پچھلے مضامین میں ہم نے دیکھا کہ کچھ صورتحال میں یہ کیوں لگ سکتا ہے کہ جینا بہت مشکل ہے۔ جب آپ کو مشکلات کا سامنا ہوتا ہے تو شاید آپ سوچیں کہ کیا جینے کا کوئی فائدہ ہے یا کیا کسی کو میری فکر ہے۔ یقین مانیں کہ خدا کو آپ کی فکر ہے اور وہ آپ کی تکلیف کو سمجھتا ہے۔ آپ اُس کی نظر میں بہت اہم ہیں۔‏

زبور 86 کو لکھنے والے شخص نے خدا پر ایمان ظاہر کرتے ہوئے کہا کہ ”‏مَیں اپنی مصیبت کے دن تجھ سے دُعا کروں گا۔ کیونکہ تُو مجھے جواب دے گا۔“‏ (‏زبور 86:‏7‏)‏ شاید آپ کے ذہن میں یہ سوال آئے کہ ”‏خدا مجھے میری ”‏مصیبت کے دن“‏ کیسے جواب دے گا؟“‏

شاید خدا فوراً ہماری مشکلات کو ختم نہ کرے۔ لیکن اپنے کلام میں وہ ہمیں یقین دِلاتا ہے کہ وہ ہمیں اِطمینان دے گا جس کے ذریعے ہم اِن مشکلات کا سامنا کر پائیں گے۔ پاک کلام میں لکھا ہے:‏ ”‏کسی بات پر پریشان نہ ہوں بلکہ ہر معاملے میں شکرگزاری کے ساتھ دُعا اور اِلتجا کریں اور اپنی درخواستیں خدا کے سامنے پیش کریں۔ پھر خدا آپ کو وہ اِطمینان دے گا جو سمجھ سے باہر ہے اور یہ اِطمینان مسیح یسوع کے ذریعے آپ کے دل اور سوچ کو محفوظ رکھے گا۔“‏ (‏فِلپّیوں 4:‏6، 7‏)‏ ذرا غور کریں کہ آگے چل کر پاک کلام کی جن آیتوں پر بات کی گئی ہے، اُن سے یہ کیسے ثابت ہوتا ہے کہ خدا کو ہماری فکر ہے۔‏

خدا کو آپ کی فکر ہے

‏”‏خدا اُن میں سے کسی [‏چڑیا]‏ کو نظرانداز نہیں کرتا۔ آپ تو بہت سی چڑیوں سے زیادہ اہم ہیں۔“‏‏—‏لُوقا 12:‏6، 7‏، فٹ‌نوٹ۔‏

غور کریں:‏ زیادہ‌تر لوگ چھوٹے پرندوں کو معمولی خیال کرتے ہیں لیکن خدا اِنہیں معمولی خیال نہیں کرتا۔ وہ تو چھوٹی سی چڑیا کو بھی نظرانداز نہیں کرتا۔ ہر جان‌دار خدا کی نظر میں بہت اہم ہے۔ اور اِنسان تو خدا کی نظر میں چڑیوں سے کہیں زیادہ اہم ہیں۔ اِنسان زمین پر خدا کی سب سے شان‌دار تخلیق ہیں جنہیں اُس نے اپنی ”‏صورت“‏ پر بنایا ہے اور جو اُس جیسی خوبیاں پیدا کرنے اور ظاہر کرنے کی صلاحیت رکھتے ہیں۔—‏پیدایش 1:‏26، 27‏۔‏

‏”‏اَے [‏یہوواہ!‏]‏ تُو نے مجھے جانچ لیا اور پہچان لیا۔ .‏ .‏ .‏ تُو میرے خیال کو دُور سے سمجھ لیتا ہے۔ .‏ .‏ .‏ مجھے آزما اور میرے خیالوں کو جان لے۔“‏‏—‏زبور 139:‏1، 2،‏ 23‏۔‏

غور کریں:‏ خدا ہمیں بہت اچھی طرح جانتا ہے۔ وہ ہمارے دل میں چھپے احساسات اور پریشانیوں سے واقف ہے۔ شاید دوسرے آپ کی مشکلات اور پریشانیوں کو نہ سمجھ سکیں لیکن خدا کو آپ کی فکر ہے اور وہ آپ کی مدد کرنا چاہتا ہے۔ اِس لیے جینا بے‌فائدہ نہیں ہے۔‏

 آپ کی زندگی بے‌معنی نہیں ہے

‏”‏اَے [‏یہوواہ]‏، میری دُعا سُن!‏ مدد کے لئے میری آہیں تیرے حضور پہنچیں۔ .‏ .‏ .‏ اپنا کان میری طرف جھکا۔ جب مَیں پکاروں تو جلد ہی میری سن۔ .‏ .‏ .‏ مفلسوں کی دُعا پر وہ دھیان دے گا۔“‏‏—‏زبور 102:‏1، 2،‏ 17‏، اُردو جیو ورشن۔‏

غور کریں:‏ جب سے اِنسانوں کو تکلیفوں کا سامنا ہے تب سے یہوواہ خدا اِنسانوں کے بہائے ہوئے ایک ایک آنسو کا حساب رکھ رہا ہے۔ (‏زبور 56:‏8‏)‏ اِن آنسوؤں میں آپ کے آنسو بھی شامل ہیں۔ خدا آپ کی تکلیفوں اور آنسوؤں کو یاد رکھتا ہے کیونکہ آپ اُس کے لیے بہت اہم ہیں۔‏

‏”‏تُو مت ڈر کیونکہ مَیں تیرے ساتھ ہوں۔ .‏ .‏ .‏ مَیں تجھے زور بخشوں گا۔ مَیں یقیناً تیری مدد کروں گا .‏ .‏ .‏ مَیں [‏یہوواہ]‏ تیرا خدا تیرا دہنا ہاتھ پکڑ کر کہوں گا مت ڈر۔ مَیں تیری مدد کروں گا۔“‏‏—‏یسعیاہ 41:‏10،‏ 13‏۔‏

غور کریں:‏ خدا آپ کی مدد کرنے کو تیار ہے۔ اگر آپ گِر بھی جائیں تو وہ آپ کو اُٹھا لے گا۔‏

ایک روشن مستقبل کی اُمید

‏”‏خدا کو دُنیا سے اِتنی محبت ہے کہ اُس نے اپنا اِکلوتا بیٹا دے دیا تاکہ جو کوئی اُس پر ایمان ظاہر کرے، وہ ہلاک نہ ہو بلکہ ہمیشہ کی زندگی پائے۔“‏‏—‏یوحنا 3:‏16‏۔‏

غور کریں:‏ خدا کو آپ سے اِتنی محبت ہے کہ اُس نے خوشی سے اپنے اِکلوتے بیٹے یعنی یسوع مسیح کو آپ کی خاطر قربان کر دیا۔ اِس قربانی کی بدولت آپ ہمیشہ تک ایک خوش‌گوار اور بامقصد زندگی گزارنے کی اُمید رکھ سکتے ہیں۔‏ a