Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

“Sẹro rẹ Oma rẹ Ovwan Vwẹ Evun rẹ Ẹguọnọ rẹ Ọghẹnẹ”

 UYOVWINROTA 15

Jẹ Oma Vwerhen Owẹ Vwẹ Owian Wẹn

Jẹ Oma Vwerhen Owẹ Vwẹ Owian Wẹn

“Rere . . . oma vwerhọ vwọ wian owian rọye ejobi.”​—AGHWOGHWO 3:13.

1-3. (a) Ẹro vọ yen ihwo buebun vwo ni iruo rayen? (b) Ẹro vọ yen Baibol na tare nẹ evwo ni iruo, enọ vọ yen avwanre che roro kpahen vwẹ uyovwinrota nana?

IHWO buebun nonẹna riavwerhen rẹ owian raye-en. Ofu dje ayen rẹ ayen vwo kpo iruo, fikirẹ ọke ogrongron rẹ ayen ghwọrọ vwẹ iruo na kẹdẹ kẹdẹ. Die yen che mu ihwo tiọyena vwo vwo omavwerhovwẹn kugbe evunvọnvwẹ vwẹ iruo rayen?

2 Baibol na jiriro nẹ avwanre vwẹ ẹro abavo vwo ni iruo. Baibol na tare nẹ iruo vẹ erere ro no cha, ebruphiyọ. Solomọn siri: “Ọyena okẹ rẹ Ọghẹnẹ vwọ kẹ ohwo rere kohwo kohwo vwọ re vwọ da rere oma vwerhọ vwọ wian owian rọyen ejobi.” (Aghwoghwo 3:13) Jihova rọ dia ohwo ro vwo ọdavwẹ kugbe ẹguọnọ rẹ avwanre, guọnọre nẹ oma vwerhen avwanre kpahen iruo rẹ avwanre, je re erere ro no cha. Rere avwanre sa vwọ dia vwevunrẹ ẹguọnọ rọyen, ofori nẹ avwanre vwẹ ẹro rẹ Jihova vwo ni iruo vwo no, vẹ oborẹ Baibol na ta kpahọn.​—Se Aghwoghwo 2:24; 5:18.

3 Vwẹ uyovwinrota nana, avwanre che roro kpahen enọ ẹne: Mavọ yen oma rẹ iruo rẹ avwanre sa vwọ vwerhen avwanre? Oka rẹ iruo vọ yen je fo kẹ Onenikristi? Mavọ yen avwanre sa vwọ vwẹ ẹro abavo vwo ni iruo kugbe ẹga rẹ avwanre vwọ kẹ Jihova? Iruo vọ yen ma ghanre rẹ avwanre se ru? Tavwen a ke kpahenphiyọ enọ yena, e jẹ avwanre  roro kpahen udje rẹ Jihova Ọghẹnẹ kugbe Jesu Kristi re dia ihwo re ma dia egba rẹ owian vwẹ akpọ vẹ odjuvwu.

ỌGBA OWIAN RODE KUGBE ONOTU RẸ ỌWENA

4, 5. Idjerhe vọ yen Baibol na vwo dje nẹ erhuvwu nẹ iruo rẹ Jihova cha?

4 Jihova yen Ọgba Owian rọ Ma Rho. Jẹnẹsis 1:1 tare nẹ, “nẹ otọ rhe Ọghẹnẹ vwọ ma odjuvwu vẹ akpọ” na. Ọke rẹ Ọghẹnẹ vwọ ma akpọ na nu, ọ da tanẹ “oyovwiri gangan.” (Jẹnẹsis 1:31) Kọyen oma vwerhen rọ kpahen iruo ro ruru vwẹ akpọ na. Aphro herọ-ọ, oma vwerhen Jihova rọ dia “Ọghẹnẹ re bruba kẹ na” fikirẹ iruo ro ruru na.​—1 Timoti 1:11.

