Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Iseri ri Jihova

Sane ejajẹ Urhobo

 UYOVWINROTA 5

Obo re Se Vwo jẹ Ẹbẹre Ọvo rẹ Akpọ na Ẹdia

Obo re Se Vwo jẹ Ẹbẹre Ọvo rẹ Akpọ na Ẹdia

“Ovwan rha dia e rẹ akpọ na-a.”​—JỌN 15:19.

1. Die yen Jesu kanrunumu ason rọ koba tavwen o ki ghwu?

ASON rọ koba Jesu ki ghwu, o dje ọdavwẹ kpahen obo re cha phia kẹ idibo rọyen vwẹ obaro na. Ọ nẹrhovwo kpahen ayen, rọ vwọ ta kẹ Ọsẹ rọyen: “Me vwẹ ota wẹn vwọ kẹ ayen; akpọ na de tuoma rẹ ayen fikiridie ayen dia ọ rẹ akpọ na-a, mrẹmrẹ kirobo re me je dia ọ rẹ akpọ na-a na.” (Jọn 17:14) Vwevunrẹ ẹrhovwo na, Jesu dje ẹguọnọ okokodo ro vwo kpahen idibo rọyen phia kugbe ọghanrovwẹ rẹ ota rọ ta kẹ evo usun rayen ason yena: “Ovwan rha dia e rẹ akpọ na-a.” (Jọn 15:19) Ọtiọyena, kọ pha ghanghanre kẹ Jesu rẹ idibo rọyen vwo jẹ ẹbẹre ọvo rẹ akpọ na ẹdia!

2. Die yen “akpọ na” rẹ Jesu djunute na?

2 “Akpọ na” rẹ Jesu djunute na mudiaphiyọ ihworakpọ rẹ Eshu suẹn, ri bru oma nu obotọ rẹ usuon rẹ Ọghẹnẹ, re dia eviẹn vwọ kẹ uruemu rẹ urhuru vẹ omaephuo rẹ Eshu djephia. (Jọn 14:30; Ẹfesọs 2:2; 1 Jọn 5:19) Vwọrẹ uyota, “ugbeyan rẹ akpọ [yena] yọ vwẹ oma ru ọvweghrẹ rẹ Ọghẹnẹ.” (Jems 4:4) Mavọ yen ihwo re guọnọ sẹro rẹ oma rayen vwevunrẹ ẹguọnọ rẹ Ọghẹnẹ sa vwọ dia evunrẹ akpọ na, je vwẹ ọke vuọvo jẹ ẹbẹre ọvo rọyen ẹdia? Avwanre che roro kpahen idjerhe iyorin e se vwo ru ọnana: ra vwọ vwomakpotọ kẹ Uvie rẹ Ọghẹnẹ rẹ Jesu suẹn, e mi ji jẹ ẹbẹre ọvuọvo ẹdia vwẹ usuon rẹ akpọ nana, ra vwọ sen ẹwẹn rẹ akpọ nana, ra vwọ dia ihwo re sẹn osẹnvwe rẹ abavo, re  vwo ruẹ ẹro rẹ avwanre lọhọ, re ji vwo ku ekuakua rẹ ofovwin rẹ Ọghẹnẹ phiyọ.

WỌ DIA ẸBẸRE VUỌVO RẸ USUON AKPỌ NA-A

3. (a) Ọke rẹ Jesu vwọ rhe otọrakpọ na, ubiẹro vọ yen o vwo ni oseghe rẹ usuon? (b) Diesorọ a vwọ tanẹ Inenikristi ra jẹreyọ ihwo re ji uwevwin? (Vwẹ eta rehẹ obotọ na vwọba kpahenphiyọ.)

