre phihọ udu rayen, yẹ udu rayen ghwe se oseri kẹ ayen yẹ iroro rayen rọ tagha ku ghwa ghwọ ku ayen eyẹ ọ ghwa rhiẹn  ayen.” (Rom 2:14, 15) Ẹwẹn obrorhiẹn nana mu ihwo re tobọ riẹn irhi rẹ Jihova dede-e vwo yeren akpọ nene irhi rẹ Ọghẹnẹ.

7. Diesorọ ẹwẹn obrorhiẹn na se vwo brorhiẹn chọ ọkiọvo?

7 Ẹkẹvuọvo, ẹwẹn obrorhiẹn na se brorhiẹn rọ chọre ọkiọvo. Diesorọ? Vwọrẹ uyota, e de mu ikọmpasi kẹrẹ utehru, ọ sa nẹrhẹ odjekẹ rẹ ikọmpasi na chọ. Jẹ a da reyọ vwo ruiruo vẹ imapu rọ gbare-e, ikọmpasi na che se ruiruo ro fiotọ-ọ. Vwẹ idjerhe vuọvo na, avwanre da vwẹ uphẹn kẹ urhurusivwe romobọ nẹ ọ vwẹ owọ muotọ vwẹ ubiudu avwanre, ọnana sa nẹrhẹ ẹwẹn obrorhiẹn avwanre sun avwanre ghwru. A rha vwẹ Ota rẹ Ọghẹnẹ vwo sun ẹwẹn obrorhiẹn avwanre-e, ọ cha bẹn e vwo brorhiẹn rọ gbare yẹrẹ ọ rọ chọre. Avwanre guọnọ ẹwẹn ọfuanfon rẹ Jihova rere ẹwẹn obrorhiẹn avwanre vwọ nabọ riẹn wian. Pọl de si: “Kidie udu mẹ se oseri kẹ vwẹ vwẹ evun rẹ [“ẹwẹn ọfuanfon,” NW ]” na. (Rom 9:1) Mavọ avwanre se vwo vwo imuẹro nẹ ẹwẹn ọfuanfon rẹ Jihova yen sun ẹwẹn obrorhiẹn avwanre? Avwanre se ru ọtiọyen siẹrẹ e de yono ẹwẹn obrorhiẹn na.

OBO RE SE VWO YONO ẸWẸN OBRORHIẸN NA

8. (a) Mavọ yen ojevwe rẹ ubiudu na se vwo djobọte ẹwẹn obrorhiẹn na, die yen ofori nẹ ọ dia ọdavwẹ rẹsosuọ kẹ avwanre? (b) Diesorọ ẹwẹn obrorhiẹn ro fiotọ ọvo ghwe te vwọ kẹ Onenikristi ro vwo brorhiẹ-ẹn? (Ni eta rehẹ obotọ na.)

8 Mavọ yen wo brorhiẹn re mu kpahen ẹwẹn obrorhiẹn? Vwọ kẹ ihwo evo, oborẹ ẹwẹn rayen ghwa vuẹ ayen yen ayen ruẹ. Siẹrẹ ayen de ruo nu, ayen ke tanẹ, “Ẹwẹn obrorhiẹn mẹ kpokpo uvwe-e.” Ojevwe rẹ ubiudu sa gan te asan rọ da tobọ djobọte ẹwẹn obrorhiẹn avwanre. Baibol na tare nẹ “Udu rẹ ohwo ọ vọnre vẹ ophiẹvwe gangan o miovwiri gangan; ono se vughe?” (Jerimaya 17:9) Ọtiọyena, ọ rha dia ojevwe rẹ ubiudu avwanre yen dia obo re ma ghanre rẹ avwanre che roro kpahe-en. Ukperẹ ọtiọyen,  obo re vwerhen Jihova oma yen cha dia ọdavwẹ rẹsosuọ rẹ avwanre. *