5 Ọghẹnẹ rẹ avwanre rọ dia ọgba owian na je rhe dobọ rẹ owian ji-i. Ọke grongron ra vwọ ma akpọ na nu, Jesu da ta: “Ọsẹ mẹ ji ru iruo te ọke na.” (Jọn 5:17) Iruo vọ yen Ọsẹ na ruẹ? Vwo nẹ odjuvwu rhe, ọ vwẹrote, je chochọ rẹ ihworakpọ. O vwo “ẹma ọkpokpọ,” kọyen Inenikristi ra vwẹ ẹwẹn ọfuanfon jẹreyọ ri che nene Jesu sun vwẹ odjuvwu. (2 Kọrẹnt 5:17) Ọghẹnẹ ra wian kpahen orugba rẹ ọhọre rọyen vwọ kẹ ihworakpọ rere ihwo ri vwo ẹguọnọ rọyen se vwo vwo arhọ rẹ bẹdẹ vwẹ akpọ kpokpọ. (Rom 6:23) Oma vwerhen Jihova kpahen erhuvwu ro nẹ iruo nana cha. Iduduru rẹ ihwo kerhọ kẹ ovuẹ rẹ Uvie na, Ọghẹnẹ si ayen kẹrẹ oma, ayen re wene idjerhe rẹ akpeyeren rayen rere ayen sa vwọ dia vwevunrẹ ẹguọnọ rẹ Ọghẹnẹ.​—Jọn 6:44.

6, 7. Omamọ rẹ uruemu ra vwọ dia ọgba owian vọ yen Jesu vwori?

6 O krire ra riẹn Jesu phiyọ ọgba owian. Tavwen Jesu ke rhe otọrakpọ na, o nene Ọghẹnẹ wian “kerẹ onotu rẹ ọwena” ọke ra vwọ ma kemu kemu ejobi “re hẹ obo odjuvwu kugbe re hẹ otọ rẹ akpọ na.” (Isẹ 8:22-31; Kọlose 1:15-17) Ọke rọ vwọ rhe otọrakpọ na, Jesu je dobọ rẹ owian ji-i. Ọke rọ vwọ hẹ omotete, o yono iruo rẹ ebanbọn, a da  rhe riẹn phiyọ “ọwena [ikapẹnta].” * (Mak 6:3) Iruo nana guọnọ ẹgba kugbe ena sansan ma rho vwẹ ọke yena kiridie o vwo eki ra da she irhe, asan ra da bẹrẹ irhe yẹrẹ ekuakua rẹ ẹlẹtriki ra vwọ wia-an. Wọ sa vwẹ ẹro roro nẹ Jesu ra guọnọ irhe ro che vwo ruiruo, ọ sa dianẹ ọyen ọvo yen tobọ she irhe na, o mi mu ayen kpo asan rọ da cha vwẹ ayen vwo ruiruo? Wọ sa vwẹ ẹro roro Jesu rọ bọn iwevwin, ichivwo rẹ iwevwin, kanre ẹchẹ yẹrẹ egbara vẹ erọnvwọn efa re dia uwevwin? Jesu komobọ riavwerhen ro no cha siẹrẹ ohwo da dia ọgba owian.

7 Jesu nabọ gbẹrophiyotọ ruiruo rẹ aghwoghwo na. Ẹgbukpe erha gbẹ ubro yen Jesu vwo muomaphiyọ iruo rẹ aghwoghwo na, rọ dia iruo rọ ma ghanre kparobọ. Kidie nẹ ọ guọnọ ghwoghwo kẹ ihwo buebun, ọ rha ghwọrọ ọke kufia-a, irhiọke ride yen ọ vwọ tuanphiyọ, o mi rhe kuophiyọ vwẹ ason. (Luk 21:37, 38; Jọn 3:2) Ọ “yan wan irere vẹ ẹko na, ro ghwoghwo jo gbe iyẹnrẹ esiri rẹ Uvie rẹ Ọghẹnẹ.” (Luk 8:1) Imaili ujorin buebun yen Jesu vwẹ awọ yan vwẹ etọ ri brẹ ighworighwo rere o se vwo ghwoghwo iyẹnrẹn esiri na kẹ ihwo.

8, 9. Idjerhe vọ yen oma vwọ vwerhen Jesu vwẹ iruo rọyen?