3 Ukperẹ Jesu vwo vwobọ vwẹ oseghe rẹ usuon ọke rọ vwọ hẹ otọrakpọ na, o de muomaphiyọ aghwoghwo rẹ Uvie rẹ Ọghẹnẹ rọ dia usuon rọhẹ odjuvwu rẹ ọyen komobọ da cha dia Ovie vwẹ ọke rọ cha obaro na. (Daniẹl 7:13, 14; Luk 4:43; 17:20, 21) Kọyensorọ, ọke ro vwo mudia obaro rẹ Osun rẹ Rom re se Pọntiọs Pailet, Jesu da ta: “Uvie mẹ dia ọ rẹ akpọ nana-a.” (Jọn 18:36) Idibo rọyen vwẹrokere udje rọyen rẹ ayen vwọ vwomakpotọ kẹ Kristi vẹ Uvie rọyen, ayen ji vwo ghwoghwo Uvie na vwọ kẹ ihworakpọ. (Matiu 24:14) Pọl de si: “Ọtiọyen na avwanre kẹ ihwo rẹ Kristi ji uwevwi, oma rẹ avwanre ọyen Ọghẹnẹ wan vuẹ uwevwi na. Avwanre vwẹ odẹ rẹ Kristi rẹ ovwan, rere wa vẹ Ọghẹnẹ rhuẹrẹ kugbe.” *​—2 Kọrẹnt 5:20.

4. Mavọ yen Inenikristi rẹ uyota eje vwo djephia nẹ ayen vwomakpotọ kẹ Uvie rẹ Ọghẹnẹ? (Ni ekpeti na “ Inenikristi rẹ Ọke rẹ Awanre Dia Ẹbẹre Vuọvo rẹ Akpọ Na-a.”)

4 Ihwo re ji uwevwin kpo ẹkuotọ ọfa rere ayen re mudia kẹ ẹkuotọ rayen, vwobọ vwẹ usuon rẹ ẹkuotọ re ji ayen ra na-a. Ẹkẹvuọvo ayen titi usuon rẹ ẹkuotọ rẹ ayen nurhe na. Ọtiọyen ọ hepha vwọ kẹ Inenikristi ra jẹreyọ na. Ayen “emotọ rẹ odjuvwu.” (Filipae 3:20) Fikirẹ oruru rẹ ayen vwo ghwoghwo na, ayen sa vwẹ ukẹcha kẹ iduduru rẹ “igodẹ efa” rẹ Kristi rere ayen vẹ “Ọghẹnẹ rhuẹrẹ kugbe.”  (Jọn 10:16; Matiu 25:31-40) Igodẹ efa na nene Inenikristi ra jẹreyọ vwẹ obuko, rẹ ayen vwọ vwẹ ukẹcha kẹ e ra jẹreyọ na. Kerẹ ẹko rẹ igodẹ ri kuomakugbe, ayen ghwoghwo Uvie rẹ Mesaya na, ayen dia ẹbẹre vuọvo rẹ usuon rẹ akpọ na-a.​—Se Aizaya 2:2-4.

5. Mavọ yen ukoko rẹ Inenikristi vwọ fẹnẹ ihwo rẹ Izrẹl rẹ awanre, idjerhe vọ yen Inenikristi vwo dje ofẹnẹ nana phia?

 5 Ọ dia omaevwokpotọ kẹ Kristi ọvo ọyensorọ Inenikristi rẹ uyota vwo jẹ ẹbẹre vuọvo rẹ akpọ na ẹdia-a. Vwọ fẹnẹ ihwo rẹ Izrẹl rẹ ọke awanre rẹ Jihova ghare ẹkuotọ kẹ, avwanre ẹbẹre ọvo rẹ iniọvo rẹ akpọeje. (Matiu 28:19; 1 Pita 2:9) Ẹkẹvuọvo, avwanre da vwomaba oseghe rẹ usuon rẹ akpọ na, egbomọphẹ rẹ avwanre vwo ghwoghwo kugbe oyerinkugbe rẹ avwanre vẹ iniọvo rẹ avwanre kọ cha dia ẹdia rẹ imuoshọ. (1 Kọrẹnt 1:10) Vwọba, vwẹ ọke ofovwin, avwanre cha họnre vwọso iniọvo avwanre ra vuẹ avwanre nẹ e vwo ẹguọnọ rayen. (Jọn 13:34, 35; 1 Jọn 3:10-12) Ọnana yen sorọ Jesu vwọ vuẹ idibo rọyen nẹ ayen vwobọ vwẹ ofovwi-in. Ọ tobọ vuẹ ayen nẹ ayen vwo ẹguọnọ rẹ ivwighrẹn rayen.​—Matiu 5:44; 26:52; ni ekpeti na “ Mẹvwẹ Ẹbẹre Ọvo rẹ Akpọ Na?