9. Die yen oshọ ẹdjẹ rẹ Ọghẹnẹ, mavọ yen o se vwo djobọte ẹwẹn obrorhiẹn rẹ avwanre?

9 Avwanre de ghini mu orhiẹn-ebro avwanre kpahen ẹwẹn obrorhiẹn ra nabọ yono, ọyena che djephia nẹ avwanre vwo oshọ ẹdjẹ rẹ Ọghẹnẹ, ọ dia ojevwe romobọ-ọ. Roro kpahen udje nana. Nehemaya rọ dia osun vwo uturhi rọ vwọ rẹyọ igho evo mie ihwo rehẹ Jerusalẹm. Ẹkẹvuọvo, o ru ọtiọye-en. Diesorọ? O vwo utuoma kpahen uruemu ra vwọ kpare ophu rẹ Jihova womarẹ e vwo shenyẹ ihwo. Nehemaya da ta: “Mi se ru ọtiọye-e fiki rẹ oshọ rẹ Ọghẹnẹ.” (Nehemaya 5:15) Ọyen obo re ghanre re vwo vwo uvi rẹ oshọ ẹdjẹ rẹ Ọsẹ avwanre rọhẹ odjuvwu, je kẹnoma kẹ obo ri che miovwo ivun. Oka rẹ oshọ ẹdjẹ vẹ ọghọ tiọyena che mu avwanre vwọ guọnọ odjekẹ rẹ Ota rẹ Ọghẹnẹ siẹrẹ avwanre da guọnọ brorhiẹn.

10, 11. Iyono rẹ Baibol vọ yen shekpahen udi ro mu ohwo, mavọ yen avwanre sa vwọ mrẹ odjekẹ rẹ Ọghẹnẹ siẹrẹ avwanre da reyọ ayen vwo ruiruo?

10 Kerẹ udje, roro kpahen ota ro shekpahen udi ro mu ohwo. Vwevunrẹ echidiotọ rẹ akpọẹriọ, ihwo buebun hirharoku orhiẹn nana: Me da, gbanẹ me da-a? Ẹsosuọ, ofori nẹ avwanre fuẹrẹn oma rẹ avwanre rere a riẹn oborẹ ẹgba avwanre muru. Iyono rẹ Baibol vọ yen shekpahen ota nana? Vwọrẹ uyota, Baibol na gha udi ẹda-a. Baibol na jiri Jihova fikirẹ okẹ rẹ udi. (Une Rẹ Ejiro 104:14, 15) Ẹkẹvuọvo, Baibol na gha udi ẹda vrẹ oma vẹ echidiotọ rẹ akpọẹriọ re se su-un. (Luk 21:34; Rom 13:13) Kpobarophiyọ, Baibol  na ji kere udi ẹda vrẹ oma ba umwemwu kerẹ ọfanrhiẹn. *​—1 Kọrẹnt 6: 9, 10.

11 Onenikristi sa vwẹ iyono rẹ Baibol tiọyena vwo yono ẹwẹn obrorhiẹn rọyen. Ọtiọyena, avwanre de hirharoku orhiẹn-ebro rẹ udi ẹda vwẹ echidiotọ rẹ akpọẹriọ, avwanre gba nọ oma rẹ avwanre enọ nana: ‘Oka rẹ echidiotọ vọ yen a guọnọ ruẹ na? Ọ cha dia echidiotọ rẹ akpọẹriọ re che se su-un? Ọ rhọ yen uruemu mẹ kpahen udi ẹda? Urhuru rẹ udi si vwe gangan, ọyen me vwọ hworhẹ unu, ọyen mi vwọ yọnrọn oma? Mi se sun oma mẹ rere mi vwo jẹ udi ẹda vrẹ oma?’ Siẹrẹ avwanre de roro kpahen iyono rẹ Baibol vẹ enọ ri nẹ evun rayen rhe, ọna cha chọn avwanre uko vwọ nẹrhovwo kẹ odjekẹ rẹ Jihova. (Se Une Rẹ Ejiro 139:23, 24.) Vwẹ idjerhe tiọyena, avwanre yare Jihova nẹ ọ vwẹ ẹwẹn ọfuanfon rọyen vwo sun avwanre. Jẹ avwanre ji yono ẹwẹn obrorhiẹn avwanre rere o vwo shephiyọ iyono rẹ Baibol. O ji vwo orọnvwọn ọfa rẹ ofori nẹ avwanre nabọ roro kpahen siẹrẹ avwanre da guọnọ brorhiẹn.

DIESORỌ AVWANRE VWO RORO KPAHEN ẸWẸN OBRORHIẸN RẸ IHWO EFA?

