Ọke vọ kugbe diesorọ aye rọ dia Onenikristi vwọ phare uyovwin vwẹ ẹga rọyen? E jẹ avwanre roro kpahen ota rẹ ẹwẹn ọfuanfon na mu ọyinkọn Pọl vwo si kpahen uyovwinrota nana. Pọl vwẹ odjekẹ ri fori vwọphia rere avwanre se vwo brorhiẹn ri shephiyọ, orhiẹn-ebro ri brọghọ phiyọ Ọghẹnẹ oma. (1 Kọrẹnt 11:3-16) Pọl vwẹ iroro erha kiriguo vwọphia: (1) irueru ra da guọnọ nẹ aye phare uyovwin rọyen, (2) asan ra da guọnọ nẹ ọ phare uyovwin rọyen, kugbe (3) oboresorọ aye na vwọ yan nene iji nana.

Irueru. Pọl djunute irueru ivẹ: ẹrhovwo kugbe aroẹmrẹ. (Awọreta 4, 5) Ẹrhovwo ọyen idjerhe rẹ avwanre vẹ Jihova vwọ ta ota kuẹgbe. Nonẹna, aroẹmrẹ shekpahen uyono eje ri nẹ Baibol rhe rẹ Onenikristi yono ihwo efa. Ọtiọyena, ota rẹ Pọl na ghwe mudiaphiyọ nẹ ọkieje rẹ aye da cha nẹrhovwo yẹrẹ yono ohwo Baibol na yen ọ vwọ phare uyovwin rọyen? Ẹjo. Asan rẹ aye na da cha nẹrhovwo yẹrẹ yono yen che djephia sẹ ọ cha phare uyovwin rọyen.

Asan. Eta rẹ Pọl dje asan yẹrẹ irueru ivẹ phia, ivẹ na yen vwevunrẹ orua kugbe ukoko na. Ọ da ta: “Uyovwi rẹ aye ke rha vwẹ ọshare rọye, . . . aye kaye rọ nẹ ẹrhovwo eyẹ ọ mraro ro de rhie uyovwi rọye phihọ yọ vwẹ ọghọ kẹ uyovwi rọye-e.” (Awọreta 3, 5) Vwevunrẹ ọrhuẹrẹphiyotọ rẹ orua na, Jihova vwẹ ọshare  na vwo mu ọgbuyovwin rẹ aye na. Jokpanẹ aye na kọ mrẹ ẹgba rẹ usuon rẹ ọshare rọyen vughe, ọ rha dia ọtiọye-en, siẹrẹ ọ da reyọ ẹdia rẹ ọgbuyovwin rẹ ọshare na mie, kọyen o muọghọ kẹ ọshare na-a. Kerẹ udje, aye na de che yono ohwo Baibol na vwẹ irharo rẹ ọshare rọyen, kọ phare uyovwin rọyen rere o vwo dje ọghọ phia vwọ kẹ ẹdia rẹ ọgbuyovwin rẹ ọshare na. Owenẹ ọshare na bromaphiyame re yẹrẹ o ji bromaphiyame-e, aye na cha phare uyovwin rọyen, kiridie ọshare na yen ọgbuyovwin rẹ orua na. * Ọ da dianẹ aye na cha nẹrhovwo, ji yono ohwo vwẹ irharo rẹ ọmọshare rọyen otete ro bromaphiyame re, ọ je cha phare uyovwin rọyen, ọ dia kiridie nẹ ọmọ na yen ọgbuyovwin rẹ orua na-a, ẹkẹvuọvo fikirẹ ogangan ra vwọ kẹ eshare ri bromaphiyame re vwevunrẹ ukoko rẹ Inenikristi.

Pọl djunute ọrhuẹrẹphiyotọ rẹ ukoko na rọ vwọ ta: “Ọ da dianẹ ohwo guọnọ aphro, avwanre rhe vughe uruemu ọfa eyẹ [“ukoko,” NW ] rẹ Ọghẹnẹ-ẹ.” (Owọrota 16) Vwevunrẹ ukoko rẹ Inenikristi, a vwẹ ogangan kẹ eshare ri bromaphiyame re. (1 Timoti 2:11-14; Hibru 13:17) Eshare ọvo yen e vwo muẹ ekpako yẹrẹ idibo rowian rere ayen se vwo mu oghwa rẹ ẹroevwote rẹ uchuru rẹ Ọghẹnẹ. (Iruo Rẹ Iyinkọn Na 20:28) Ọkiọvo, ẹdia evo sa vwomaphia rọ sa nẹrhẹ e se aye rọ dia Onenikristi nẹ ọ rhe vwẹrote ẹdia rẹ eshare ri bromaphiyame re vwẹrote. Kerẹ udje, aye na sa vwẹrote omẹvwa rẹ aghwoghwo na kiridie ọshare ro bromaphiyame re, ro ji muwan herọ-ọ. Yẹrẹ aye na sa vwẹrote uyono rẹ ohwo rọ vwẹ Baibol yono vwẹ irharo rẹ ọshare ro bromaphiyame re. * Kidie nẹ uyono tiọyena ẹbẹre ọvo rẹ owian rẹ ukoko rẹ Inenikristi, aye na kọ phare uyovwin rọyen ro vwo djephia nẹ owian rẹ ofori nẹ ọshare wian yen ọ wian na.