6. Mavọ yen omaẹvwọkpahotọ wẹn vwọ kẹ Ọghẹnẹ djobọte oyerinkugbe wẹn vẹ ọ rẹ Siza?

6 Kerẹ Inenikristi rẹ uyota, avwanre vwomakpahotọ kẹ Ọghẹnẹ, ọ dia ohworakpọ, ukoko rẹ ihworakpọ yẹrẹ ẹkuotọ-ọ. “Wo vwo oma wẹ-ẹn; o vwo unuigho ra dẹ wẹ,” eriyin 1 Kọrẹnt 6:19, 20, tare. Ọtiọyena, dede nẹ idibo rẹ Jesu vwẹ ẹkẹn rẹ “Siza,” vwọ kẹ womarẹ a vwọ hwosa rẹ uyovwin, muọghọ, je vwomakpotọ kẹ siẹrẹ ọ rha vwọso Ọghẹnẹ-ẹ, ayen je “vwẹ ọ rẹ Ọghẹnẹ kẹ Ọghẹnẹ.” (Matiu 22:21; Rom 13:1-7) Ọnana churobọ si ẹga rayen, ẹguọnọ ro nẹ otọ rẹ udu rhe, kugbe ẹme-enyo rayen. Ọ da tobọ dia ughwu, ayen muegbe rẹ ayen vwo ghwu kẹ Ọghẹnẹ.​—Luk 4:8; 10:27; se Iruo Rẹ Iyinkọn Na 5:29; Rom 14:8.

“SEN ẸWẸN RẸ AKPỌ NA”

7, 8. Die yen “ẹwẹn rẹ akpọ nana,” idjerhe vọ yen o vwo “ruẹ iruo” vwevunrẹ oma rẹ ihwo re kerhọ-ọ?

7 Idjerhe ọfa rẹ Inenikristi vwo jẹ ẹbẹre ọvo rẹ akpọ na ẹdia yen a vwọ sen ẹwẹn rẹ akpọ na. Pọl de si:  “Asaọkiephana ọ dia [“ẹwẹn,” NW ] rẹ akpọ na avwanre vwori-i, ẹkẹvuọvo [“ẹwẹn,” NW ] na ro nẹ obọ rẹ Ọghẹnẹ rhe.” (1 Kọrẹnt 2:12) Pọl vuẹ iniọvo rẹ Ẹfesọs: “Ovwan ka yan . . . nene idjerhe rẹ akpọ nana, nene osun rẹ ogangan rẹ irharheghe, [“ẹwẹn,” NW ] ro ruẹ iruo vwẹ asaọkiephana vwẹ evun rẹ emọ ri jẹ ọghọ evwo na.”​—Ẹfesọs 2:2, 3.

8 “Aphopho” yẹrẹ ẹwẹn rẹ akpọ na, ọyen ẹgba ra sa mrẹ-ẹ, ro mu ihwo vwọ reyọ vwọso Ọghẹnẹ, rọ je nẹrhẹ “urhuru si vwe rẹ ugboma” vẹ “ojevwe rẹ ẹro” na ganphiyọ. (1 Jọn 2:16; 1 Timoti 6:9, 10) “Ẹgba” nana suẹn akpọ na womarẹ ugboma rẹ umwemwu na, ona rọyen rọ bẹn evughe, ophiẹnvwe rọyen vẹ ogangan rọyen rọ pha kerẹ aphopho. Kpobarophiyọ, o “ruẹ iruo” vwevunrẹ ihwo re kerhọ-ọ vwẹ idjerhe rọ vwọ nẹrhẹ ihwo na vwo iruemu echọchọ kerẹ, ohwo vwọ davwerhọn rẹ oma rọyen ọvo, omaephuo, urhurusivwe, ẹwẹn rẹ mẹvwẹ ọvo sun oma mẹ kugbe egbevwọsua. * Ra vwọ djẹkoko, ẹwẹn rẹ akpọ na nẹrhẹ iruemu rẹ Idẹbono vwẹ owọ muotọ vwẹ ubiudu rẹ ihworakpọ ememerha.​—Jọn 8:44; Iruo Rẹ Iyinkọn Na 13:10; 1 Jọn 3:8, 10.