8 Oma vwerhen Jesu vwẹ iruo rẹ aghwoghwo rọyen? E! Ọ kọn emamọ rẹ uyota rẹ Uvie na, ọtiọyena, ọ da yan jẹ udju rọ ghwo te orhọ vwo. Re vwo ruiruo rẹ Ọghẹnẹ kẹ Jesu ẹgba te asan rọ da tobọ choma rọ vwọ kpairoro vrẹ emuọre fikirẹ iruo na. (Jọn 4:31-38) Roro kpahen oborẹ oma vwerhen Jesu te ọke ro vwo ruiruo na re nu, kọ sa nabọ nẹ iyẹnrẹn kẹ Ọsẹ rọyen nẹ, “Me vwẹ urinrin kẹ owẹ vwẹ akpọ na, ri mi vwo ru iruo ru wọ vwọ kẹ vwẹ ru gba.”​—Jọn 17:4.

 9 Jihova kugbe Jesu yen udje rẹsosuọ rẹ ihwo rẹ oma vwerhenre vwẹ iruo rayen. Ẹguọnọ rẹ avwanre vwo kpahen Jihova yen mu avwanre vwọ “vwẹ ẹro kere.” (Ẹfesọs 5:1) Ẹguọnọ rẹ avwanre vwo kpahen Jesu yen ji mu avwanre vwọ “vwẹ ẹro kere.” (1 Pita 2:21) Asaọkiephana, e gbe jẹ avwanre roro kpahen oborẹ oma sa vwọ vwerhen avwanre vwẹ iruo rẹ avwanre.

OBORẸ AVWANRE SA VWỌ MRẸ OMAVWERHOVWẸN VWẸ IRUO RẸ AVWANRE

Ra vwọ yan nene iyono rẹ Baibol na sa chọn wẹ uko vwọ mrẹ omavwerhovwẹn vwẹ iruo wẹn

10, 11. Die yen sa chọn avwanre uko vwo vwo omamọ rẹ uruemu kpahen iruo?

10 Iruo, ọyen ẹbẹre ọvo rẹ akpeyeren rẹ Inenikristi rẹ uyota. Avwanre guọnọ evunvọnvwẹ vẹ omavwerhovwẹn vwẹ iruo rẹ avwanre, ẹkẹvuọvo ọnana sa dia bẹnbẹn siẹrẹ avwanre de ruiruo ro shephiyọ avwanre oma-a. Mavọ yen avwanre sa vwọ mrẹ omavwerhovwẹn vwẹ iruo rẹ avwanre vwẹ ẹdia tiọyena?

11 Re vwo vwo uruemu rẹ abavo. Avwanre che se wene ẹdia rẹ avwanre ọkieje-e, ẹkẹvuọvo avwanre se wene uruemu rẹ avwanre. E vwo roro kpahen ẹro rẹ Ọghẹnẹ vwo ni iruo sa chọn avwanre uko vwo vwo omamọ rẹ uruemu kpahen iruo. Kerẹ udje, wọ da dia ọgbuyovwin rẹ orua, otorobo rẹ igho ru wọ mrẹ nẹ iruo na havwen te-e, iruo na yen chọn wẹ uko vwọ ghẹrẹ orua wẹn. Ọtiọyena, ẹroevwote rẹ orua wẹn dia oghwa otete vwẹ ẹro rẹ Ọghẹnẹ-ẹ. Ota rọyen tare nẹ ohwo rọ kọn okọn phiyotọ kẹ orua rọye-en “bra nọ ohwo ro ji segbuyota-a.” (1 Timoti 5:8) Ọmrẹvughe nẹ iruo wẹn yen chọn wẹ uko vwọ vwẹrote orua wẹn, rọ dia oghwa rẹ Ọghẹnẹ vwọ kẹ wẹ, sa chọn wẹ uko vwọ mrẹ omavwerhovwẹn rọ kanre ihwo rẹ owẹ vẹ ayen gbe ruiruo.

