Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

“Sẹro rẹ Oma rẹ Ovwan Vwẹ Evun rẹ Ẹguọnọ rẹ Ọghẹnẹ”

 APẸNDISI

Phi Uruemu Re Vwo Du Omobọ Kparobọ

Phi Uruemu Re Vwo Du Omobọ Kparobọ

Uruemu re vwo du omobọ miovwo Ọghẹnẹ ivun, ọ nẹrhẹ ohwo tẹnroviẹ urhurusivwe romobọ rọyen, ọ je nẹrhẹ ohwo roro kpahen obo re chọre. * Ohwo ro du omobọ rọyen sa rhe mrẹ ihwo efa kerẹ ihwo re di nene bru ehware rere o vwo se hwe urhurusivwe rẹ ehware ro rhere. Ohwo tiọyena rha mrẹ ehware kerẹ odjephia rẹ ẹguọnọ-ọ, ukperẹ ọtiọyen, kọ mrẹ kerẹ obo re vwo hwe urhurusivwe rẹ ehware. Ẹkẹvuọvo, urhurusivwe ehwe tiọyena ọ rẹ ọmọke. Vwọrẹ uyota, ukperẹ o vwo hwe urhuru rẹ ugboma na kpahen “igberadja, inuhu, avwerhe rẹ ugboma” uruemu re vwo du omobọ nẹrhẹ urhurusivwe na ganphiyọ.​—Kọlose 3:5.

Ọyinkọn Pọl de si: “Imoni re ghare . . . e gbe jẹn avwanre họ oma rẹ avwanre nẹ ẹgua rẹ ugboma vẹ [“ẹwẹn,” NW ], re ru ẹfuọn gba vwẹ oshọẹdjẹ rẹ Ọghẹnẹ.” (2 Kọrẹnt 7:1) Ọ da dianẹ wo vwo ebẹnbẹn wo vwo ru nene eta nana, wo jẹ ọ bẹn wẹ-ẹ. Jihova “ohwo esiri vẹ evwoghovwo,” o muegbe rọ vwọ chọn wẹ uko. (Une Rẹ Ejiro 86:5; Luk 11:9-13) Vwọrẹ uyota, kidie nẹ udu wẹn brorhiẹn hwe we, wọ jẹ davwẹngba wọ vwọ dobọ rẹ uruemu na ji dede nẹ wo she ufi na ọke sansan, ọyen odjephia rẹ omamọ uruemu. Karophiyọ nẹ “Ọghẹnẹ rhonọ udu rẹ avwanre, ọ ke rha je riẹn emu ejobi re.” (1 Jọn 3:20) Ọ dia umwemwu rẹ avwanre ọvo yen Ọghẹnẹ mrẹ-ẹ, ọ mrẹ oborẹ  avwanre hepha eje. Erianriẹn nana ro rhe Ọghẹnẹ na nẹrhẹ ọ kerhọ rẹ oyare rẹ avwanre vwọ kẹ arodọnvwẹ. Ọtiọyena, wo jẹ ọ bẹn wẹ-ẹ, kerẹ omotete ro bru ọsẹ rọyen ra vwẹ ọke rọ vwọ hẹ okpetu, bru Ọghẹnẹ ra womarẹ ẹrhovwo ro nẹ otọ rẹ udu rhe. Jihova cha kẹ wẹ ẹwẹn obrorhiẹn ro fiotọ. (Une Rẹ Ejiro 51:1-12, 17; Aizaya 1:18) Ofori nẹ wọ je wian kpahen obo ru wọ nẹrhovwo kpahan na. Kerẹ udje, wọ cha davwẹngba mamọ wọ vwọ kẹnoma kẹ ughe eno rẹ ihwo re banphiyọ vẹ erharhe rẹ igbeyan. *

Ọ da dianẹ wọ sa dobọ rẹ uruemu re vwo du omobọ ji-i, biko vuẹ ọmiọvwọn rọ dia Onenikristi yẹrẹ ugbeyan ro vwo uvi rẹ oyerinkugbe vẹ Ọghẹnẹ. *​—Isẹ 1:8, 9; 1 Tẹsalonaika 5:14; Taitọs 2:3-5.

^ e?ko. 1 Re vwo du omobọ ọyen uruemu rẹ aye yẹrẹ ọshare vwọ vwẹ obọ ghworo oma te ẹdia rẹ ame-oma me wan.

^ e?ko. 2 Rere a sa vwọ kẹnoma kẹ eno rẹ erharhe rẹ ughe vwẹ ikọmputa, erua buebun ki mu ikọmputa rayen phiyọ asan rẹ ihwo eje da sa mrẹ oborẹ ayen ruẹ. Vwọba, erua evo phi iprogramu evo phiyọ ikọmputa rayen re nẹrhẹ ayen jẹ obo re chọre ẹmrẹ. A cha ghwa sa vwẹroso iprogramu rẹ ikọmputa kare kare-e.

^ e?ko. 1 Wọ da guọnọ iroroẹjẹ re sa vwẹ ukẹcha kẹ wẹ vwo phi uruemu re vwo du omobọ kparobọ, ni uyovwinrota na “Young People Ask . . . How Can I Conquer This Habit?” vwẹ Awake! rẹ November 2006, vẹ aruẹbe 178-182 rẹ ọbe na Questions Young People Ask​—Answers That Work, Volume 1.