Vwẹ ẹbẹre ọfa, ẹdia buebun herọ vwẹ ẹga rẹ avwanre re ghwa guọnọ nẹ oniọvo rẹ aye phare uyovwin rọye-en. Kerẹ udje,  aye se rhie uyovwin rọyen phiyọ siẹrẹ ọ da kpahanphiyọ onọ vwevunrẹ uyono, siẹrẹ ọ vẹ ọshare rọyen yẹrẹ ọshare ọfa ro bromaphiyame re de vwobọ vwẹ aghwoghwo rẹ nẹ uwevwin kpo uwevwin, yẹrẹ ọke ro de yono, yẹrẹ nene emọ rọyen ri ji bromaphiyame-e nẹrhovwo. Vwọrẹ uyota, enọ efa sa vwomaphia, siẹrẹ oniọvo rẹ aye rha nabọ vwo ẹruọ rẹ ota na-a, o se ru ehiahiẹ efa. * O rhe ji vwo ẹruọ rẹ ota na-a, jẹ ẹwẹn obrorhiẹn rọyen vuẹ nẹ ọ phare uyovwin rọyen, ọ chọre siẹrẹ o de ru ọtiọye-en, kirobo rẹ uhoho na ghwe djephia na.

Oboresorọ. Vwẹ owọrota 10, avwanre mrẹ iroro ivẹ re sorọ rẹ aye rọ dia Onenikristi vwọ phare uyovwin rọyen: “Aye . . . phare uyovwi rọye, fiki rẹ emakashe na.” Ẹsosuọ, jokaphiyọ ota na, “phare uyovwi rọye.” Ra vwọ phare uyovwin ọyen idjerhe rẹ aye vwo djephia nẹ ọyen mrẹvughe ogangan rẹ Jihova vwọ kẹ eshare ri bromaphiyame rehẹ ukoko na. Ọtiọyena, aye na ko dje ẹguọnọ vẹ evun-ẹfuọn rọyen vwọ kẹ Jihova Ọghẹnẹ. Ọrivẹ, “fiki rẹ emakashe na.” Siẹrẹ aye da phare uyovwin rọyen, idjerhe vọ yen o vwo djobọte emekashe?

Oma vwerhan emekashe na siẹrẹ ayen da mrẹ nẹ ogangan rẹ usuon ro nẹ odjuvwu rhe e muọghọ kẹ vwevunrẹ ukoko rẹ Jihova rọhẹ otọrakpọ kugbe odjuvwu. Ayen je mrẹ erere vwo nẹ udje rẹ ihworakpọ ri jẹgba vwevunrẹ ẹdia nana. Kidie o ji fo nẹ ayen vwomakpotọ kẹ ọrhuẹrẹphiyotọ rẹ Jihova rọ dia oborẹ emekashe evo se ru-u vwẹ ọkiọvo rọ wanre na. (Jude 6) Asaọkiephana, emekashe na sa mrẹ udje rẹ aye rọ dia Onenikristi ro vwo erianriẹn, kugbe aghwanre vrẹn ọshare ro  bromaphiyame re vwevunrẹ ukoko na, dedena, ọ je vwomakpotọ kẹ ogangan rẹ usuon rẹ oniọvo ọshare na. Vwẹ ẹdia evo, aye na sa dia Onenikristi ra vwẹ ẹwẹn ọfuanfon jẹreyọ ro che nene Jesu sun vwẹ obaro na. Aye tiọyena cha ga vwẹ ẹdia ro kpenu vrẹn ọ rẹ emekashe na, kidie o che nene Kristi sun vwẹ odjuvwu. Ọnana omamọ rẹ udje vwọ kẹ emekashe na asaọkiephana! Vwọrẹ uyota, uphẹn rẹ oghẹresan yen iniọvo eya eje vwori rẹ ayen vwo dje ẹme-enyo phia womarẹ evun-ẹfuọn rayen kugbe uruemu rẹ omaevwokpotọ vwẹ ẹro rẹ emekashe re fuevun na!

^ e?ko. 3 Aye rọ dia Onenikristi cha sa nẹrhovwo vwẹ irharo rẹ ọshare rọyen rọhẹ ukoko na-a, jokpanẹ ọshare na sa ta ota-a fikirẹ ọga.

^ e?ko. 1 Oniọvo rẹ aye se jẹ uyovwin ẹpharọ siẹrẹ o de yono ohwo Baibol vwẹ irharo rẹ ọshare rọ dia oghwoghwota ro ji rhi bromaphiyame-e, rọ je dia ọshare rọye-en.

^ e?ko. 2 Vwọ kẹ evuẹ efa, biko ni Uwevwin Orhẹrẹ rẹ February 15, 2015, aruọbe 30; July 15, 2002, aruẹbe 26-27; kugbe February 15, 1977, aruẹbe 125-128 e rẹ Oyibo.