12. Erere vọ yen che no rhe siẹrẹ avwanre da dia ọgba owian kugbe ihwo rẹ uyota vwẹ iruo rẹ avwanre?

 12 Dia ọgba owian vẹ ohwo rẹ uyota. Ra vwọ dia ọgba owian kugbe evwo yono obo re se vwo ruiruo rẹ avwanre fiotọ sa ghwa erere rhe. Ihwo ri vwo ikọmpini vwẹ ẹro ọghanghanre vwo nẹ egba owian, re je tẹn ona rẹ owian na. (Isẹ 12:24; 22:29) Kerẹ Inenikristi rẹ uyota, ofori nẹ avwanre dia ihwo rẹ uyota vwẹ iruo rẹ avwanre, a kẹnoma kẹ e vwo cho igho, ekuakua rẹ iruo, yẹrẹ ọke rẹ iruo na. (Ẹfesọs 4:28) Kirobo rẹ avwanre yonori vwẹ uyovwinrota 14, ra vwọ dia ohwo rẹ uyota vọnre vẹ erere. A sa  vwẹroso ohwo ro vwo ẹkuruemu rọ vwọ ta uyota vwẹ iruo rọyen. Owenẹ ọga rẹ avwanre niro so nẹ avwanre ọgba owian yẹrẹ o niro so-o, avwanre se vwo omavwerhovwẹn ro no cha siẹrẹ avwanre de vwo evun rọ “pha phẹphẹ,” je riẹn nẹ oborẹ avwanre ruẹ na vwerhen Ọghẹnẹ rẹ avwanre vwo ẹguọnọ rọyen ivun.​—Hibru 13:18; Kọlose 3:22-24.

13. Erere vọ yen se nẹ omamọ rẹ uruemu rẹ avwanre rhe vwẹ asan rẹ e de ruiruo?

13 Ra vwọ riẹn nẹ uruemu rẹ avwanre sa vwẹ urinrin kẹ Ọghẹnẹ. Ihwo efa che noso siẹrẹ avwanre da sẹro rẹ omamọ rẹ uruemu rẹ Onenikristi rẹ avwanre vwẹ asan avwanre de ruiruo. Erere vọ yen che no rhe? Ọyena cha nẹrhẹ avwanre “mu ọghọ kẹ uyono rẹ Ọghẹnẹ Osivwi rẹ avwanre.” (Taitọs 2:9, 10) E, uruemu avwanre sa nẹrhẹ ihwo vwo omavwerhovwẹn kpahen ẹga rẹ avwanre, ọnana me nẹrhẹ ẹga na si ayen urhuru. Roro kpahen oborẹ oma cha vwerhen owẹ te siẹrẹ ohwo rẹ iruo wẹn de kurhẹriẹ fikirẹ omamọ rẹ uruemu ru wo djephia vwẹ iruo! Gbe di roro: Erere vọ yen yovwin vrẹ wọ vwọ riẹn nẹ uruemu oyoyovwin wẹn vwẹ urinrin kẹ Jihova, je nẹrhẹ oma vwerhọn?​—Se Isẹ 27:11; 1 Pita 2:12.

RA VWỌ VWẸ AGHWANRE SANE IRUO

14-16. Siẹrẹ avwanre de hirharoku ojẹ rẹ iruo, enọ vọ yen ofori nẹ avwanre roro kpahen?

14 Baibol na ghwe djunute koka koka rẹ iruo ri shephiyọ vẹ iri shephiyọ-ọ. Ọ dia ọnana mudiaphiyọ nẹ avwanre sa rhiabọreyọ koka koka rẹ iruo ra kẹ avwanre-e. Baibol na sa chọn avwanre uko vwọ sane omamọ rẹ iruo rọ cha vwerhen Ọghẹnẹ oma, je kẹnoma kẹ iruo ri che miovwo ivun. (Isẹ 2:6) Siẹrẹ avwanre de hirharoku ojẹ rẹ iruo, o vwo enọ eghanghanre ivẹ rẹ avwanre che roro kpahen.

15 Iruo nana sa nẹrhẹ mi ru obo rẹ Baibol na tare nẹ ọ chọre? Ota rẹ Ọghẹnẹ tare nẹ uji echo, efian eguon, kugbe  a vwọ ma ema chọre. (Eyanno 20:4; Iruo Rẹ Iyinkọn Na 15:29; Ẹfesọs 4:28; Ẹvwọphia 21:8) Avwanre cha sen iruo re cha nẹrhẹ avwanre ru erọnvwọn tiọyena. Ẹguọnọ rẹ avwanre vwo kpahen Jihova yen cha nẹrhẹ avwanre sen iruo re vwọso irhi rẹ Ọghẹnẹ.​—Se 1 Jọn 5:3.