9. Idjerhe vọ yen ẹwẹn rẹ akpọ na sa vwọ vwẹ owọ muotọ vwẹ ẹwẹn kugbe ubiudu avwanre?

9 Ẹwẹn rẹ akpọ na sa vwẹ owọ muotọ vwẹ ẹwẹn kugbe ubiudu wẹn? E, siẹrẹ wo rhe nomaso-o. (Se Isẹ 4:23.) Ememerha yen ọ tuanphiyọ, ọkiọvo womarẹ igbeyan ri me ruẹ, ẹkẹvuọvo, ayen vwo ẹguọnọ rẹ Jihova-a. (Isẹ 13:20; 1 Kọrẹnt 15:33) Ẹwẹn na je sa vwẹ owọ muotọ vwẹ udu wẹn siẹrẹ wo de se ẹbe ri fori-i, wo de nughe rẹ ihwo re banphiyọ yẹrẹ wo de kpo wẹbsaiti rẹ ihwo re vwọso ukoko na, wo de ni ifimu ri je fo, vẹ eha ẹha re de sivwẹn oseghe. Vwọrẹ uyota, kohwo kohwo yẹrẹ korọnvwọn korọnvwọn  ro dje iroro rẹ Eshu yẹrẹ ọ rẹ akpọ nana rẹ o suẹn na phia sa nẹrhẹ avwanre vwo ẹwẹn nana.

10. Mavọ yen avwanre sa vwọ sen ẹwẹn rẹ akpọ na?

10 Mavọ yen avwanre sa vwọ sen ẹwẹn omiomiovwin rẹ akpọ na, avwanre me je sẹro rẹ oma avwanre vwevunrẹ ẹguọnọ rẹ Ọghẹnẹ? Womarẹ e vwo vwobọ vọnvọn vwẹ ọrhuẹrẹphiyotọ rẹ Jihvova vwọ kẹ avwanre kugbe a vwọ nẹrhovwo vwọ kẹ ẹwẹn ọfuanfon rọyen ọkieje. Jihova vwo  ẹgba nọ Idẹbono yẹrẹ akpọ rẹ umwemwu nana rọhẹ obọ rẹ Eshu na. (1 Jọn 4:4) Ọghanre mamọ re vwo sikẹre Jihova womarẹ ẹrhovwo ọkeneje!

SẸN OSẸNVWE RẸ ABAVO

11. Idjerhe vọ yen ẹwẹn rẹ akpọ nana vwo djobọte osẹnvwe?

11 Irhuon, osẹnvwe kugbe oma-ẹfuọn rẹ ohwo yen nẹrhẹ e vughe oka rẹ ẹwẹn ro sun ohwo na. Vwẹ ẹkuotọ buebun, oborẹ ihwo sẹn osẹnvwe wan rhi shekpotọ te asan rẹ ohwo ọvo rọ ta ota vwẹ itẹlivishọni da tanẹ chekemerha e rhe che se vughe ofẹnẹ rọherọ vwẹ uvwre rẹ osẹnvwe rẹ igberadja vẹ ọ rẹ ihwo efa-a. Ọbe rọ ghwa iyẹnrẹn ọvo de rhe si: Emetẹ ri ji te ẹgbukpe ihwerha dede-e, je sẹn oka rẹ osẹnvwe nana, “rẹ ayen vwo rhie oma rayen phiyọ, ji ku iwun ekrẹkrẹ phiyọ.” Ọfa rọyen, ọyen ihwo vwọ sẹn osẹnvwe ri fanrhiẹn fanrhiẹn ro dje ẹwẹn rẹ ẹvwọsua kugbe jẹ ọghọ evwo phia.