Ẹwẹn obrorhiẹn ra vwẹ Baibol vwo yono sa chọn wẹ uko vwo brorhiẹn sẹ wọ da udi ro mu ohwo yẹrẹ wọ da-a

12, 13. Diesorọ Inenikristi vwo vwo ẹwẹn obrorhiẹn rọ fẹnẹ ohwohwo, die yen avwanre ru kpahen ofẹnẹ yena?

12 Ọkiọvo, oborẹ ẹwẹn obrorhiẹn rẹ Inenikristi fẹnẹ ohwohwo wan se gbe we unu. Ohwo ọvo sa mrẹ nẹ irueru evo chọre, ẹkẹvuọvo ohwo ọfa mi rhe no nẹ o yovwirin, ọtiọyena o se vwobọ vwọ. Vwẹ ota ro shekpahen udi ẹda vwẹ echidiotọ rẹ igbeyan, ohwo ọvo se roro nẹ o shephiyọ rẹ ọyen vẹ igbeyan rọyen vwọ da udi vwẹ ovwọnvwọn siẹrẹ ayen de rovwonma, ẹkẹvuọvo, uruemu yena se kpokpo ẹwẹn obrorhiẹn rẹ ohwo ọfa. Diesorọ ofẹnẹ ọtiọyena vwọ dia, mavọ yen ofẹnẹ tiọyena djobọte orhiẹn-ebro avwanre?

 13 O vwo oboresorọ ihwo vwo vwo iroro sansan. Obo ra yọnrọn ihwo ghwanre wan fẹnẹre. Kerẹ udje, ihwo evo riẹn ovwiẹrẹ rẹ ayen nene muabọ ọkiọvo rọ wanre, jẹ ọ ghwa dia ọkeneje yen ayen vwo phi ovwiẹrẹ na kparobọ-ọ. (1 Ivie 8:38, 39) A da ta ota kpahen udi, oka rẹ ihwo tiọyena ke nabọ kẹnoma. Ohwo ọtiọyena da kọn bru we rhe, ẹwẹn obrorhiẹn rọyen sa vuẹ nẹ ọ sen udi wọ vwọ ghọ. Ọ da sen udi na, ivun che miovwo uwe? Wọ cha gba nẹ ọ da? Ẹjo. Owenẹ wọ riẹn oboresorọ ọ vwọ sen udi na, yẹrẹ wọ riẹnre-e, ẹguọnọ rẹ oniọvo cha nẹrhẹ wo muọghọ kẹ orhiẹn rọyen.

14, 15. Vwẹ ota vọ yen Inenikristi rẹ ẹgbukpe ujorin rẹsosuọ de vwo ẹwẹn obrorhiẹn rọ fẹnẹ ohwohwo, die yen Pọl jiri kẹ ayen?

14 Ọyinkọn Pọl riẹnre nẹ ẹwẹn obrorhiẹn rẹ Inenikristi rẹ ẹgbukpe ujorin rẹsosuọ fẹnẹ ohwohwo. Ọke yena, ẹwẹn obrorhiẹn rẹ Inenikristi evo kpokpo ayen fikirẹ emuọre re vwo ze izobo kẹ edjọ. (1 Kọrẹnt 10:25) Ẹwẹn obrorhiẹn rẹ Pọl kpokpiro fikirẹ emuọre ọtiọyena ra rhoma shẹ vwẹ eki-i. Vwọ kẹ Pọl, edjọ fi emu vuọvo-o, edjọ che se vwo emuọre ro nẹ obọ rẹ Jihova rhe-e. Dedena, Pọl riẹnre nẹ ọ dia ihwo eje yen vwo oka rẹ iroro ro vwori kpahen emuọre na-a. Ọ sa dianẹ evo vwobọ vwẹ edjọ-ẹgọ tavwen ayen ke rhe dia Inenikristi. Vwọ kẹ ihwo nana, kemu kemu ro churobọ si edjọ-ẹgọ jovwo, ọyen emu rẹ ẹgua. Mavọ yen Pọl rhuẹrẹ ẹdia nana phiyọ wan?