16 Iruo nana cha nẹrhẹ avwanre vwobọ phiyọ yẹrẹ titi uruemu rọ chọre? Roro kpahen udje ọvo. Ra vwọ wian kerẹ ohwo ro dede erhorha ghwa chọ-ọ. Ọ da rha dianẹ  Onenikristi mrẹ oka rẹ iruo tiọyena vwẹ họsipito ra da kparan evun vwo? A rhọnvwere nẹ iruo rọyen churobọ si evun ẹkparọn na phiọgu-un. Ẹkẹvuọvo, iruo rọyen vwẹ etiyin rhe che toroba ẹyan obaro rẹ họsipito rọ kparan evun, rọ dia obo re vwọso Ota rẹ Ọghẹnẹ-ẹ? (Eyanno 21:22-24) Kerẹ ihwo ri vwo ẹguọnọ rẹ Jihova, avwanre guọnọ vwobọ vwẹ oborẹ Baibol na rhọnvwephiyọ-ọ.

17. (a) Die yen avwanre che roro kpahen siẹrẹ avwanre da jẹ ojẹ rẹ iruo? (Ni ekpeti na “ Ofori Nẹ Mi Rhiabọreyọ Iruo na?.”) (b) Mavọ yen ẹwẹn obrorhiẹn rẹ avwanre sa chọn avwanre uko vwo brorhiẹn re cha vwerhen Ọghẹnẹ ivun?

17 Siẹrẹ a da nabọ fuẹrẹn ẹkpahọnphiyọ rẹ enọ ivẹ ra nọre vwẹ ẹkoreta 15 vẹ 16, kẹ a sa rhuẹrẹ buebun rẹ eta ri shekpahen iruo phiyọ. Erọnvwọn efa je herọ ri fori nẹ  eroro kpahen siẹrẹ a da jẹ ojẹ rẹ iruo. * Odibo rọ fuevun na cha sa ghwa kẹ avwanre irhi ri shekpahen koka koka rẹ iruo-o. Ẹdia nana yen a da guọnọ aghwanre mie avwanre. Kirobo rẹ avwanre yonori vwẹ Uyovwinrota 2, ofori nẹ avwanre vwẹ Ota rẹ Ọghẹnẹ yono ẹwẹn obrorhiẹn rẹ avwanre, a me je reyọ vwo ruiruo vwẹ akpeyeren rẹ avwanre. Ẹwẹn obrorhiẹn rẹ avwanre sa chọn avwanre uko vwo brorhiẹn rẹ obo re vwerhen Ọghẹnẹ ivun, je dia vwevunrẹ ẹguọnọ rọyen siẹrẹ avwanre de “vwo ọhọ [re] se vwo vughe emu esiri vẹ ọbrabra.”​—Hibru 5:14.

RA VWỌ VWẸ ẸRO ABAVO VWO NI IRUO

18. Diesorọ ọ ghwa lọhọ ra vwọ vwẹ ẹro rẹ abavo vwo ni oyerinkugbe rẹ avwanre vẹ ọ rẹ Jihova-a?

18 Ọ ghwa lọhọ ra vwọ vwẹ ẹro abavo vwo ni oyerinkugbe rẹ avwanre vẹ ọ rẹ Jihova vwẹ “oba rẹ ẹdẹ” “ebrabra” nana-a. (2 Timoti 3:1) Ra vwọ mrẹ iruo ghwa lọhọ-ọ. Kerẹ Inenikristi rẹ uyota, avwanre mrẹvughe nẹ ra vwọ ghẹrẹ orua rẹ avwanre pha ghanghanre. Ẹkẹvuọvo, avwanre rhe nomaso-o, okeke rẹ asan re de ruiruo yẹrẹ uruemu ra vwọ reyọ vwọ tua ekuakua rẹ akpeyeren rẹ akpọ nana se djobọte ẹga rẹ avwanre vwọ kẹ Ọghẹnẹ. (1 Timoti 6:9, 10) E jẹ avwanre roro kpahen obo re se vwo vwo ẹro rẹ abavo, ji “vughe obo ri yovwiri.”​—Filipae 1:10.