12, 13. Uyono rẹ Baibol vọ yen avwanre nene a da ta ota kpahen osẹnvwe?

12 Kerẹ idibo rẹ Jihova, avwanre guọnọ sẹn osẹnvwe ro shephiyọ, ọ rọ fonro, ro ji fo kẹ asan rẹ avwanre ra. Ọkieje yen osẹnvwe rẹ avwanre vwọ dia ọ rẹ “oma evwokpotọ vẹ iroro,” kugbe “uruemu esiri,” kirobo ro fo kẹ ihwoeje “ri segbuyota.” Vwọrẹ uyota, ọdavwẹ avwanre ọ dia e vwo titi omobọ-ọ, ẹkẹvuọvo avwanre vwọ “sẹro rẹ oma rẹ [avwanre] vwẹ evun rẹ ẹguọnọ rẹ Ọghẹnẹ.” (1 Timoti 2:9, 10; Jude 21) Avwanre guọnọre nẹ osẹnvwe rẹ avwanre “dia ohwo rọ djahere vwẹ obo udu . . . rọ ghare gangan vwẹ obaro rẹ Ọghẹnẹ.”​—1 Pita 3:3, 4

13 Karophiyọ nẹ osẹnvwe rẹ avwanre se djobọte ẹro rẹ ihwo efa vwo ni ẹga rẹ uyota. Siẹrẹ ubiota rẹ Grik re se “abavo” na de shekpahen uruemu, o mudiaphiyọ ọghọ vẹ oshọ re djephia fikirẹ oborẹ ihwo efa roro. Ọdavwẹ rẹ avwanre ọyen e vwo roro kpahen ẹwẹn obrorhiẹn  rẹ ihwo efa ukperẹ avwanre vwo si ọrhan nẹ obo ri je avwanre yen avwanre che ru. Ma rho, avwanre guọnọ bru ọghọ phiyọ Jihova oma kugbe ihwo rọyen, ji dje oma avwanre kerẹ idibo rọyen womarẹ e vwo ru erọnvwọn “ejobi vwọ kẹ urinrin rẹ Ọghẹnẹ.”​—1 Kọrẹnt 4:9; 10:31; 2 Kọrẹnt 6:3, 4; 7:1.

Osẹnvwe mẹ bru ọghọ phiyọ Jihova oma?

14. A da ta ota kpahen osẹnvwe kugbe oma-ẹfuọn, enọ vọ yen ofori nẹ avwanre nọ oma rẹ avwanre?

14 Irhuon, osẹnvwe, kugbe ẹfuọn rẹ avwanre pha ghanghanre, ma rho ọke avwanre da hẹ aghwoghwo na yẹrẹ avwanre de kpo uyono. Nọ oma wẹn: ‘Osẹnvwe kugbe oma-ẹfuọn mẹ nẹrhẹ ihwo efa kprowọ? Osẹnvwe mẹ nẹrhẹ oma vo ihwo efa? Mi no nẹ, obo me sẹn wan jevwe, ọ da tobọ dianẹ ọyena cha djẹ wẹ uphẹn rẹ ẹga vwevunrẹ ukoko na?’​—Une Rẹ Ejiro 68:6; Filipae 4:5; 1 Pita 5:6.

15. Diesorọ Baibol na ghwe vwo irhi buebun ri shekpahen irhuon, osẹnvwe kugbe ẹfuọ-ọn?

15 Baibol na ghwe vwo irhi buebun ri shekpahen irhuon, osẹnvwe kugbe oma-ẹfuọn vwọ kẹ Inenikristi-i. Jihova guọnọ reyọ egbomọphẹ rẹ avwanre vwọ jẹ ojẹ yẹrẹ brorhiẹn romobọ mie avwanre-e. Ukperẹ ọtiọyen, ọ guọnọre nẹ avwanre dia ihwo ri te edje, ri roro kpahen iyono rẹ Baibol, ri “vwo ọhọ re se vwo vughe emu esiri vẹ ọbrabra.” (Hibru 5:14) Ma rho, Ọghẹnẹ guọnọre nẹ avwanre vwo  ẹguọnọ rọyen vẹ irivẹ rẹ avwanre. (Se Mak 12:30, 31.) Egbomọphẹ nana nẹrhẹ avwanre se rhuon irhuon, je sẹn osẹnvwe ro je avwanre. A mrẹ odjephia rẹ ọnana vwẹ osẹnvwe vẹ irhuon rẹ ihwo rẹ Jihova re nabọ shephiyọ ọkieje, o toro asan ayen de koko-o.