15 Pọl da ta: “O fori rere avwanre ihwo re ganre na vwo chirako rẹ otu re evwiẹre na, avwanre rhe nene ojevwe rẹ oma rẹ avwanre ọvo-o. Kidie Kristi guọnọ erhuvwu rẹ oma rọye-e.” (Rom 15:1, 3) Pọl vuẹ avwanre nẹ a vwẹ ojevwe rẹ iniọvo avwanre vwọ ka obaro, kirobọ rẹ Kristi ruru. Vwẹ ota ọfa rọ họhọ ọnana, Pọl tare nẹ ukperẹ ọ vwọ dia ukprowọ kẹ ogegede rọ pha ghanghanre rẹ Kristi ghwu kẹ na, ọ cha kẹnoma kẹ eranvwe ẹriọ.​—Se 1 Kọrẹnt 8:13; 10:23, 24, 31-33.

16. Diesorọ ihwo rẹ ẹwẹn obrorhiẹn rayen fobọ kpokpo vwọ kẹnoma kẹ a vwọ vwẹ ihwo vwo gun ẹdjọ?

16 Ẹbẹre ọfa rọyen, ihwo rẹ ẹwẹn obrorhiẹn rayen fobọ kpokpo, vwẹ ihwo efa vwo guẹdjọ-ọ, ayen je gba ihwo efa vwọ vwẹ ẹro rẹ ayen vwo ni erọnvwọn vwo no-o. (Se Rom  14:10.) Ofori nẹ avwanre vwẹ ẹwẹn obrorhiẹn rẹ avwanre vwọ fuẹrẹn oma rẹ avwanre, ọ dia a vwọ reyọ vwo gun ihwo efa ẹdjọ-ọ. Karophiyọ eta rẹ Jesu: “Ovwan gu ẹdjọ rẹ ohwo-o, rere ohwo vwo jẹ ovwan eguo.” (Matiu 7:1) Ihwo ejobi vwẹ ukoko na kẹnoma kẹ a vwọ nọ enọ kpahen eta ri shekpahen ẹwẹn obrorhiẹn rẹ ihwo efa. Ukperẹ ọtiọyen, avwanre guọnọ idjerhe avwanre vwo toroba ẹguọnọ vẹ oyerinkugbe rẹ ukoko na, ra vwọ bọn ohwohwo gan, ọ dia ra vwọ reyọ ohwohwo vwo gun ẹdjọ-ọ.​—Rom 14:19.

ERERE RỌ HERỌ SIẸRẸ OHWO DE VWO OMAMỌ RẸ ẸWẸN OBRORHIẸN

Omamọ rẹ ẹwẹn obrorhiẹn se sun avwanre vwẹ idjerhe rẹ arhọ, je kẹ avwanre omavwerhovwẹn vẹ ufuoma rẹ ubiudu

17. Die yen phia kẹ ẹwẹn obrorhiẹn rẹ ihwo buebun nonẹna?

17 Ọyinkọn Pita siri nẹ “Jẹ evun wẹn fon.” (1 Pita 3:16) Ẹwẹn obrorhiẹn rọ fonro vwẹ ẹro rẹ Jihova Ọghẹnẹ ọyen  ebruba rode. Ọ họhọ ẹwẹn obrorhiẹn rẹ ihwo buebun nonẹna-a. Pọl djisẹ rẹ ihwo rẹ ẹwẹn obrorhiẹn rayen “vwara muẹ udu rẹ ayen kerẹ umomo rẹ ogun.” (1 Timoti 4:2) Umomo rẹ odjogun de bru ora phiyọ ohwo oma, asan na ko ghwudirhẹn. Ọtiọyen ẹwẹn obrorhiẹn rẹ ihwo buebun je hepha, o ghwuru te asan rẹ o rhe si ayen orhọ yẹrẹ bru orhiẹn hwe ayen kpahen obo re chọre-e. Ihwo evo herọ rẹ oma vwerhan kidie ẹwẹn obrorhiẹn rayen rha vwẹ ayen gun ẹdjọ-ọ.

18, 19. (a) Erere vọ yen iroro rẹ omavovwẹ yẹrẹ ẹwẹn rẹ abe sa ghwa rhe? (b) Die yen avwanre se ru siẹrẹ ẹwẹn obrorhiẹn rẹ avwanre da vwẹ avwanre guẹdjọ fikirẹ umwemwu re vwo ghovwo avwanre nure?