19. Diesorọ Jihova vwo fo ohwo rẹ avwanre vwẹroso, die yen ọyena cha chọn avwanre uko kẹnoma kẹ?

19 Vwẹroso Jihova. (Se Isẹ 3:5, 6.) Jihova fo ohwo rẹ avwanre vwẹroso? Ọyen re vwẹrote avwanre. (1 Pita 5:7) Ọ riẹn ọdavwẹ rẹ avwanre vrẹ oborẹ avwanre riẹnre, ọ je choma rọ vwọ chọn avwanre uko. (Une Rẹ Ejiro 37:25) Ofori nẹ avwanre kerhọ rẹ Ota rọyen rọ tare nẹ, “si oma wẹn  nẹ urhuru si vwe rẹ igho, jẹn obo ri wo vwori da wẹ ẹro; kidie [Ọghẹnẹ] tarọ nure nẹ, Me sa phiẹn wẹ-ẹ eyẹ me sa sen wẹ-ẹ.” (Hibru 13:5) Ihwo buebun rehẹ ẹga rẹ ọkieje se se oseri rẹ ota yena. Avwanre da ghene vwẹroso Jihova nẹ ọ cha vwẹrote avwanre, avwanre cha kẹnoma kẹ ẹwan  rẹ obo ra sa vwọ vwẹrote orua rẹ avwanre. (Matiu 6:25-32) Avwanre cha nẹrhẹ iruo rẹ avwanre gbowọphiyọ ẹga rẹ avwanre-e, kerẹ aghwoghwo na kugbe uyono ẹra.​—Matiu 24:14; Hibru 10:24, 25.

20. Die yen o mudiaphiyọ ẹro rẹ avwanre vwọ dia ọvuọvo, mavọ wo se vwo ru ọtiọyen?

20 Jẹ ẹro wẹn dia ọvuọvo. (Se Matiu 6:22, 23.) Re vwo vwo ẹro ọvuọvo mudiaphiyọ nẹ e yeren akpọ rẹ kekpe. Onenikristi tẹnroviẹ orọnvwọn vuọvo, ọyehẹ eruo rẹ ọhọre rẹ Ọghẹnẹ. Siẹrẹ ẹro rẹ avwanre da dia ọvuọvo, avwanre rha cha vwọ tua iruo ride kugbe akpeyeren rẹ eheri-i. Avwanre rhe che she ufi ra vwọ reyọ vwọ tua ekuakua kpokpọ ri she rhe rẹ ineki vwọ phiẹn ihwo rere ayen vwo roro nẹ erọnvwọn yena yen kẹ ohwo omavwerhovwẹ-ẹn. Mavọ yen ẹro wẹn sa vwọ dia ọvuọvo? Kẹnoma kẹ uruemu ra vwọ riesa. Wọ dẹ uwevwin wẹn vọn vẹ erọnvwọn re cha ghwọrọ ọke wẹn kufia-a. Kerhọ rẹ uchebro rẹ Baibol na rọ tare nẹ, “avwanre de vwo emuọre ra da rha mrẹ emwa vwo rhuo, e gbe jẹ eyena te kẹ avwanre.” (1 Timoti 6:8) Davwẹngba vwo ru akpeyeren wẹn lọhọ.

21. Diesorọ o vwo fo nẹ e phi erọnvwọn re ma ghanre phiyọ ẹdia rẹsosuọ, die yen ofori nẹ ọ dia orọnvwọn rẹsosuọ vwẹ akpeyeren avwanre?

21  Bru ẹkẹn kẹ oma wẹn vwẹ ẹga rẹ Ọghẹnẹ, wọ me je yan muo. Rọ vwọ dianẹ avwanre che se ru erọnvwọn ejobi na-a, ko fori nẹ e phi erọnvwọn re ma ghanre phiyọ ẹdia rẹsosuọ. Ọ rha dia ọtiọye-en, erọnvwọn ri fiemu-u sa ghwọrọ ọke rẹ avwanre kufia, avwanre rhe che se ru obo re ma ghanre-e. Die yen ofori nẹ ọ dia orọnvwọn rẹsosuọ vwẹ akpeyeren rẹ avwanre? Ihwo buebun ghwọrọ ọke rayen kpo isikuru ride rere ayen se vwo vwo omamọ rẹ iruo vwẹ akpọ nana. Ẹkẹvuọvo, Jesu vuẹ idibo rọyen nẹ ayen “ka guọnọ Uvie rẹ Ọghẹnẹ tavwe.” (Matiu 6:33) Vwọrẹ uyota, kerẹ Inenikristi, avwanre vwẹ Uvie rẹ Ọghẹnẹ vwọ kobaro vwẹ akpeyeren. Ofori nẹ oborẹ avwanre yeren akpọ  wan, kọyen ojẹ rẹ avwanre, ẹkẹn rẹ avwanre bru kẹ oma, kugbe oborẹ avwanre vwọ tua, djephia nẹ ọdavwẹ rẹ Uvie na kugbe ọhọre rẹ Ọghẹnẹ yen ma ghanre kẹ avwanre, ọ dia ojevwe rẹ akpọ nana-a.