JẸ ẸRO WẸN LỌHỌ

16. Mavọ yen ẹwẹn rẹ akpọ na vwọ fẹnẹ obo rẹ Jesu yonori, enọ vọ yen ofori nẹ avwanre nọ oma avwanre?

16 Ẹwẹn rẹ akpọ na vọnre vẹ ophiẹnvwe rọ nẹrhẹ iduduru rẹ ihwo roro nẹ igho vẹ ekuakua rẹ akpeyeren yen kẹ ohwo omavwerhovwẹn. Ẹkẹvuọvo, Jesu tare nẹ, “ọ dia efe buebun rẹ ohwo vwori ọyen urhuarhọ rọyen epha-a.” (Luk 12:15) Ọ dia Jesu tare nẹ avwanre jẹ akpọ ẹriọ-ọ, ukperẹ ọtiọyen, Jesu yonori nẹ omavwerhovwẹn herọ vwọ kẹ “igbere vwẹ [“ẹwẹn,” NW ]” kugbe ihwo ri ru ẹro rayen  lọhọ, kọyen ihwo re tẹnrovi oyerinkugbe rayen vẹ ọ rẹ Jihova. (Matiu 5:3; 6:22) Nọ oma wẹn: ‘Mi ghini vwo imuẹro kpahen iyono rẹ Jesu, gbanẹ “ọsẹ rẹ ofian,” na ọyen guọnọ phiẹn vwẹ? (Jọn 8:44) Die yen eta mẹ, obo re me vwọ tua, kugbe obo ri mi yeren akpọ mẹ wan djephia?’​—Luk 6:45; 21:34-36; 2 Jọn 6

17. Djunute ebruphiyọ evo rẹ ihwo ri ru akpeyeren rayen lọhọ riavwerhen rọyen.

17 Jesu tare nẹ, “iruo rọyen vọnre vẹ aghwanre.” (Matiu 11:19) Roro kpahen erere evo rẹ ihwo ri ru akpeyeren rayen lọhọ riavwerhen rọyen. Oma vwerhen ayen vwẹ iruo rẹ Uvie na. (Matiu 11:29, 30) Ayen kẹnoma kẹ ẹwan ri fiemu-u, ọtiọyena ayen ke sa vrabọ rẹ ega rẹ iroro. (Se 1 Timoti 6:9, 10.) Kiridie nẹ ayen vwo ẹwẹn rẹ otekẹvwẹ, ayen ki vwo ọke buebun rẹ ayen ghwọrọ vẹ orua rayen kugbe iniọvo rayen rehẹ ukoko na. Ovwerhẹn rayen kọ sa dia ọ rẹ dọe. (Aghwoghwo 5:12) Ayen ke mrẹ omavwerhovwẹn ro te ohwo siẹrẹ ọ da kẹ okẹ. (Iruo Rẹ Iyinkọn Na 20:35) Ayen “bu phihọ vwẹ iphiẹrohọ,” ayen ji vwo ufuoma rẹ ẹwẹn kugbe otekẹvwẹ. (Rom 15:13; Matiu 6:31, 32) A mrẹ vwo dje ebruphiyọ nana-a!