18 Vwọrẹ uyota, iroro rẹ abe sa dia idjerhe rẹ ẹwẹn obrorhiẹn na vwọ vuẹ avwanre nẹ avwanre ru chọ. Siẹrẹ oka rẹ  iroro ọtiọyena de mu orumwemwu vwo kurhẹrhiẹ, Ọghẹnẹ sa vwẹ umwemwu rọyen vwo ghovwo, otoro obo rọ bra te-e. Kerẹ udje, Ovie Devid riabe rẹ umwewmu ọgangan ọvo, ẹkẹvuọvo a vwẹ umwemwu na vwo ghovwo kidie o kurhẹrhiẹ vwo nẹ otọ rẹ udu rọyen rhe. Kidie nẹ o vwo utuoma kpahen oruchọ rọyen na, o ji brorhiẹn rọ vwọ kerhọ rẹ irhi rẹ Jihova, kọ sa rhe mrẹvughe nẹ Jihova “ohwo esiri vẹ evwoghovwo.” (Une Rẹ Ejiro 51:1-19; 86:5) Kẹ ọ da rha dianẹ avwanre kurhẹriẹ re, a je vwẹ umwemwu avwanre vwo ghovwo avwanre nure, jẹ ẹwẹn obrorhiẹn rẹ avwanre ji kpokpo avwanre vwo?

19 Ọkiọvo, ẹwẹn obrorhiẹn na se kpokpo ohwo gan nọ, ọ da tobọ dianẹ a vwẹ imwemwu rẹ ohwo na vwo ghovwo re. Vwẹ ẹdia tiọyena, ofori nẹ avwanre vwo imuẹro nẹ Jihova rho vrẹ iroro rẹ ihworakpọ ejobi. Ofori nẹ avwanre vwo esegbuyota, je rhiabọreyọ ẹguọnọ vẹ evwoghovwo rẹ Ọghẹnẹ kirobo rẹ avwanre vuẹ ihwo efa nẹ ayen ru. (Se 1 Jọn 3:19, 20.) Vwẹ ẹbẹre ọfa rọyen, ẹwẹn obrorhiẹn rọ fonro kẹ avwanre ubiudu re dọe, ufuoma, vẹ omavwerhovwẹn ra fobọ mrẹ vwẹ akpọ na-a. Buebun ihwo ri vwobọ vwẹ umwemwu eruo jovwo rhiẹromrẹ ufuoma nana, ọtiọyena kẹ ayen sa sẹro rẹ ẹwẹn obrorhiẹn ro fiotọ rẹ ayen vwọ ga Jihova Ọghẹnẹ nonẹna.​—1 Kọrẹnt 6:11.

20, 21. (a) Die yen ọbe nana cha chọn wẹ uko vwo ru? (b) Kerẹ Inenikristi, egbomọphẹ vọ yen avwanre vwori, mavọ yen ofori nẹ avwanre reyọ vwo ruiruo wan?

20 E ru ọbe nana rere ọ vwẹ ukẹcha kẹ wẹ vwọ mrẹ aghọghọ, je sẹro rẹ omamọ rẹ ẹwẹn obrorhiẹn vwẹ ẹdẹ re koba rẹ akpọ rẹ Eshu na. Vwọrẹ uyota, ọbe nana che se djunute irhi vẹ iyono rẹ Baibol ejobi ra guọnọre nẹ wo roro kpahen, je reyọ vwo ruiruo vwẹ akpeyeren wẹn rẹ kẹdẹ kẹdẹ-ẹ. Kpobarophiyọ, wo roro nẹ a cha kẹ wẹ irhi re cha vuẹ wẹ obo wo ru vwẹ eta ri shekpahen ẹwẹn obrorhiẹ-ẹn. Ọhọre re vwo ru ọbe nana ọyen rọ vwọ chọn wẹ uko vwo  yono ẹwẹn obrorhiẹn wẹn vẹ oborẹ wọ sa vwọ vwẹ Ota rẹ Ọghẹnẹ vwo ruiruo vwẹ akpeyeren wẹn rẹ kẹdẹ kẹdẹ. “Urhi ri Kristi” na fẹnẹ Urhi rẹ Mosis, kidie ọ rẹ Kristi na shekpahen ra vwọ reyọ ẹwẹn obrorhiẹn vẹ iyono rẹ Baibol vwo ruiruo, ukperẹ e vwo nene irhi re si phiyotọ. (Galesha 6:2) Womarẹ ọnana, Jihova kẹ Inenikristi egbomọphẹ rẹ oghẹresan. Ẹkẹvuọvo, Ota rẹ Ọghẹnẹ vuẹ avwanre nẹ a reyọ egbomọphẹ na vwo “ruẹ urhurho rẹ umwemwu-u.” (1 Pita 2:16) Ukperẹ ọtiọyen, egbomọphẹ na kẹ avwanre uphẹn re vwo dje ẹguọnọ rẹ avwanre kẹ Jihova.