MUOMAPHIYỌ IRUO RẸ AGHWOGHWO NA

Avwanre se dje ẹguọnọ rẹ avwanre kẹ Jihova womarẹ a vwọ vwẹ iruo rẹ aghwoghwo na vwọ kobaro vwẹ akpeyeren

22, 23. (a) Iruo vọ yen ma ghanre kẹ Inenikristi, mavọ yen avwanre se vwo djephia nẹ iruo na yen ma ghanre kẹ avwanre? (Ni ekpeti na “ Orhiẹn Mi Bruru Nẹrhẹ Mi Yeren Akpọ rẹ Evuvọnvwẹ vẹ Omavwerhovwẹn.”) (b) Die yen orhiẹn wẹn kpahen iruo?

22 A vwọ riẹn nẹ ọke rẹ oba na yen avwanre hepha na, avwanre ke tẹnrovi iruo rọ ma ghanre kẹ Inenikristi rẹ uyota, ọyehẹ aghwoghwo na kugbe odibo egbe. (Matiu 24:14; 28:19, 20) Kerẹ Jesu rọ dia Ohwo rẹ avwanre vwẹrokere na, avwanre guọnọ muomaphiyọ iruo ro sivwin arhọ na. Mavọ avwanre se vwo djephia nẹ iruo nana ghanre kẹ avwanre? Ihwo rẹ Ọghẹnẹ buebun vwomakpahotọ kẹ iruo rẹ aghwoghwo na kerẹ ighwoghwota vwevunrẹ ukoko. Evo ga kerẹ ekobaro yẹrẹ imishọnare. Kiridie nẹ emiọvwọn buebun riẹn ọghanrovwẹ re vwo vwo obo ra tẹnrovi vwẹ ẹga rẹ Ọghẹnẹ, ayen ki jiri ẹga rẹ ọkieje kẹ emọ rayen. Ighwoghwota ri ghwoghwo Uvie na vẹ oruru mrẹ omavwerhovwẹn vwẹ iruo rayen? E! Ra vwọ ga Jihova vẹ udu avwanre eje, ọyen obo re sa kẹ ohwo omavwerhovwẹn, evunvọnvwẹ, kugbe ebruphiyọ buebun.​—Se Isẹ 10:22.

23 Buebun rẹ avwanre wian ọke grongron rere a sa vwọ vwẹrote orua rẹ avwanre. Karophiyọ nẹ Jihova guọnọre nẹ avwanre riavwerhen rẹ iruo rẹ avwanre. Siẹrẹ iruemu vẹ iroro rẹ avwanre de shephiyọ iyono rẹ Baibol na, avwanre ke sa mrẹ omavwerhovwẹn vwẹ iruo rẹ avwanre. E gbe jẹ avwanre brorhiẹn rere iruo rẹ avwanre vwo je gbowọphiyọ iruo kiriguo rẹ avwanre rọ dia aghwoghwo rẹ iyẹnrẹn esiri rẹ Uvie Ọghẹnẹ na. A da vwẹ iruo nana kobaro vwẹ akpeyeren, kọyen e dje ẹguọnọ rẹ avwanre kẹ Ọghẹnẹ, ọtiọyena ka sa dia evunrẹ ẹguọnọ rọyen.

^ e?ko. 6 Ubiota rẹ Grik ra fan phiyọ “ọwena [ikapẹnta]” na, ọyen “odẹ re vwo se kohwo kohwo rọ wẹ irhe ruiruo, owenẹ ọ dia iwevwin yen ọ bọn yẹrẹ ọ kanre ekuakua ra vwẹ irhe ruẹ.”

^ e?ko. 17 Vwọ kẹ evuẹ efa ri shekpahen obo re roro kpahen ọke ra da guọnọ iruo, ni Uwevwin Orhẹrẹ rẹ April 15, 1999, aruẹbe 28-30, kugbe July 15, 1982, aruọbe 26, e rẹ Oyibo.