“GHWẸ EKUAKUA RẸ OFOVWIN RẸ ỌGHẸNẸ PHIYỌ”

18. Mavọ yen Baibol na dje ọvweghrẹn rẹ avwanre, ona rọyen, kugbe oka rẹ ohọnre rẹ avwanre “họnra”?

18 Ihwo re dia evunrẹ ẹguọnọ rẹ Ọghẹnẹ mrẹ ochọnvwe vwo nẹ abọ rẹ Eshu, rọ dia ohwo rọ guọnọ gbowọphiyọ omavwerhovwẹn rẹ Inenikristi vẹ uphẹn rẹ ayen vwọ dia bẹdẹ. (1 Pita 5:8) Pọl tare nẹ, “ọ dianẹ ugboma vẹ ọbara a họnra na-a, ẹkẹvuọvo ihwo ride, ogangan ride, ihwo ride ri suẹn akpọ rẹ ebri nana, otuofovwi rẹ [“ẹwẹn,” NW ] umwemwu re hẹ obo obenu na.” (Ẹfesọs 6:12) Ọ dia ota na “họnra,” mudiaphiyọ nẹ avwanre che siomanu vwẹ asan  rọ pha shesheri da họnre-e, ẹkẹvuọvo avwanre che nene muabọ. Kpobarophiyọ, eta na “ikpihwo ride,” “ogangan ride,” vẹ “ihwo ride ri suẹn” djephia nẹ Eshu vẹ emekashe rọyen choma rẹ ayen vwo nene avwanre họnre.

19. Dje kpahen ekuakua rẹ ofovwin rẹ Inenikristi che kuphiyọ.

19 Dede nẹ o vwo asan ẹgba avwanre teri, avwanre se phikparobọ. Vwẹ idjerhe vọ? Womarẹ a vwọ “ghwẹ ekuakua rẹ ofovwin rẹ Ọghẹnẹ phiyọ.” (Ẹfesọs 6:13) Re vwo dje oborẹ ekuakua rẹ ofovwin na hepha, Ẹfesọs 6:14-18 de se: “Mudia koi, vwẹ uyota na chobiẹ ehun, vwẹ ọghan rẹ ọvwata mu arhare, vwẹ iyẹnrẹn esiri rẹ ufuoma na ru isabatu kuhọ awọ wẹn; ọ rọ ka enu, gba reyọ ekpọfia rẹ esegbuyota na, kọyen wa vwọ kpọ ibiri rẹ erhanre rẹ Idẹbono kufia. Gba vwẹ ubierhu [yẹrẹ, iphiẹrophiyọ] rẹ esivwo na tughẹ, kugbe ọlọkọ rẹ [“ẹwẹn,” NW ] na, kọyen hẹ ota rẹ Ọghẹnẹ na. Nẹ ẹrhovwo kọke kọke vwẹ evun rẹ [“ẹwẹn,” NW ] na, vwẹ ẹrhovwo ẹnẹ ejobi kugbe oyare.”

20. Idjerhe vọ yen ẹdia rẹ avwanre vwọ fẹnẹ ọ rẹ isodje?

20 Rọ vwọ dianẹ ekuakua ofovwin rẹ udje na obọ rẹ Ọghẹnẹ ọyen i nurhe na, i che sivwin avwanre, takpe nẹ avwanre ku ayen phiyọ ọkeneje. Vwọ fẹnẹ isodje ri se rovwonma ọkiọvo, Inenikristi cha rha họnra ohọnre rẹ arhọ vẹ ughwu bẹsiẹ Ọghẹnẹ cha vwọ ghwọrọ akpọ rẹ Idẹbono na, o mi ji mu emekashe rẹ Idẹbono umwemwu na phiyọ ukpotọ ro jẹ oba evwo. (Ẹvwọphia 12:17; 20:1-3) Ọtiọyena, ọ da dianẹ wo nene ovwiẹrẹ evo yẹrẹ iroro echọchọ muabọ, wo jẹ ofu dje we-e, kidie avwanre eje cha “nyẹ oma” avwanre rere a sa vwọ fuevun kẹ Jihova. (1 Kọrẹnt 9:27) Vwọrẹ uyota, ọke rẹ avwanre rha họnra-a, ọyen o vwo fo nẹ avwanre nomaso!