21 Siẹrẹ wo de roro kpahen idjerhe ro me yovwin wọ vwọ reyọ iyono rẹ Baibol vwo ruiruo womarẹ ẹrhovwo, je davwẹngba vwo ru nene orhiẹn-ebro wẹn, ku wo se ru yovwin phiyọ vwẹ owọẹjẹ wọ jẹre ẹsosuọ kpahen wọ vwọ riẹn Jihova. Ku wo vwo “ọhọ [re] se vwo vughe emu.” (Hibru 5:14) Ẹwẹn obrorhiẹn wẹn ru wọ vwẹ Baibol vwo yono kọ dia ebruphiyọ kẹ wẹ vwẹ akpeyeren rẹ kẹdẹ kẹdẹ wẹn. Kirobo rẹ ikọmpasi sun ihwo ri kpo asan ye, eriyin ẹwẹn obrorhiẹn wẹn je cha chọn wẹ uko vwo brorhiẹn re vwerhen Ọsẹ wẹn rọhẹ odjuvwu oma. Ọnana idjerhe ro me yovwin wọ sa vwọ sẹro rẹ oma wẹn vwevunrẹ ẹguọnọ rẹ Ọghẹnẹ.

^ e?ko. 5 O vwo ubiota kiriguo re vwo se “ẹwẹn obrorhiẹn” vwẹ ẹbẹre ra vwẹ Hibru si vwẹ Baibol na-a. Ẹkẹvuọvo, udje rẹ Job djerephia nẹ ihworakpọ ghini vwo ẹwẹn obrorhiẹn. Ota na “ubiudu” mudiaphiyọ oka rẹ ohwo avwanre hepha obevun. Vwẹ udje rẹ Job na, ubiudu na mudiaphiyọ ẹwẹn obrorhiẹn rọyen. Vwẹ ẹbẹre rẹ Baibol ra vwẹ Grik vwo si, ubiota rẹ Grik re vwo se “ẹwẹn obrorhiẹn” na, vwomaphia abọ 30.

^ e?ko. 8 Baibol na djerephia nẹ re vwo vwo ẹwẹn obrorhiẹn ro fiotọ ọvo ghwe te-e. Kerẹ udje, Pọl da ta: “Me karohọ emu ọvuọvo ri mi ru kpahe oma mẹ-ẹ, ẹkẹvuọvo ọ dianẹ me vwẹ ọyena rease-e. Ọrovwohwo re sa vwẹ ovwẹ guẹdjọ.” (1 Kọrẹnt 4:4) Ẹwẹn obrorhiẹn rẹ ihwo ri mukpahen Inenikristi kirobo rẹ Pọl ruru jovwo se jẹ ayen e kpokpo, kidie ayen roro nẹ Ọghẹnẹ rhọnvwe phiyọ oborẹ ayen ruru na. Ọghanre mamọ rẹ ẹwẹn obrorhiẹn avwanre vwọ fon vwẹ ẹro rẹ avwanre, ji te ọ rẹ Ọghẹnẹ.​—Iruo Rẹ Iyinkọn Na 23:1; 2 Timoti 1:3.

^ e?ko. 10 Avwanre karophiyọ nẹ idọktọ buebun tare nẹ egba-idi che se sun udi ẹda raye-en, vwọ kẹ ihwo nana, “emerha,” mudiaphiyọ nẹ ayen kẹnoma kẹ udi ro mu ohwo karekare.