21. Idjerhe vuọvo vọ yen avwanre se vwo phikparobọ vwẹ ofovwin rẹ ẹwẹn rẹ avwanre họnra na?

21 Vwọba, avwanre che se phi ofovwin nana kparobọ komobọ-ọ. Kọyensorọ Pọl vwọ karophiyọ avwanre nẹ ofori a  vwọ nẹrhovwo rhe Jihova “kọke kọke vwẹ evun rẹ [“ẹwẹn,” NW ].” O ji fo nẹ avwanre kerhọ rẹ Jihova womarẹ e vwo yono Ota rọyen, ji kuomakugbe ihwo rẹ avwanre vẹ ayen “gbe koko phi ofovwin na,” kidie ọ dia avwanre ọvo yen phi ofovwin na-a! (Filimọn 2; Hibru 10:24, 25) Ọ dia ophikparobọ ọvo yen ihwo re fuevun vwẹ ẹdia nana eje cha mrẹ-ẹ, ẹkẹvuọvo ayen ji che mudia gan chochọ rẹ esegbuyota rayen ọke rẹ ayen de hirharoku ọdavwini.

MUEGBE WỌ VWỌ CHOCHỌ RẸ ESEGBUYOTA WẸN

22, 23. (a) Diesorọ o vwo fo nẹ avwanre choma ra vwọ chochọ rẹ esegbuyota rẹ avwanre ọkeneje, enọ vọ yen avwanre nọ oma avwanre? (b) Die yen a cha ta ota kpahen vwẹ uyovwinrota rọ vwọ kpahen ọnana?

22 Jesu tare nẹ, “fikiridie ovwan rha dia e rẹ akpọ na-a na, . . . kọye akpọ na vwo tuoma rẹ ovwan na.” (Jọn 15:19) Ọtiọyena, Inenikristi ke choma rẹ ayen vwọ chochọ rẹ esegbuyota rẹ ayen ọkeneje, ayen mi rhe ru ọnana dẹndẹn vẹ ọghọ. (Se 1 Pita 3:15.) Nọ oma wẹn: ‘Me riẹn oboresorọ iroro rẹ Iseri rẹ Jihova vwọ fẹnẹ ọ rẹ ihwo efa ọkiọvo? Siẹrẹ mi de hirharoku ẹdia tiọyena, mi ghini vwo imuẹro nẹ oborẹ Baibol na vẹ odibo rọ fuevun na tare gbare? (Matiu 24:45; Jọn 17:17) A da ta ota kpahen e vwo ru obo re gbare vwẹ obaro rẹ Jihova, oma vwerhen ovwẹ nẹ mi muegbe mi vwo ru ọtiọyen?’​—Une Rẹ Ejiro 34:2; Matiu 10:32, 33.

23 Ọke buebun yen Eshu vwọ vwẹ ona davwen avwanre nẹ siẹrẹ avwanre da davwẹngba e vwo jẹ ẹbẹre ọvo rẹ akpọ na ẹdia. Kerẹ udje, kirobo re djunute jovwo re, Idẹbono davwẹngba rọ vwọ phiẹn idibo rẹ Jihova womarẹ erọnvwọn ra vwọ diotọ rẹ akpọ nana. Mavọ avwanre sa vwọ sane erọnvwọn ra vwọ diotọ ri shephiyọ re sa nẹrhẹ oma vwerhen avwanre, je kẹ avwanre ẹwẹn obrorhiẹn rọ fonro? Uyovwinrota rọ vwọ kpahen ọnana cha ta ota kpahọn.

^ e?ko. 3 Rhavwẹn Pẹntikọst 33 C.E., ọyen Kristi vwọ dia Ovie rẹ ukoko rẹ Inenikristi ra jẹreyọ vwẹ otọrakpọ na. (Kọlose 1:13) Vwẹ ukpe rẹ 1914 yen a vwọ vwẹ ẹgba vwọ kẹ Kristi rọ vwọ dia ovie rẹ “uvie rẹ akpọ na.” Ọtiọyena, Inenikristi ra jẹreyọ yen mudia kẹ Uvie rẹ Mesaya na vwẹ otọrakpọ na.​—Ẹvwọphia 11:15.

^ e?ko. 8 Ni Reasoning From the Scriptures, aruẹbe 389-393, rẹ Iseri rẹ Jihova teyenphia.